[1] Thai-ví ke lai-é Só-lò-mùn kiên-ku kì tui Yî-set-lie̍t-koet ke thúng-chhṳ. Song-chú — kì ke Song-ti lâu kì thùng-chhai, sṳ́ kì fî-sòng khiòng-sṳn.
[2] Só-lò-mùn min-lin Yî-set-lie̍t só-yû chṳ́-fî chhiên-sà lâu pak-sà ke kiûn-kôn, chṳn-fú kôn-yèn, kâ-chhu̍k chhu̍k-chóng, lâu só-yû ngìn-mìn,
[3] chhiòn-phu lâu kì khiung-ha hi-to Kî-phiên kin-pai ke só-chhai, yîn-vi chhai ke-vi yû Song-ti lìm-to ke sṳn-chong-phùng; liá sṳn-chong-phùng he Song-chú ke phu̍k-ngìn Mô-sî chhai khóng-yâ chho ke.
[4] (Song-ti ke yok-khui yí-kîn chhai Yâ-lu-sat-lâng; Thai-ví tui Kî-lie̍t-Yâ-lìm chiông kì chhiáng-lòi ke sṳ̀, vi kì hí yit-chho sṳn-chong-phùng.)
[5] Fu-ngí ke sûn-é, Vû-li ke lai-é Pí-sat-lie̍t só-chho ke thùng chi-thàn ya chhai Kî-phiên, chhai Song-chú sṳn-chong-phùng ke thèu-chhièn. Só-lò-mùn lâu só-yû ngìn-mìn chhai ke-vi khiù-mun Song-chú.
[6] Só-lò-mùn chhai sṳn-chong-phùng thèu-chhièn kin-pai Song-chú, chhai thùng chi-thàn táng hien yit-chhiên chak thèu-sâng cho sêu-fa-chi.
[7] Ke am-pû, Song-ti hiong Só-lò-mùn hién-hien, mun kì: “Ngì oi khiù Ngài su-pûn ngì má-ke?”
[8] Só-lò-mùn en Song-ti kóng: “Ngì yit-chhṳ̍t yung ví-thai ke chhṳ̀-oi khoán-thai ngâ-pâ Thai-ví, liá-ha yu sṳ́ ngài sṳ̀n-chiap kì cho vòng.
[9] Chú Song-ti â, khiù Ngì sṳ̍t-hien Ngì tui ngâ-pâ Thai-ví só yin-hí ke fa. Ngì sat-li̍p ngài cho ngìn-mìn ke vòng, kì-têu chhiong thi-song ke nài-sâ án-tô,
[10] khiù Ngì su-pûn ngài chhûng-mìn chṳ-fi, hó pûn ngài chhṳ-lî kì-têu; na-mò, ngài ngióng-pân yû phan-fap thúng-chhṳ Ngì án-tô ke ngìn-mìn?”
[11] Song-ti en Só-lò-mùn kóng: “Liá he ngì ke sîm-ngien. Ngì mò khiù fu-kui, chhòi-pó, miàng-sâng, ya mò khiù sêu-me̍t thi̍t-ngìn, ya mò vi chhṳ-kâ khiù chhòng-su, chṳ́-yû khì-khiù chhûng-mìn chṳ-fi, sṳ́ ngì yû phan-fap thúng-chhṳ Ngài ke chṳ́-mìn, chhiu-he Ngài sat-li̍p ngì cho vòng thúng-chhṳ ke ngìn-mìn;
[12] só-yî, Ngài oi su-pûn ngì chhûng-mìn chṳ-fi. Nang-ngoi, Ngài ya oi kâ-thiâm ngì ke chhòi-pó, fu-kui, miàng-sâng, chhêu-ko yî-chhièn só-yû ke kiûn-vòng, yî-heu ya mò yit-ke vòng yàng-ko ngì.”
[13] Só-yî, Só-lò-mùn lì-khôi Kî-phiên kin-pai ke só-chhai, tui Song-chú sṳn-chong-phùng mien-chhièn chón-to Yâ-lu-sat-lâng, chhai ke-vi chhṳ-lî Yî-set-lie̍t.
[14] Só-lò-mùn kien-li̍p yit-chhui yû yit-chhiên si-pak liòng chan-chhâ lâu yit-van lióng-chhiên chak chan-mâ ke khì-pîn-chhui. Kì chiông yit phu-fun ôn-phài to Yâ-lu-sat-lâng, khì-thâ ke fûn-chu to tak-ke sàng-sṳ.
[15] Chhai kì thúng-chhṳ khì-kiên, Yâ-lu-sat-lâng ke kîm-ngiùn chhiong sa̍k-thèu án-tô, hiông-pak-su ya chhiong kô-ngièn ke sông-é-su án phû-phiên.
[16] Só-lò-mùn ke sên-lî ngìn tui Mu-chṳ̂-lì lâu Kî-li-kâ chin-khiéu mâ-é,
[17] ya tui Âi-khi̍p chin-khiéu chan-chhâ. Kì-têu chiông mâ-é lâu chan-chhâ chón-mai pûn Het-ngìn ke vòng lâu Si-li-â-ngìn ke vòng: Chan-chhâ yit-liòng liuk-pak chak ngiùn-pi; mâ-é yit-chak yit-pak ńg-sṳ̍p chak ngiùn-pi.