[1] Liá-sṳ̀, thiên-táng chhut-hien yit-ke chhin thai yu chhin sṳ̀n-pi ke khì-sṳ. Yû yit-ke fu-ngìn-kâ sṳ̂n-chok ngit-thèu, kiok tha̍p ngie̍t-kông, thèu-nà tai-tén yit-táng yû sṳ̍p-ngi-lia̍p sên-é ke miên-liù.
[2] Kì voi kiung lé, kiung-chṳ́ ke chhṳn-thung hoi kì thai-sâng chhin hêm.
[3] Thiên-táng yu chhut-hien nang-ngoi yit-ke sṳ̀n-pi ke khì-sṳ. Yû yit-thiàu fùng-set ke thai ok-liùng, yû chhit-chak thèu-nà, sṳ̍p-kî kok; tak-chak thèu-nà lûng-chúng tai-tén miên-liù.
[4] Kì yung mî chiông thiên-táng sâm-fûn-chṳ̂-yit ke sên-é kién-hí-lòi, phiâng chhai thi-song. Kì khî chhai ke chhâ-m̀-tô voi kiung ke fu-ngìn-kâ mien-chhièn, tén ô-nga-é yit chhut-se, chhiu oi chiông kì thûn-lo̍k-hi.
[5] Ke fu-ngìn-kâ kiung yit-ke lai-é; liá ô-nga-é chiông-lòi oi yung thiet-chhóng thúng-chhṳ van-koet. Kì ke lai-é su-chiap to Song-ti ke pó-chho ke-vi hi.
[6] Ke fu-ngìn-kâ thò-chéu hi khóng-yâ, to Song-ti vi kì chún-phi ke só-chhai. Chhai ke-vi, kì oi tet-tó cheu-ku yit-chhiên lióng-pak liuk-sṳ̍p ngit.
[7] Heu-lòi, thiên-táng fat-sên chan-chên. Mí-kâ-le̍t lâu kì ke-têu thiên-sṳ́ hi thùng ok-liùng siông-chhṳ̀, ok-liùng ya tai kì ke-têu sṳ́-chá hi kâu-chan.
[8] Chúng-he, ok-liùng chan-phai lé; kì lâu kì ke-têu sṳ́-chá mò fap-thu chai liù chhai thiên-táng.
[9] Só-yî, ke-thiàu thai ok-liùng pûn thiên-sṳ́ phiâng-hâ-lòi; kì chhiu-he ke ló-sà, miàng ôn-to Mô-kúi ya-he Sat-tan, he mì-fe̍t chhiòn ngìn-lui ke. Kì pûn thiên-sṳ́ phiâng chhai thi-song; kì ke-têu sṳ́-chá ya thèn-tén phiâng-hâ-lòi.
[10] Ngài yu thâng-tó thiên-táng yû thai sâng-yîm kóng: Liá-ha chhiu-he ngài-têu Song-ti chṳ́n-kiu ke sṳ̀-chiet! Song-ti yí-kîn chông-hién Kì ke khièn-nèn lâu thúng-chhṳ! Kì só-li̍p ke Kî-tuk ya hién-chhut kì ke khièn-piang! Ke ngit-ya chhai ngài-têu ke Song-ti mien-chhièn ko ngài-têu hiûng-thi chí-moi ke, yí-kîn tui thiên-táng phiâng-hâ-lòi lé.
[11] Ngài-têu ke hiûng-thi chí-moi yí-kîn thûng-ko Kâu-yòng ke hiet lâu kì-têu só siên-pu ke chṳ̂n-tho yàng-ko ok-liùng lé; chhiu-he hî-sên chhṳ-kâ ke sâng-miang, kì-têu ya kâm-ngien.
[12] Só-yî, chû-thiên lâu he̍t chhai khì-chûng ke, ngì-têu yin-tông fôn-hí khoai-lo̍k! Chúng-he, thi lâu hói chhám lé; yîn-vi Mô-kúi tî kì ke sṳ̀-kiên m̀-tô, mân tú-sṳ́ fó-hi hâ-to ngì-têu ke-vi hi lé.
[13] Ke-thiàu ok-liùng fat-hien chhṳ-kâ phiâng-lo̍k thi-song, chhiu hi pet-hoi ke kiung lai-é ke fu-ngìn-kâ.
[14] Yû thai ên-tiâu ke lióng-kî yi̍t-kap su-pûn ke fu-ngìn-kâ, pûn kì pî-ngi̍p khóng-yâ, hi-to chhṳ-kâ ke thi-fông. Chhai ke-vi, kì oi tet-tó cheu-ku sâm-ngièn-pan, mò su ke-mî sà ke kûng-kit.
[15] Ke-mî sà chhai fu-ngìn-kâ heu-poi, yung choi phun-chhut súi lòi, chhiong hò-pa súi án-thai, oi chiông kì tá-chéu.
[16] Chúng-he, thi pông-chhu ke fu-ngìn-kâ, tá-khôi choi chiông ke-thiàu ok-liùng phun-chhut-lòi ke súi thûn-lo̍k-hi.
[17] Ok-liùng tui ke fu-ngìn-kâ chhin khién, chhiu hi thùng fu-ngìn-kâ khì-thâ ke chṳ́-sûn siông-chhṳ̀, chhiu-he thùng só-yû fu̍k-chhiùng Song-ti min-lin, vi Yâ-sû só khí-sṳ ke chṳ̂n-lî cho kien-chṳn ke ngìn siông-chhṳ̀.
[18] Ke-thiàu ok-liùng khî chhai hói-sùn ke sâ-thân-táng.