[1] Ngài thâng-tó tui sṳn-thien-tú yû thai sâng-yîm hiong ke chhit-ke thiên-sṳ́ kóng: “Ngì-têu hi, chiông ke chhit-vón Song-ti ke nu-hi tó chhai thi-song!”
[2] Thi-yit-ke thiên-sṳ́ chhiu hi, chiông kì ke vón tó chhai thi-song; ke-têu yû ok-chhu ke ki-ho lâu pai-ko kì ke siong ke ngìn, sṳ̂n-song chhiu pot chhin chhu yu chhin thu̍k ke chhông-é.
[3] Thi-ngi-ke thiên-sṳ́ chiông kì ke vón tó chhai hói-chûng; hói-súi chhiu pien-cho chhiong sí-ngìn ke hiet yit-yong, hói-tú ke sâng-vu̍t chhiu sí-chhiang-chhiang.
[4] Thi-sâm-ke thiên-sṳ́ chiông kì ke vón tó chhai ke-têu hò-pa lâu súi-ngièn-thèu, súi chhiu pien-cho hiet.
[5] Ngài thâng-tó ke kón-lî súi ke thiên-sṳ́ kóng: “Kú-chó chhùn-chhai, liá-ha chhùn-chhai ke Chṳ-sṳn-chá â, Ngì he kûng-ngi ke sṳ́m-phan-chá.
[6] Kì-têu sṳt liù sṳn-thù lâu siên-tî ke hiet, liá-ha Ngì yung hiet pûn kì-têu lîm; liá he kì-têu yin-kôi tet-tó ke!”
[7] Ngài yu thâng-tó yû sâng-yîm tui chi-thàn fat-chhut kóng: “Chú — chhiòn-nèn ke Song-ti â, Ngì ke sṳ́m-phan he chṳ̂n-sṳ̍t yu kûng-ngi ke!”
[8] Thi-si-ke thiên-sṳ́ chiông kì ke vón tó chhai ngit-thèu táng-kô, sṳ́ ngit-thèu khó-yî yung lie̍t-fó lòi nat ngìn.
[9] Ngìn pûn chhin sêu ke ngie̍t-hi nat-tó, chhiu siet-thu̍k ke yû-khièn chṳ̂-phi liá-têu châi-nan ke Song-ti. Kì-têu hàn-he m̀ fí-kói, m̀ chiông yùng-kông kûi-pûn Song-ti.
[10] Thi-ńg-ke thiên-sṳ́ chiông kì ke vón tó chhai ke-chak ok-chhu ke chho-vi-táng. Ok-chhu ke koet chhiu pien-cho vû-am, ngìn yîn-vi chhin thung-khú, chhiu ngâu chhṳ-kâ ke sa̍t-mà.
[11] Kì-têu yîn-vi só-su ke thung-khú lâu sṳ̂n-song só pot ke chhông-é chhiu siet-thu̍k thiên-táng ke Song-ti, hàn-he m̀ fí-kói lòi lì-khôi kì-têu sià-ok ke hàng-vì.
[12] Thi-liuk-ke thiên-sṳ́ chiông kì ke vón tó chhai Yu-fat-lâ-tí thai-hò ke táng-kô, hò-pa-súi chhiu châu-thet, lòi vi ke-têu tui tûng-fông lòi ke vòng yi-phi yit-thiàu tho-lu.
[13] Chiap-tén ngài khon-tó yû sâm-ke chhiong hà-mà ke sià-lìn, tui ok-liùng ke choi, ok-chhu ke choi, lâu ká siên-tî ke choi chhut-lòi;
[14] kì-têu he ke-têu voi hàng khì-sṳ ke kúi ke lìn. Kì-têu chhut-hi seu-si̍p chhiòn sṳ-kie só-yû ke vòng, chún-phi kì-têu chhai chhiòn-nèn Song-ti ví-thai ke ngit-è lòi siông-chhṳ̀.
[15] Chú kóng: “Oi se-ngi ô! Ngài voi chhiong chhe̍t-é yit-yong fut-yèn lìm-to! Sùi-sṳ̀ kín-siáng, yit-chhṳ̍t chok-tén sâm-fu ke ngìn yû fuk-hi lé! Yîn-vi kì m̀-voi chhak-sṳ̂n lu-thí hàng-lu, pûn-ngìn khon-tó kien-seu.”
[16] Ke sâm-ke sià-lìn chhiu chiông lie̍t-vòng chhi-si̍p chhai yit-ke só-chhai, Hî-pak-lòi-fa ôn-to Ha̍p-mí-kit-tô-tun.
[17] Thi-chhit-ke thiên-sṳ́ chiông kì ke vón tó chhai khûng-chûng. Yû thai sâng-yîm tui sṳn-thien-tú ke pó-chho ke-vi fat-chhut, kóng: “Vàn-sṳ̀n lé!”
[18] Thèn-tén chhiu ngiap-lang, yû lung-lung-kún ke sâng, hióng-lùi-kûng ke sâng, lâu thai thi-thûng; chhṳ-chhiùng thi-khiù yû ngìn-lui yî-lòi, màng-sṳt yû án li-hoi ke thi-thûng!
[19] Pâ-pí-lùn thai-sàng lie̍t-cho sâm-sak, lie̍t-koet ke sàng-sṳ ya vang-chhiang-chhiang; yîn-vi Song-ti ki-tet Pâ-pí-lùn thai-sàng ke chhui-ok, fa̍t kì lîm ke pî Song-ti thai fat-khién ke lie̍t-chiú.
[20] Só-yû ke hói-tó chhiòn-phu m̀-kien-thet; só-yû ke sân ya mò-thet hi.
[21] Thai pên-pho̍k tui thiên-táng lo̍k chhai ngìn ke sṳ̂n-song, yit-te yok-yû ńg-sṳ̍p kûng-kîn án chhûng; yîn-vi liá pên-pho̍k ke châi-nan khi̍t pî-chhám, ngìn chhiu siet-thu̍k Song-ti.