[1] Ngài khon-tó ke chhô chhai pó-chho song ke, yu-sú nâ-tén yit-kién sû; liá-kién sû lióng-mien siá-to mân-mân ke sṳ, he yung chhit-chak yin-é fûng-tén.
[2] Ngài yu khon-tó yit-ke chhin yúng-chong ke thiên-sṳ́, thai-sâng siên-pu kóng: “Má-ngìn yû chṳ̂-kiet hiên-khôi liá-têu yin-é, tá-khôi liá-kién sû nè?”
[3] Chúng-he, mò-lun chhai thiên-táng, thi-song, ya-he thi-tái-hâ, lûng-chúng mò ngìn nèn tá-khôi ya-he khon ke-kién sû.
[4] Ngài chhiu thai-sâng kieu, yîn-vi mò ngìn yû chṳ̂-kiet tá-khôi ya-he khon ke-kién sû.
[5] Chóng-ló chûng yû yit-ke tui ngài kóng: “M̀-sṳ́ kieu! Ngì khon, ke tui Yù-thai kî-chhu̍k chhut-lòi ke Sṳ̂-é — Thai-ví ke heu-thoi yí-kîn tet-sṳn lé; kì nèn hiên-khôi ke chhit-chak yin-é, tá-khôi ke-kién sû.”
[6] Chiap-tén, ngài khon-tó chhai pó-chho lâu si-ke sâng-vu̍t ke tûng-ông, chhiu-he chung chóng-ló vì-tén ke tûng-ông, yû Kâu-yòng khî-tén. Ke Kâu-yòng chhiong-he pûn-ngìn chhṳ̀-ko ke, yû chhit-kî kok, chhit-chak muk-chû, chhiu-he Song-ti ke chhit-ke Lìn, he fung chhâi-phai to sṳ-kiên tak só-chhai hi ke.
[7] Ke Kâu-yòng chin chhièn-lòi, tui chhô chhai pó-chho-song ke yu-sú chiông ke-kién sû chiap-ko-lòi.
[8] Kì chiap-ko ke-kién sû ke sṳ̀, si-ke sâng-vu̍t lâu ngi-sṳ̍p-si-ke chóng-ló chhiu khúi chhai Kâu-yòng ke mien-chhièn. Tak-ke chóng-ló nâ-tén hièn-khìm lâu chông-mân hiông ke kîm-lù; liá hiông he chung sṳn-thù ke khì-tó.
[9] Kì-têu chhong yit-sú sîn ke sṳ̂-kô, kóng: Vì-yû ngì yû chṳ̂-kiet chiap-su ke-kién sû, hiên-khôi ke-têu táng-kô ke yin-é; yîn-vi ngì sṳt pûn-ngìn chhṳ̀-sí! Ngì thûng-ko liù-hiet to sí, tui kok chúng-chhu̍k, kok ngî-ngièn, kok mìn-chhu̍k, lâu tak-ke koet-kâ, chiông ngìn su̍k-chón-lòi, kûi-pûn Song-ti.
[10] Ngì sṳ́ kì-têu sàng-cho yit-ke koet, cho chi-sṳ̂ lòi fu̍k-sṳ ngài-têu ke Song-ti; kì-têu voi thúng-chhṳ sṳ-kie.
[11] Ki-siu̍k khon-hâ-hi, ngài thâng-tó yû chhiên-chhiên van-van thiên-sṳ́ ke sâng-yîm. Kì-têu vì-tén khî chhai pó-chho, lâu si-ke sâng-vu̍t, pin chung chóng-ló ke chû-vì,
[12] thai-sâng chhong-sṳ̂ kóng: Pûn-ngìn chhṳ̀-sí ke Kâu-yòng, yû chṳ̂-kiet chiap-su khièn-nèn, fûng-sṳn, chṳ-fi, li̍t-liong, chûn-kui, yùng-kông, lâu siung-chan!
[13] Ngài yu thâng-tó thiên-táng, thi-song, thi-tái-hâ, lâu hói-tú yit-chhiet su-chho ke, chhiu-he yí-chhiu-kiên ke van-vu̍t, lûng-chúng chhong-sṳ̂, kóng: Ngien siung-chan, chûn-kui, yùng-kông, lâu khièn-piang, chhiòn-phu kûi-pûn ke chhô pó-chho ke lâu Kâu-yòng, chhṳ̍t-to yún-yún yén-yén!
[14] Si-ke sâng-vu̍t en-kóng: “Â-mén!” Chung chóng-ló chhiu phu̍k lo̍k-hi pai kì.