[1] To thi-chhit ngièn, chi-sṳ̂ Yâ-hò-yâ-thai ngin-vì yin-kôi khó-yî hàng-thung lé. Kì lâu ńg-ke kiûn-kôn kiet-mèn; liá ńg-ke ngìn he Yâ-lò-hón ke lai-é Â-sat-li-ngâ, Yok-ha̍p-nàn ke lai-é Yî-sṳ̍t-mâ-li, Ngò-phi-tet ke lai-é Â-sat-li-ngâ, Â-thai-ngâ ke lai-é Mâ-sî-ngâ, Se-kî-li ke lai-é Yî-li-sâ-fap.
[2] Kì-têu hàng-theu Yù-thai tak-sàng, seu-si̍p Li-vi-ngìn lâu tak chûng-chhu̍k chhu̍k-chóng lòi Yâ-lu-sat-lâng.
[3] Kì-têu chhai Song-ti ke sṳn-thien tú chhi-si̍p, lâu vòng ke lai-é Yok-â-sṳ̂ li̍p-yok. Yâ-hò-yâ-thai tui kì-têu kóng: “Liá he siên-vòng ke lai-é. Liá-ha kì yin-kôi cho vòng, cheu Song-chú yin-hí pûn Thai-ví-vòng heu-thoi ke fa.
[4] Ngì-têu oi án-ngiòng cho: Ôn-sit-ngit, chi-sṳ̂ lâu Li-vi-ngìn tông-pân ke sṳ̀, tông-chûng sâm-fûn chṳ̂-yit ke ngìn oi khon-sú sṳn-thien ke mùn,
[5] sâm-fûn chṳ̂-yit ke ngìn oi khon-sú vòng-kiûng, sâm-fûn chṳ̂-yit ke ngìn oi khon-sú Kîn-kî-mùn; só-yû ke ngìn-mìn oi si̍p-ha̍p chhai Song-chú sṳn-thien ke yen-nui.
[6] Chi-sṳ̂ lâu tông-pân ke Li-vi-ngìn yî-ngoi, má-ngìn tû cho-m̀-tet ngi̍p Song-chú ke sṳn-thien. Yîn-vi chi-sṳ̂ lâu Li-vi-ngìn he kûi-su̍k Song-chú ke, cho-tet ngi̍p-hi; khì-thâ ke ngìn-mìn yit-thin oi chûn-sú Song-chú ke kûi-thin liù chhai ngoi-poi.
[7] Li-vi-ngìn oi chhai vòng ke chû-vì khià vú-hi pó-fu vòng; vòng hàng-to nai-vi chhiu thèn-to nai-vi. Má-ngìn ngi̍p-hi sṳn-thien chhiu chiông kì chhṳ̀-thet.”
[8] Li-vi-ngìn lâu Yù-thai ke ngìn-mìn chhiòn-phu cheu chi-sṳ̂ Yâ-hò-yâ-thai ke chṳ́-sṳ cho. Ôn-sit-ngit mò tông-pân ke ngìn ya oi chhṳ̍t-pân; só-yî, mò-lun tông-pân ya-he mò tông-pân ke, tak-ke kôn-chóng chhiòn-phu phai chhut-lòi.
[9] Chi-sṳ̂ Yâ-hò-yâ-thai chiông yî-chhièn piong chhai sṳn-thien tú Thai-ví-vòng ke-têu chhiông lâu tún-phài kâu-pûn kiûn-kôn,
[10] phai mìn-chung nâ-tén vú-hi khî chhai sṳn-thien thèu-chhièn, tui nàm-phién to pet-phién, chhai chi-thàn lâu sṳn-thien ke-vi, oi chhai vòng-chṳ́ si chû-vì pó-fu kì.
[11] Yèn-heu, Yâ-hò-yâ-thai lâu kì ke-têu lai-é tai vòng-chṳ́ Yok-â-sṳ̂ chhut-lòi, chiông vòng-kon tai chhai kì ke thèu-nà táng, chiông yit-pún yû-koân vòng-khièn thiàu-khoán ke Fap-li̍t-sû kâu-pûn kì, li̍p kì cho vòng. Kì-têu kò-yù sat-li̍p Yok-â-sṳ̂; mìn-chung chhiòn-phu thai-sâng hêm: “Ngien vòng van-soi!”
[12] Â-thâ-li-ngâ thai-heu thâng-tó mìn-chung chéu-tén tui vòng fôn-hí chhin-sê ke sâng, kiak-kiak to khiùn-chung chhi-si̍p ke sṳn-thien hi.
[13] Kì khon-tó sîn-vòng cheu ngì-sṳt khî chhai sṳn-thien ngi̍p-héu ke chhû-é sùn-thèu, ke-têu kiûn-kôn lâu phùn la̍p-pá ke vì-tén kì. Mìn-chung chhiòn-phu fôn-hí to thai-sâng sê, chhin-phùn la̍p-pá; sṳn-thien kô-sú thàn-cheu ngo̍k-hi, tai-liâng ngìn kô-chhong chan-mî. Â-thâ-li-ngâ chhá-lan sâm, hêm-kóng: “Chho-fán lé! Chho-fán lé!”
[14] Chi-sṳ̂ Yâ-hò-yâ-thai mò-oi Â-thâ-li-ngâ chhai Song-chú ke sṳn-thien ke-vi pûn-ngìn chhṳ̀-sí, fûn-fu ke-têu kiûn-kôn kóng: “Chiông kì tui sú-ví tông-chûng tai chhut-hi; kám kiu kì ke, khiung-yong oi pûn kì sí.”
[15] Só-yî, kì-têu chok-tén Â-thâ-li-ngâ, chiông kì tai-to vòng-kiûng, chhai Mâ-mùn ke só-chhai chiông kì chhṳ̀-thet.
[16] Chi-sṳ̂ Yâ-hò-yâ-thai lâu ngìn-mìn pin Yok-â-sṳ̂-vòng li̍p-yok, chhiòn-phu oi cho Song-chú ke chṳ́-mìn.
[17] Só-yî thai-kâ hi Pâ-li̍t-meu, chiông meu chhak-thet, khau-thet chi-thàn lâu ngiéu-siong, yu chhai chi-thàn thèu-chhièn chhṳ̀-thet Pâ-li̍t ke chi-sṳ̂ Mâ-thán.
[18] Yâ-hò-yâ-thai phai chi-sṳ̂ lâu Li-vi-ngìn fu-chit Song-chú sṳn-thien ke kûng-chok. Kì-têu oi chṳp-hàng Thai-ví só chṳ́-thin ke ngim-vu, chhiu-he cheu Mô-sî ke fap-li̍t hiong Song-chú hien sêu-fa-chi, pin cheu Thai-ví só thin ke fu-chit yîm-ngo̍k lâu khin-tién.
[19] Yâ-hò-yâ-thai ya phai sú-ví chhai Song-chú sṳn-thien ke tak mùn-héu khon-sú, m̀-chún lî-ngì song mò chhiang-li ke ngìn ngi̍p-hi.
[20] Yâ-hò-yâ-thai tai-liâng só-yû kiûn-kôn, kui-chhu̍k, mìn-kiên liâng-chhiu, lâu khì-thâ ke ngìn-mìn, fu-sung vòng tui sṳn-thien to vòng-kiûng; kì-têu tui thai-mùn ngi̍p-hi; vòng chhô-sông pó-chho.
[21] Chhiòn-koet ngìn-mìn fôn-hí khoai-lo̍k, sàng-tú ya tông phìn-chhin, yîn-vi ke-sṳ̀ Â-thâ-li-ngâ yí-kîn pûn-ngìn chhṳ̀-sí.