[1] Yok-sâ-fap sṳ̀n-chiap kiâ-pâ Â-sat cho vòng; kì kiên-khiòng tá-piang, tui-khong Yî-set-lie̍t.
[2] Kì chiông kiûn-chhui ôn-yàng chhai Yù-thai ke-têu fòng-ví-sàng lâu hiông-chhûn, pin kiâ-pâ Â-sat chhai Yî-fap-lièn kin-nui cham-liâng ke ke-têu sàng.
[3] Song-chú lâu Yok-sâ-fap khiung-ha; yîn-vi kì ho̍k kiâ chú-siên Thai-ví chó-khì ke mù-fam, mò pai Pâ-li̍t.
[4] Kì sṳ-fung kiâ-pâ ke Song-ti, chûn-hàng Song-ti ke min-lin, mò cho Yî-set-lie̍t ke-têu vòng só-cho ke sṳ.
[5] Song-chú sṳ́ Yok-sâ-fap chhai Yù-thai-koet ke thúng-chhṳ kiên-ku; Yù-thai ngìn-mìn hiong kì hien lî-vu̍t, só-yî kì fî-sòng hó-ngiak, yu tông su-ngìn chûn-kin.
[6] Kì khon sṳ-fung Song-chú cho kông-yùng, yu fi-thet chhai Yù-thai só-yû sân-kông táng ke sṳ̀n-meu, lâu Â-sa-lâ ńg-sṳ̀n ke chhû-siong.
[7] Kì chhai-vi ke thi-sâm ngièn, phai kôn-chóng Phien-Het-yî-le̍t, Ngò-pâ-tí, Sat-kâ-li-ngâ, Nâ-thán-ngia̍p lâu Mí-kâi-â to Yù-thai tak-sàng kau-thô ngìn-mìn.
[8] Lâu kì-têu khiung-ha hi ke yû: Sṳ-mâ-ngâ, Nì-tham-ngâ, Sî-pâ-thi-ngâ, Â-sat-het, Sṳ-mí-lâ-ma̍t, Yok-nâ-tân, Â-tô-nì-ngâ, Tô-pí-ngâ, Thò-pâ-tô-nì-ngâ kiú-ke Li-vi-ngìn, yî-khi̍p Yî-li-sâ-mâ lâu Yok-làn lióng-ke chi-sṳ̂.
[9] Kì-têu tai-tén Song-chú ke Fap-li̍t-sû, hàng-theu Yù-thai tak hiông-chṳ́n, kau-thô ngìn-mìn.
[10] Song-chú sṳ́ Yù-thai si chû-vì lìn-koet chhiòn-phu m̀-kám lâu Yok-sâ-fap siông-chhṳ̀.
[11] Yû-têu Fî-li-sṳ-ngìn hiong Yok-sâ-fap chin-kung tông-tô ke ngiùn-è lâu khì-thâ lî-vu̍t; yû-têu Â-lâ-pak-ngìn sung-pûn kì chhit-chhiên chhit-pak chak mièn-yòng-kú lâu chhit-chhiên chhit-pak chak sân-yòng-kú.
[12] Só-yî Yok-sâ-fap ye̍t-lòi ye̍t khiòng-sṳn. Kì chhai Yù-thai tak só-chhai kien-chuk fòng-ví-sàng lâu sàng-chṳ́n,
[13] tún tông-tô ke fo-vu̍t. Kì phai yúng-kám ke chan-sṳ khon-sú Yâ-lu-sat-lâng,
[14] cheu kì-têu só-su̍k ke chûng-chhu̍k fûn-phai. Ap-nâ he Yù-thai-chhu̍k kiûn-chhui ke chṳ́-fî-kôn, sú-hâ yû sâm-sṳ̍p van kiûn-chhui.
[15] Fu chṳ́-fî-kôn he Yok-ha̍p-nàn, sú-hâ yû ngi-sṳ̍p pat-van kiûn-chhui.
[16] Chai-lòi he Se-kî-li ke lai-é Â-mâ-sṳ̂-ngâ, sú-hâ yû ngi-sṳ̍p van kiûn-chhui. (Â-mâ-sṳ̂-ngâ he chhṳ-ngien lòi sṳ-fung Song-chú ke.)
[17] Phien-ngâ-mén-chhu̍k kiûn-chhui ke chṳ́-fî-kôn he Yî-li-ngâ-thai; kì he yit-ke yúng-kám ke chan-sṳ, chṳ́-fî ngi-sṳ̍p van nâ tún-phài lâu kiûng-chien ke kiûn-chhui.
[18] Fu chṳ́-fî-kôn he Yok-sat-pha̍t, tai-liâng sṳ̍p-pat van chông-phi chîn-liòng, sùi-sṳ̀ cho-tet siông-chhṳ̀ ke kiûn-chhui.
[19] Liá-têu ngìn chhiòn-phu chhai Yâ-lu-sat-lâng fu̍k-sṳ vòng. Chhù liá yî-ngoi, vòng ya phai kiûn-chhui khon-sú Yù-thai khì-thâ ke fòng-ví-sàng.