[1] Yok-sî-â-vòng chhai Yâ-lu-sat-lâng sú Phàn-ko-chiet kin-pai Song-chú. Châng-ngie̍t sṳ̍p-si kì-têu vi liá chiet-khì chhṳ̀ thèu-sâng.
[2] Vòng fûn-phai chi-sṳ̂ chhai Song-chú ke sṳn-thien chûng chṳp-hàng ngim-vu, kú-li kì-têu chhai chṳt-vu song chûng-sîm.
[3] Kì ya chṳ́-sṳ Li-vi-ngìn, chhiu-he ke-têu hien-sṳ̂n pûn Song-chú ke Yî-set-lie̍t kau-sṳ̂, kóng: “Ngì-têu oi chiông sṳn yok-khui piong chhai Yî-set-lie̍t-vòng Thai-ví ke lai-é Só-lò-mùn só-hí ke sṳn-thien tú, m̀-sṳ́ kông-lòi kông-hi. Liá-ha ngì-têu oi fu̍k-sṳ Song-chú — ngì-têu ke Song-ti lâu Kì ke chṳ́-mìn Yî-set-lie̍t.
[4] Ngì-têu oi cheu Yî-set-lie̍t-vòng Thai-ví lâu kì ke lai-é Só-lò-mùn só siá, fûn-phai pûn ngì-têu ke chṳt-vu, cheu chûng-chhu̍k ke sun-si chhai sṳn-thien chhṳ̍t-pân;
[5] ngì-têu chhṳ-kâ oi fûn-phi hó-se, sṳ́ ngì-têu tông-chûng yû-têu ngìn cho-tet pông-chhu Yî-set-lie̍t tak-ke kâ-thìn.
[6] Ngì-têu oi chhṳ̀ Phàn-ko-chiet ke se yòng-è lâu sân-yòng, kiet-chhiang chhṳ-kâ, vi ngì-têu ke Yî-set-lie̍t thùng-pâu chún-phi hien-chi, hó chûn-sú Song-chú thûng-ko Mô-sî só fûn-fu ke fa.”
[7] Yok-sî-â vi-tó ngìn-mìn chhai Phàn-ko-chiet ke sî-yeu, tui chhṳ-kâ ke ngiù-khiùn, yòng-khiùn chûng kiên-chhut sâm-van chak se mièn-yòng-kú, se sân-yòng-kú, lâu sâm-chhiên chak ngiù-kú.
[8] Kì ke kôn-yèn ya chhṳ-ngien vi ngìn-mìn, chi-sṳ̂ lâu Li-vi-ngìn fung-hien. Chú-kón Song-ti sṳn-thien ke kôn-chóng — thai-chi-sṳ̂ Hî-le̍t-kâ, Sat-kâ-li-â, lâu Yâ-hiet pûn ke-têu chi-sṳ̂ lióng-chhiên liuk-pak chak se mièn-yòng-kú, se sân-yòng-kú, lâu sâm-pak chak ngiù-kú cho Phàn-ko-chiet ke sên-ngì.
[9] Li-vi-ngìn ke liâng-chhiu — Kô-nàm-ngâ lâu kiâ lióng hiûng-thi Sṳ-mâ-ngâ, Nâ-thán-ngia̍p, pin Ha̍p-sâ-pí-ngâ, Yâ-li, lâu Yok-sat-pha̍t kiên-chhut ńg-chhiên chak se mièn-yòng-kú, se sân-yòng-kú, lâu ńg-pak chak ngiù-kú pûn Li-vi-ngìn cho Phàn-ko-chiet ke sên-ngì.
[10] Phàn-ko-chiet ke sṳ ôn-phài hó-se yî-heu, chi-sṳ̂ lâu Li-vi-ngìn thâng vòng ke min-lin cheu lùn-pân kok-ngìn cho kok-ngìn ke se.
[11] Li-vi-ngìn chiông chhṳ̀-hó ke se yòng-è pok-phì, chi-sṳ̂ chiông hiet hia chhai chi-thàn táng,
[12] yèn-heu kì-têu cheu kâ-chhu̍k chiông sêu-fa-chi ke thèu-sâng pûn-pûn ngìn-mìn, sṳ́ kì-têu cho-tet cheu Mô-sî fap-li̍t ke chṳ́-sṳ lòi hien pûn Song-chú.
[13] Li-vi-ngìn cheu kûi-thin yung fó phoi Phàn-ko-chiet ke sên-ngì, yu yung vo̍k-thèu, phù-vo̍k chú chi-vu̍t, kiak-kiak chiông ngiuk pûn-pûn ngìn-mìn.
[14] Yèn-heu Li-vi-ngìn vi chhṳ-kâ lâu Â-lùn heu-thoi ke chi-sṳ̂ chún-phi, yîn-vi chi-sṳ̂ sêu sên-ngì lâu sên-ngì ke yù, mò-hàn to-am.
[15] Li-vi-ngìn Â-sat chûng-chhu̍k ke kô-sú — Â-sat, Hî-man, lâu vòng ke siên-kien Yâ-thu-tun, cheu Thai-ví-vòng ke chṳ́-sṳ kok-ngìn khî chhai kok-vi. Khon-sú sṳn-thien ke kín-ví m̀-sṳ́ lì-khôi kì-têu ke kûng-chok, yîn-vi khì-thâ Li-vi-ngìn yí-kîn vi kì-têu chún-phi hó Phàn-ko-chiet ke chi-vu̍t.
[16] Án-ngiòng, sú Phàn-ko-chiet lâu chhai chi-thàn táng hien sêu-fa-chi kin-pai Song-chú ke sṳ, chhiòn-phu cheu Yok-sî-â-vòng ke fûn-fu chhai ke-ngit chún-phi hó lé.
[17] Lièn-tén chhit-ngit, só-yû chhai-chhòng ke Yî-set-lie̍t-ngìn chhiòn-phu sú Phàn-ko-chiet lâu Chhù-kau-chiet.
[18] Tui siên-tî Sat-mû-ngí sṳ̀-thoi yî-lòi, chhai Yî-set-lie̍t chûng màng-sṳt án sṳn-thai sú Phàn-ko-chiet. Yî-chhièn ke Yî-set-lie̍t-vòng ya mò yit-ke chhiong liá-pái án-ngiòng, lièn Yok-sî-â-vòng, chi-sṳ̂, Li-vi-ngìn, Yù-thai, Yî-set-lie̍t, lâu Yâ-lu-sat-lâng ngìn-mìn chhiòn-phu khiung-ha sú Phàn-ko-chiet.
[19] Liá-pái Phàn-ko-chiet he chhai Yok-sî-â cho vòng ke thi sṳ̍p-pat ngièn sú ke.
[20] Yok-sî-â-vòng vi sṳn-thien cho-hó liá só-yû ke sṳ yî-heu, Âi-khi̍p-vòng Nì-kô tai-liâng kiûn-chhui kûng-tá Yu-fat-lâ-tí-hò ke Kâ-kî-mí-sṳ̂. Yok-sî-â sióng-oi chú-tóng kì,
[21] chúng-he Nì-kô chhòn-fa pûn Yok-sî-â kóng: “Yù-thai-vòng â, ngài tá liá-chhòng chan-chên lâu ngì mò koân-he; ngài m̀-he lòi kûng-tá ngì, he kûng-tá ngài ke sù-thi̍t. Song-ti oi ngài kiak-kiak hi cho. Ngì m̀-hó kôn-sa̍p Song-ti ke sṳ, miên-tet Kì fí-me̍t ngì, yîn-vi Song-ti lâu ngài khiung-ha.”
[22] Chúng-he Nì-kô só-kóng Song-ti ke fa, Yok-sî-â m̀-thâng, m̀-hén chón-sṳ̂n lì-khôi kì, kiet-thin oi lâu kì chan-chên. Yok-sî-â chhiu kói-chông, to Mí-kit-tô phìn-ngièn hi siông-chhṳ̀.
[23] Yok-sî-â-vòng chhai chan-chhòng pûn Âi-khi̍p-ngìn ke chien sa-tó; vòng min-lin phu̍k-ngìn kóng: “Ngài su chhûng-sông lé! Chiông ngài tai-chéu!”
[24] Kì-têu chiông kì fù-chhut chan-chhâ ngoi, piong chhai thi-ngi liòng chan-chhâ, tai-to Yâ-lu-sat-lâng. Kì sí chhai ke-vi, chong chhai vòng-sṳt ke fùn-mu tú. Só-yû Yù-thai lâu Yâ-lu-sat-lâng ke ngìn-mìn chhiòn-phu vi kì ôi-sông.
[25] Siên-tî Yâ-li-mí vi Yok-sî-â-vòng cho ôi-kô. Só-yû chhong-kô ke nàm-ńg chhiòn-phu chhong liá-sú kô lòi ôi-tho kì; liá chhai Yî-set-lie̍t chûng sàng-cho yit-chúng fûng-siu̍k, chhṳ̍t-to kîm-pû-ngit. Liá-sú kô ki chhai Ôi-kô Sû tî-poi.
[26] Yok-sî-â khì-thâ ke sṳ, pâu-hàm kì tui Song-chú chûng-sṳ̀n, tui fap-li̍t ke sun-fu̍k,
[27] lâu kì yit-sên-ngìn só-cho ke sṳ, chhiòn-phu ki chhai Yî-set-lie̍t lâu Yù-thai Lie̍t-vòng Sṳ́ tî-poi.