[1] “Ngì oi siá sin-é pûn Yî-fut-só kau-fi ke sṳ́-chá, kóng: ‘Ke yu-sú nâ-tén chhit-lia̍p sên-é, chhai chhit-chán kîm tên-thòi chûng-kiên hàng ke, án-ngiòng kóng:
[2] Ngài tî ngì só-cho ke: Ngì ngióng-pân sîn-khú kûng-chok, ngióng-pân ngiûn-nai; ngài ya tî ngì mò chiúng fái-ngìn, sṳt kháu-ngiam ke-têu chhṳ-chhṳ̂n sṳ́-thù khì-sṳ̍t m̀-he sṳ́-thù ke ngìn, ngin-chhut kì-têu he ká-mo ke.
[3] Ngì chhin yû ngiûn-nai, sṳt vi ngài ke yèn-ku kîn-li̍t khú-nan, chhiùng-lòi m̀-sṳt ngiûn-m̀-he̍t.
[4] Chúng-he, yû yit-khien sṳ ngài oi chit-phi ngì: Ngì yí-kîn sṳt-thet siên-chhièn tui ngài ke oi-sîm.
[5] Ngì sióng khon-é, ngì yí-kîn chhui-lo̍k to má-ke chhàng-thu! Ngì oi fí-kói, fì-fu̍k ngì siên-chhièn yû oi-sîm ke hàng-vì. Ngì na m̀ fí-kói, ngài oi lòi, chiông ngì ke tên-thòi tui ngièn-vi sái-chéu.
[6] Chúng-he, ngì yû yit-ke yû-tiám: Ngì thùng ngài khiung-yong án nâu Nì-kô-lâ-tóng ke chok-vì.
[7] ‘Sṳn-Lìn tui kok kau-fi só-kóng ke fa, yû ngí-kûng hó-thâng ke, chhiu oi thâng! ‘Tet-sṳn ke ngìn, ngài oi pûn kì yû-khièn hó sṳ̍t Song-ti lo̍k-yèn-chûng sâng-miang-su ke kó-chṳ́.’ ”
[8] “Ngì oi siá sin-é pûn Sṳ-mî-nâ kau-fi ke sṳ́-chá, kóng: ‘Ke khôi-sṳ́ lâu kiet-suk, sí yu fu̍k-fa̍t ke, án-ngiòng kóng:
[9] Ngài tî ngì ke fam-nan lâu khiùng-khú; sṳ-sṳ̍t-song ngì he fu-chiuk ke! Ngài tî ngì pûn ke-têu chhṳ-chhṳ̂n Yù-thai-ngìn ke fí-pong; khì-sṳ̍t kì-têu pin m̀-he Yù-thai-ngìn, kì-têu he Sat-tan yit-tóng ke ngìn.
[10] M̀-sṳ́ kiâng ngì só voi tù-tó ke khú-nan. Khon â, Mô-kúi oi kháu-ngiam ngì-têu; ngì-têu chûng-kiên yû-têu ngìn voi pûn kì fit-lo̍k kâm-ngiu̍k; ngì-têu oi su sṳ̍p-ngit ke khú-nan. Ngì oi chûng-sîm to sí, ngài chhiu su ngì sâng-miang ke miên-liù.
[11] ‘Sṳn-Lìn tui kok kau-fi só-kóng ke fa, yû ngí-kûng hó-thâng ke, chhiu oi thâng! ‘Tet-sṳn ke ngìn chhie̍t-tui m̀-voi su thi-ngi-pái sí ke sông-hoi.’ ”
[12] “Ngì oi siá sin-é pûn Phe̍t-kâ-mô kau-fi ke sṳ́-chá, kóng: ‘Ke yû lióng-piên li ke kiam ke, án-ngiòng kóng:
[13] Ngài tî ngì he̍t ke thi-fông chhiu-he Sat-tan cho-vòng ke só-chhai. Ngì tui ngài chûng-sṳ̀n; chhiu-he ngài chûng-sîm ke kien-chṳn-ngìn Ôn-thì-pha chhai Sat-tan ke thi-phàn su-hoi ke sṳ̀, ngì ya mò piong-thet tui ngài ke sin-sîm.
[14] Chúng-he, yû-têu sṳ ngài oi chit-phi ngì: Ngì-têu chûng-kiên yû-ngìn cheu Pâ-làn ke kau-hiun hi hàng; liá-ke Pâ-làn yú-fe̍t Pâ-le̍t, kâu-sô Yî-set-lie̍t-ngìn fam-chhui, hi sṳ̍t pai-ko ngiéu-siong ke chi-vu̍t, yu hàng yìm-lon ke sṳ-chhìn.
[15] Khiung-yong, ngì-têu chûng-kiên ya yû-ngìn cheu Nì-kô-lâ-tóng ke kau-hiun hi hàng.
[16] Só-yî, ngì oi fí-kói, na mò, ngài voi ngiàm-sṳ̀ to, yung ngài khiéu-chûng ke kiam kûng-kit liá-têu ngìn.
[17] ‘Sṳn-Lìn tui kok kau-fi só-kóng ke fa, yû ngí-kûng hó-thâng ke, chhiu oi thâng! ‘Tet-sṳn ke ngìn, ngài oi su-pûn kì ke khong-tén ke mâ-nâ. Ngài ya oi pûn kì yit-te pha̍k sa̍k-thèu, táng-kô siá-tén sîn ke miàng; liá-ke miàng, chhù-liáu chiap-su ke ngìn, mò ngìn ngin-tet-sṳt.’ ”
[18] “Ngì oi siá sin-é pûn Thûi-ngâ-thûi-lâ kau-fi ke sṳ́-chá, kóng: ‘Song-ti ke Lai-é, muk-chû chhiong fó-yam án kîm, kiok chhiong chhu̍t kîm-kîm ke thùng, kì án-ngiòng kóng:
[19] Ngài tî ngì só-cho ke; ngài tî ngì ke oi-sîm, sin-sîm, sṳ-fung, lâu nai-sîm. Ngài tî ngì liá-ha só-cho ke pí siên-chhièn hàn-kha tô.
[20] Chúng-he, yû yit-khien sṳ ngài oi chit-phi ngì: Ngì ngiûn-su ke chhṳ-chhṳ̂n ńg siên-tî ke Yâ-sé-pit. Kì kâu-sô yín-yu ngài só-yû ke phu̍k-ngìn hi-hàng yìm-lon ke sṳ, sṳ̍t pai-ko ngiéu-siong ke chi-vu̍t.
[21] Ngài yû pûn kì fí-kói ke sṳ̀-kiên, chúng-he kì m̀-hén lì-khôi kì ke yìm-lon.
[22] Khon â, ngài oi sṳ́ kì pot-phiang vang chhai mìn-chhòng-táng; ke-têu thùng kì hàng yìm-lon ke ngìn, chhù-fî kì-têu fí-kói, mò chai thùng kì hàng yìm-lon, ngài chhiu oi sṳ́ kì-têu thùng kì khiung-ha su thai khú-nan.
[23] Ngài ya oi kûng-kit thèn kì ke ngìn, chhṳ-sí kì-têu; kok kau-fi chhiu voi tî, ngài he ke khon-theu ngìn ke sṳ̂-sióng lâu yi-ngiam ke. Ngài oi cheu ngì-têu tak-sà só-cho ke, pûn mî-yit-ke ngìn tet-tó chhṳ-kâ ke po-yin.
[24] ‘Lun-tó chhai Thûi-ngâ-thûi-lâ khì-thâ ke ngìn, ngì-têu mò thèn ke sià-sot, mò ho̍k-si̍p só-vi Sat-tan ke o-pi. Ngài lâu ngì-têu kóng, ngài m̀-voi chai chiông phe̍t ke chhûng-tâm kâ pûn ngì-têu.
[25] Chúng-he, ngì-têu oi chhṳ̀-sú ngì-têu yí-kîn yû ke, chhṳ̍t-to ngài lòi.
[26] Tet-sṳn ke, nèn ki-siu̍k chûn-hàng ngài min-lin to chui-heu ke ngìn, ngài oi su kì khièn-piang, thùng ngâ Pâ pûn ngài ke khiung-yong; ngài oi su kì khièn-piang lòi thúng-chhṳ van-koet, yung thiet-chhóng chhṳ-lî kì-têu, chhiong tá-lan fì-è án-ngiòng fún-sui kì-têu. Ngài ya oi chiông thiên-kông-sên su pûn tet-sṳn ke ngìn.
[29] ‘Sṳn-Lìn tui kok kau-fi só-kóng ke fa, yû ngí-kûng hó-thâng ke, chhiu oi thâng!’ ”