[1] Ngài khon-tó Kâu-yòng hiên-khôi ke chhit-chak yin-é ke thèu-yit-chak. Ke-sṳ̀, ngài thâng-tó si-ke sâng-vu̍t chûng ke yit-ke fat-chhut chhiong hióng-lùi-kûng ke sâng, kóng: “Lòi!”
[2] Ngài yit khon, khon-tó yit-phit pha̍k-mâ; ke khì-mâ ke nâ-tén kiûng, liâng-su su-pûn kì ke miên-liù, yèn-heu chhiu chhut-hi chan-chên, tet-sṳn yu oi tet-sṳn.
[3] Kâu-yòng hiên-khôi thi-ngi-chak yin-é ke sṳ̀, ngài thâng-tó thi-ngi-ke sâng-vu̍t kóng: “Lòi!”
[4] Nang-ngoi yit-phit mâ chhiu chhut-lòi, he fùng-set ke. Ke khì-mâ ke liâng-su-liáu kâu-pûn kì ke khièn, khó-yî chiông thi-song ke fò-phìn chhióng-chéu, sṳ́ ngìn-lui fu-siông chhàn-sat; kì só liâng-su ke he yit-kî thai kiam.
[5] Kâu-yòng hiên-khôi thi-sâm-chak yin-é ke sṳ̀, ngài thâng-tó thi-sâm-ke sâng-vu̍t kóng: “Lòi!” Ngài yit khon, khon-tó yit-phit vû-mâ; ke khì-mâ ke sú-chûng nâ-tén thiên-phìn.
[6] Ngài thâng-tó yû sâng, chhiong-he tui si-ke sâng-vu̍t chûng fat-chhut ke, kóng: “Yit-ngit ke kûng-chhièn chang mâi yit kûng-sṳ̂n séu-ma̍k, yit-ngit ke kûng-chhièn chang mâi sâm kûng-sṳ̂n thai-ma̍k. Kám-lám-yù lâu chiú m̀-hó châu-tha̍p!”
[7] Kâu-yòng hiên-khôi thi-si-chak yin-é ke sṳ̀, ngài thâng-tó thi-si-ke sâng-vu̍t kóng: “Lòi!”
[8] Ngài yit khon, khon-tó yit-phit fôi-set ke mâ; ke khì-mâ ke miàng ôn-to “Sí”, “Yîm-kiên” thèn chhai kì heu-poi. Kì-têu tet-tó khièn-piang, kón-hot sṳ-kie ke si-fûn-chṳ̂-yit, yung chan-chên, kî-fông, pot-vûn, lâu thi-song ke khìm-chhu hi chhṳ̀-ngìn.
[9] Kâu-yòng hiên-khôi thi-ńg-chak yin-é ke sṳ̀, ngài khon-tó ke-têu yîn-vi chhòn Song-ti ke chṳ̂n-tho, chûng-sîm cho kien-chṳn, pûn-ngìn chhṳ̀-sí ke lìn-fùn chhai chi-thàn-hâ.
[10] Kì-têu thai-sâng hêm-kóng: “Sṳ̀n-sṳn yu chṳ̂n-sṳ̍t ke Chú-chái â! Ngì kí-sṳ̀ chang oi sṳ́m-phan thi-song ke ngìn, vi ngài-têu só-liù ke hiet sṳ̂n-yên â?”
[11] Kì-têu tak-sà chiap-su yit-liâng pha̍k-set ke chhòng-phàu, yu thâng-tó yû fa fûn-fu kì-têu, ham kì-têu hiet-khun kâ yit-ha-é, tén-to thùng kì-têu siông-khiung sṳ-fung Chú ke ngìn lâu hiûng-thi chí-moi ya chhiong kì-têu khiung-yong pûn-ngìn chhṳ̀-sí, su-muk mân ke sṳ̀.
[12] Ngài yu khon-tó Kâu-yòng hiên-khôi thi-liuk-chak yin-é. Ke-sṳ̀, thai-thi chhin chûn; ngit-thèu pien vû, chhiong yit-te vû-mô ke pu-é; ngie̍t-kông kûi-chak pien fùng, chhiong hiet yit-yong;
[13] thiên-táng ke sên-é lo̍k chhai thi-song, chhiong hàn-màng siuk ke vù-fâ-kó pûn phau-fûng tui su-táng chhôi-hâ-lòi yit-yong.
[14] Thiên m̀-kien-thet, chhiong sû kién-hí-lòi sû-chéu yit-yong; sân-liâng lâu hói-tó ya yit-yit tui ngièn-vi sái-chéu.
[15] Thi-song ke kiûn-vòng, thúng-chhṳ-chá, chiông-kiûn, yû-chhièn yû-sṳ ke, pin yit-chhiet nù-li lâu chhṳ-yù-ngìn, chhiòn-phu khong chhai sân-khûng lâu ngàm-sa̍k phung-tú.
[16] Kì-têu tui sân lâu ngàm-sa̍k hêm-kóng: “Vang chhai ngài-têu sṳ̂n-song! Chiông ngài-têu khong-hí-lòi, pûn ngài-têu sám-phit chhô chhai pó-chho-song ke mien lâu Kâu-yòng ke thai fat-khién!
[17] Yîn-vi kì-têu fat-khién ke thai ngit-è to lé; má-ngìn khî tet-he̍t nè?”