[1] Yû yit-kî chhiong kun-é ke chhak kâu-pûn ngài, yû sâng tui ngài kóng: “Hong-hí-lòi, hi liòng Song-ti ke sṳn-thien lâu chi-thàn, thùng-sṳ̀ son-khon chhai sṳn-thien-tú kin-pai ke ngìn.
[2] Chúng-he, m̀-sṳ́ liòng sṳn-thien ke ngoi-yen, yîn-vi liá ngoi-yen yí-kîn liù-pûn Ngoi-pâng-ngìn; kì-têu voi chien-tha̍p Sṳn-sàng si-sṳ̍p-ngi-ke ngie̍t.
[3] Ngài oi chhâi-phai lióng-ke chok mà-sâm ke kien-chṳn-ngìn; kì-têu oi chhòn-kóng Song-ti ke fa yit-chhiên lióng-pak liuk-sṳ̍p ngit.”
[4] Ke lióng-ke kien-chṳn-ngìn chhiu-he khî chhai sṳ-kie ke Chú mien-chhièn, ke lióng-thèu kám-lám-su lâu lióng-kî tên-thòi.
[5] Na yû-ngìn sióng-oi sông-hoi kì-têu, kì-têu voi tui choi-tú phun-chhut fó-yam lòi sêu-sí thi̍t-ngìn. Só-yî, má-ngìn sióng-oi sông-hoi kì-têu, chhiu voi án-ngiòng pûn kì-têu chhṳ̀-sí.
[6] Kì-têu yû khièn chiông thiên koân hí-lòi, chhai kì-têu siên-pu Song-ti ke fa ke-têu ngit-è, ham thiên mo̍k lo̍k-yí. Kì-têu ya yû khièn chóng-kón só-yû ke súi-ngièn, ham súi pien-cho hiet, ya yû khièn sùi-sṳ̀ sùi-yi yung kok-chúng châi-nan kûng-kit thai-thi.
[7] Kì-têu cho-vàn kien-chṳn yî-heu, ke tui mò-tái-hâng chhut-lòi ke ok-chhu oi thùng kì-têu siông-chhṳ̀, tá-yàng kì-têu, chiông kì-têu chhṳ̀-sí.
[8] Kì-têu ke sṳ̂n-sṳ̂ voi vang chhai thai-sàng ke kiê-hong, chhiu-he kì-têu ke Chú pûn-ngìn tâng sṳ̍p-sṳ-ka ke só-chhai. Liá-sàng siong-chṳ̂n ke miàng khó-pí Só-tô-mâ ya-he Âi-khi̍p.
[9] Tui kok-chúng ngìn, kok mìn-chhu̍k, kok ngî-ngièn, lâu tak-ke koet-kâ, voi yû-ngìn lòi khon kì-têu ke sṳ̂n-sṳ̂ sâm-ngit-pan, put-chún ngìn ôn-chong kì-têu.
[10] Thi-song ke ngìn voi yîn-vi kì-têu ke sí fôn-hí khoai-lo̍k. Thai-kâ khin-chuk, kâu-von lî-vu̍t, yîn-vi liá lióng-ke siên-tî sṳt sṳ́ thi-song ke ngìn su thai khú-nan.
[11] Sâm-ngit-pan ko-thet, yû sâng-miang ke lìn-hi tui Song-ti ke-vi kong-lìm, chin-ngi̍p kì-têu ke tî-poi, kì-têu chhiu khî-hí-lòi; khon-tó kì-têu ke ngìn chhiu fî-sòng chho̍k-kiâng.
[12] Liá lióng-ke siên-tî thâng-tó tui thiên-táng yû thai sâng-yîm tui kì-têu kóng: “Sông liá-vi lòi!” Kì-têu chhiu chhai thi̍t-ngìn ke chu-muk chṳ̂-ha chhô yùn sṳ̂n-thiên.
[13] Chhiu chhai ke-sṳ̀, thai thi-thûng fat-sên, ke-chho sàng vang-thet sṳ̍p-fûn-chṳ̂-yit. Yîn-vi thi-thûng, sí-thet ke ngìn yû chhit-chhiên sà; chhûn ke ngìn fî-sòng chho̍k-kiâng, chhiu kûi yùng-kông pûn thiên-táng ke Song-ti.
[14] Thi-ngi-chúng ke châi-nan yí-kîn ko-thet; khon â, thi-sâm-chúng châi-nan voi to lé.
[15] Thi-chhit-ke thiên-sṳ́ yit phùn ho-thùng, thiên-táng chhiu yû thai sâng-yîm kóng: “Thúng-chhṳ yí-chhiu ke khièn-nèn yí-kîn kûi ngài-têu ke Chú lâu Kì só-li̍p ke Kî-tuk lé; Kì oi chóng-khièn, chhṳ̍t-to yún-yún yén-yén!”
[16] Chhai Song-ti mien-chhièn, chhô chhai chhṳ-kâ ke chho-vi táng-kô ke ngi-sṳ̍p-si-ke chóng-ló chhiu phu̍k chhai thi-song, kin-pai Song-ti,
[17] kóng: Kú-chó chhùn-chhai, liá-ha chhùn-chhai ke Chú — chhiòn-nèn ke Song-ti â, ngài-têu kám-chhia Ngì; yîn-vi Ngì yí-kîn chóng-kón thai-khièn, yí-kîn sṳ̍t-hàng thúng-chhṳ lé!
[18] Lie̍t-koet fat-khién, chúng-he, Ngì ke thai fat-khién ya lìm-to lé. Sṳ̀-kî yí-kîn sṳ̀n-su̍k, sí-ngìn oi su sṳ́m-phan; Ngì ke phu̍k-ngìn, chhiu-he chung siên-tî, chung sṳn-thù, lâu só-yû kin-vi Ngì ke ngìn, mò-lun chûn-kui ya-he pî-mì, chhiòn-phu oi tet-tó chióng-sóng. Ke-têu phai-fai thai-thi ke ngìn oi tù-tó fí-me̍t!
[19] Liá-sṳ̀, Song-ti chhai thiên-táng ke sṳn-thien tá khôi-lòi; Kì ke yok-khui chhai sṳn-thien-tú hién-mìn chhut-lòi. Chiap-tén, chhiu ngiap-lang, hióng-lùi-kûng, yû lung-lung-kún ke sâng, thi-thûng, lâu thai pên-pho̍k.