[1] Lò-pô-ôn yit-to Yâ-lu-sat-lâng chhiu seu-si̍p Yù-thai lâu Phien-ngâ-mén kî-chhu̍k chui yû-siu ke kiûn-chhui sṳ̍p-pat van-ngìn, oi hi kûng-tá Yî-set-lie̍t, chhióng-chón kì tui pet-phu kî-chhu̍k ke khúng-chṳ.
[2] Chúng-he Song-chú lâu sṳ̀n-ngìn Sṳ-mâ-ngâ kóng:
[3] “Ngì hi tui Só-lò-mùn ke lai-é Yù-thai-vòng Lò-pô-ôn lâu só-yû he̍t chhai Yù-thai, Phien-ngâ-mén thi-khî ke Yî-set-lie̍t-ngìn kóng:
[4] ‘Song-chú án-ngiòng kóng: M̀-hó hi kûng-tá ngì-têu ke hiûng-thi. Ngì-têu chhiòn-phu chón-hi! Liá-pái só fat-sên ke sṳ he chhut-yì Ngài.’ ” Kì-têu chhiu thâng-chhiùng Song-chú ke min-lin, mò hi kûng-tá Yâ-lò-pô-ôn.
[5] Lò-pô-ôn he̍t chhai Yâ-lu-sat-lâng; kì siû-lî Yù-thai lâu Phien-ngâ-mén ke sàng cho pó-fu.
[6] Liá-têu sàng yû: Pak-li-hèn, Yî-thán, Thì-kô-â,
[7] Pak-Siuk, Sô-kô, Â-thu-làn,
[8] Kâ-thi̍t, Mâ-li-sâ, Sî-fut,
[9] Â-tô-lòi-yîm, Lâ-kit, Â-sî-kâ,
[10] Só-lâ, Â-ngâ-lùn lâu Hî-pak-lùn.
[11] Kì vi liá-têu sàng cháng kiên-ku ke sàng-pó, vi tak-chho sàng phai chṳ́-fî-kôn, pin kiûng-kip liòng-sṳ̍t, kám-lám-yù lâu chiú.
[12] Kì ya vi tak-chho sàng chún-phi tún-phài lâu chhiông, sṳ́ kì-têu chhin kiên-ku. Án-ngiòng, Lò-pô-ôn khúng-chṳ Yù-thai lâu Phien-ngâ-mén.
[13] Yî-set-lie̍t chhiòn-thi ke chi-sṳ̂ lâu Li-vi-ngìn chhiòn-phu tui si-fông lòi kûi-sun Lò-pô-ôn.
[14] Li-vi-ngìn fit-thet kì-têu ke mu̍k-chhòng lâu khì-thâ thú-thi, sái-to Yù-thai lâu Yâ-lu-sat-lâng hi, yîn-vi Yî-set-lie̍t-vòng Yâ-lò-pô-ôn lâu kì ke ki-sṳ̀n chá khî-chhie̍t kì-têu, m̀-chún kì-têu cho Song-chú ke chi-sṳ̂.
[15] Yâ-lò-pô-ôn chṳ́-phai kì chhṳ-kâ ke ngìn cho chi-sṳ̂, chhai sân-kông ke sṳ̀n-meu sṳ-fung, pai sân-yòng-kúi lâu kì chhṳ-kâ chu-chho ke ngiù.
[16] Yî-set-lie̍t tak kî-chhu̍k só-yû sṳ̀n-sîm kin-pai Song-chú — Yî-set-lie̍t Song-ti ke ngìn-mìn chhiòn-phu thèn Li-vi-ngìn to Yâ-lu-sat-lâng hi, hien sên-ngì pûn Song-chú — kì-têu chú-siên ke Song-ti.
[17] Liá-khien sṳ kâ-khiòng Yù-thai-koet ke thi-vi, sâm-ngièn kiú, ngìn-mìn chṳ̂-chhṳ̀ Só-lò-mùn ke lai-é Lò-pô-ôn, yîn-vi kì-têu ke sên-fa̍t chhiong chhai Thai-ví-vòng lâu Só-lò-mùn-vòng thúng-chhṳ ke sṳ̀ khiung-yong.
[18] Lò-pô-ôn thó Mâ-ha̍p-lâ cho pû-ngiòng; Mâ-ha̍p-lâ ke â-pâ he Thai-ví ke lai-é Yâ-li-mô, â-mê he Yâ-sî ke sûn-ńg, Yî-li-ap ke moi-é Â-pí-hài.
[19] Kì-têu kiung sâm-ke lai-é — Yâ-vû-sṳ̂, Sṳ-mâ-li-ngâ, Sat-hón.
[20] Heu-lòi Lò-pô-ôn yu thó Ap-sâ-liùng ke moi-é Mâ-kâ; kì-têu kiung si-ke lai-é — Â-pí-ngâ, Â-thai, Se-sat, Sṳ-lò-me̍t.
[21] Lò-pô-ôn yit-khiung yû sṳ̍p-pat ke pû-ngiòng, liuk-sṳ̍p ke se-chiá, ngi-sṳ̍p pat-ke lai-é, lâu liuk-sṳ̍p ke moi-é. Chhai só-yû pû-ngiòng se-chiá chûng, Lò-pô-ôn chui-siak Ap-sâ-liùng ke moi-é Mâ-kâ,
[22] só-yî ya chui-siak Mâ-kâ ke lai-é Â-pí-ngâ, sióng-oi sat-li̍p kì ki-sṳ̀n vòng-vi.
[23] Lò-pô-ôn chhin chhûng-mìn, chiông chit-ngim pûn-pûn kì ke-têu lai-é, phai kì-têu chhai Yù-thai lâu Phien-ngâ-mén tak-ke fòng-ví-sàng. Kì kiûng-kip kì-têu só sî-yeu ke yit-chhiet, ya vi kì-têu thó chhin-tô pû-ngiòng se-chiá.