[1] Â-pí-ngâ-vòng sí-heu, chong chhai Thai-ví-sàng ke vòng-sṳt fùn-mu tú; kì ke lai-é Â-sat sṳ̀n-chiap kì cho vòng. Â-sat chhai-vi khì-kiên, koet-kâ yû sṳ̍p-ngièn thai-phìn.
[2] Â-sat hàng Song-chú — kì ke Song-ti khon-cho hó yu chṳn-chhṳ̍t ke sṳ.
[3] Kì chhù-thet ngoi-chhu̍k ngìn ke chi-thàn lâu sân-kông táng ke sṳ̀n-meu, tá-sui sa̍k-chhû, chám-thet Â-sa-lâ ńg-sṳ̀n ke chhû-siong.
[4] Kì min-lin Yù-thai-ngìn chhìm-khiù Song-chú — kì-têu chú-siên ke Song-ti, hàng Kì ke kau-hiun lâu kie-min.
[5] Â-sat-vòng chhù-thet só-yû Yù-thai sàng-chṳ́n ke sṳ̀n-meu lâu sêu-hiông ke chi-thàn. Só-yî, chhai kì thúng-chhṳ chṳ̂-ha Yù-thai-koet hióng-su thai-phìn.
[6] Liá-chham khì-kiên, kì chhai Yù-thai hí kí-chho fòng-ví-sàng, koet-kâ tô-ngièn mò chan-chên, yîn-vi Song-chú su-pûn kì thai-phìn.
[7] Kì tui Yù-thai ngìn-mìn kóng: “Ngài-têu oi hí sàng-chhiòng, sàng-lèu lâu cho-tet koân cho-tet chhôn ke sàng-mùn lòi kiên-ku ngài-têu ke sàng. Yîn-vi ngài-têu chûn-hàng Song-chú — ngài-têu Song-ti ke chṳ́-yi, liá thi-fông hàn-he su̍k ngài-têu. Kì yit-chhṳ̍t pó-fu ngài-têu, su-pûn ngài-têu si chû-vì phìn-ôn.” Só-yî kì-têu khôi-sṳ́ hí-chho, fàm-sṳ sun-li.
[8] Â-sat-vòng ke kiûn-chhui pâu-hàm sâm-sṳ̍p van chông-phi yû thai tún-phài lâu chhiông ke Yù-thai-ngìn, yu yû ngi-sṳ̍p pat-van chông-phi se tún-phài lâu kiûng-chien ke Phien-ngâ-mén-ngìn. Kì-têu chhiòn-phu he tông yúng-kám ke chan-sṳ.
[9] Kú-sṳ̍t-ngìn Chhia-lâ tai-liâng yit-pak van kiûn-chhui lâu sâm-pak liòng chan-chhâ chhîm-fam Yù-thai; kì-têu lòi-to Mâ-li-sâ.
[10] Â-sat chhut-hi siông-chhṳ̀. Sûng-fông chhai Mâ-li-sâ fu-khiun ke Sé-fap sân-lak pài-chhṳn.
[11] Â-sat hiong Song-chú — kì ke Song-ti khì-tó: “Song-chú â, chṳ́-yû Ngì chang nèn pông-chhu ngio̍k-séu ke kiûn-chhui, ya nèn pông-chhu khiòng-thai ke kiûn-chhui. Song-chú — ngài-têu ke Song-ti â, liá-ha khiù Ngì pông-chhu ngài-têu, yîn-vi ngài-têu vá-kho Ngì. Ngài-têu fung Ngì ke miàng chhut-lòi lâu liá khiòng-thai ke kiûn-chhui siông-chhṳ̀. Song-chú â, Ngì he ngài-têu ke Song-ti, m̀-hó pûn ngìn tá-yàng Ngì ô!”
[12] Â-sat lâu Yù-thai kiûn-chhui kûng-tá Kú-sṳ̍t kiûn-chhui ke sṳ̀, Song-chú tá-yàng Kú-sṳ̍t kiûn-chhui. Kì-têu chhiu thò-chéu;
[13] Â-sat tai-liâng kiûn-chhui hi kiuk, yit-chhṳ̍t kiuk-tó Kî-lâ-ngí. Kú-sṳ̍t kiûn-chhui chan-sí ke ngìn tông-tô, mò fap-thu chai siông-chhṳ̀; kì-têu pûn Song-chú lâu Kì ke kiûn-chhui tá-sû; Yù-thai kiûn-chhui chhióng-chéu chhin-tô chan-li-phín;
[14] kì-têu fí-me̍t Kî-lâ-ngí chû-vì ke sàng-chṳ́n, yîn-vi ke-vi ke ngìn-mìn chhiòn-phu tông-kiâng Song-chú. Yù-thai kiûn-chhui chhin-se chhióng ke-têu sàng-chṳ́n, chhióng-tó tông-tô ke chan-li-phín.
[15] Kì-têu ya kûng-kit mu̍k-chhòng, chhióng-chéu chhin-tô yòng-khiùn lâu lo̍k-thò, yèn-heu chón-hi Yâ-lu-sat-lâng.