[1] Lò-pô-ôn kiên-ku chhṳ-kâ ke vòng-vi yî-heu, kì lâu Yî-set-lie̍t ngìn-mìn chhiu lì-khôi Song-chú ke fap-li̍t.
[2] Lò-pô-ôn chhai-vi ke thi-ńg ngièn, Song-chú yîn-vi kì-têu ke phoi-ngia̍k chit-fa̍t kì-têu.
[3] Âi-khi̍p-vòng Sṳ-sat tai-liâng yit-chhiên lióng-pak liòng chan-chhâ, liuk-van khì-pîn, lâu tô-to son m̀-chhut ke sṳ-pîn, pâu-hàm Li-pí-â-ngìn, Sû-kî-ngìn lâu Kú-sṳ̍t-ngìn ke kiûn-chhui, chhièn-lòi kûng-tá Yâ-lu-sat-lâng.
[4] Kì cham-liâng Yù-thai ke fòng-ví-sàng, pet-khiun Yâ-lu-sat-lâng.
[5] Siên-tî Sṳ-mâ-ngâ hi kien Lò-pô-ôn-vòng lâu Yù-thai ke-têu liâng-chhiu; ke-têu liâng-chhiu yîn-vi chéu-sám Sṳ-sat chhiòn-phu lòi-to Yâ-lu-sat-lâng. Sṳ-mâ-ngâ tui kì-têu kóng: “Song-chú yû fa lâu ngì-têu kóng: ‘Ngì-têu lì-khôi Ngài, só-yî liá-ha Ngài lì-khôi ngì-têu, chiông ngì-têu kâu chhai Sṳ-sat sú-chûng.’ ”
[6] Vòng lâu ke-têu liâng-chhiu chhiòn-phu sṳ̀n-ngin chhṳ-kâ fam-chhui; kì-têu kóng: “Song-chú só-cho ke he kûng-tong ke.”
[7] Song-chú khon-tó kì-têu khiâm-pî hâ-lòi, yu tui Sṳ-mâ-ngâ kóng: “Yîn-vi kì-têu sṳ̀n-ngin chhṳ-kâ ke chhui, Ngài m̀ fí-me̍t kì-têu. Chúng-he Sṳ-sat lòi kûng-tá ke sṳ̀, kì-têu tân-chhiang cho-tet pó-chhùn sin-miang thin-thin. Ngài m̀-voi ki-siu̍k tui Yâ-lu-sat-lâng thai fat-khién.
[8] Chúng-he Sṳ-sat oi chṳ̂n-fu̍k kì-têu, ke-sṳ̀ kì-têu chhiu voi tî, fu̍k-sṳ Ngài lâu fu̍k-sṳ sṳ-kiên ke thúng-chhṳ-chá yû má-ke fûn-phe̍t.”
[9] Âi-khi̍p-vòng Sṳ-sat kûng-ngi̍p Yâ-lu-sat-lâng, chiông Song-chú ke sṳn-thien lâu vòng-kiûng só-yû ke pó-vu̍t chhiòn-phu chhióng-chéu, pâu-hàm Só-lò-mùn chṳ-chho ke kîm tún-phài.
[10] Lò-pô-ôn-vòng vi-tó pú liá-têu kîm tún-phài chhiu chho thùng tún-phài, chiông kì-têu kâu-pûn khon-sú vòng-kiûng thai-mùn ke sú-ví-chóng kón-lî.
[11] Vòng tak-pái to sṳn-thien hi ke sṳ̀, sú-ví chhiu nâ-tén liá-têu tún-phài, sṳ-heu yu piong-chón sú-ví-sṳt.
[12] Yîn-vi Lò-pô-ôn khiâm-pî sun-chhiùng Song-chú, Song-chú chhiu sû-chón Kì ke nu-hi, mò chha̍t-tái sêu-me̍t kì; Yù-thai ke chhìn-hìn ya kha ôn-thin.
[13] Lò-pô-ôn chhai Yâ-lu-sat-lâng cho vòng, kâ-khiòng chhṳ-kâ ke sṳ-li̍t. Kì cho vòng ke sṳ̀ si-sṳ̍p yit-se, chhai Yâ-lu-sat-lâng thúng-chhṳ sṳ̍p-chhit ngièn. Yâ-lu-sat-lâng he Song-chú tui Yî-set-lie̍t chhiòn-thi sién chhut-lòi cho kin-pai Kì ke sàng. Lò-pô-ôn ke â-mê he Â-mùn-ngìn Nâ-mâ.
[14] Lò-pô-ôn cho sià-ok ke sṳ, yîn-vi kì m̀ chôn-sîm chhìm-khiù Song-chú ke chṳ́-yi.
[15] Yû-koân Lò-pô-ôn yit-sên-ngìn ke sṳ lâu kì ke kâ-phú chhiòn-phu ki chhai Siên-tî Sṳ-mâ-ngâ Sṳ́ lâu Siên-kien Yi̍t-tô Sṳ́ tî-poi. Lò-pô-ôn lâu Yâ-lò-pô-ôn chûng-kiên sòng-sòng yû chan-chên.
[16] Lò-pô-ôn sí-heu, chong chhai Thai-ví-sàng ke vòng-sṳt fùn-mu tú. Kì ke lai-é Â-pí-ngâ sṳ̀n-chiap kì cho vòng.