[1] Yok-sî-â pat-se ke sṳ̀ cho Yù-thai-vòng, chhai Yâ-lu-sat-lâng thúng-chhṳ sâm-sṳ̍p yit-ngièn.
[2] Kì hàng Song-chú khon-cho chho̍k ke sṳ, hàng kiâ chú-siên Thai-ví-vòng ke lu, mò phiên-chó, mò phiên-yu.
[3] Yok-sî-â cho vòng ke thi-pat ngièn, kì hàn tông heu-sâng chhiu khôi-sṳ́ kin-pai kiâ chú-siên Thai-ví-vòng ke Song-ti. Si-ngièn heu, kì khôi-sṳ́ kiet-chhiang Yù-thai lâu Yâ-lu-sat-lâng, fi-thet sân-táng ke sṳ̀n-meu, Â-sa-lâ ńg-sṳ̀n chhû-siong, lâu só-yû khì-thâ ngiéu-siong.
[4] Kì ke kôn-yèn chhai kì liâng-thô chṳ̂-ha chhak-thet pai Pâ-li̍t ke chi-thàn, chám-thôn fu-khiun ke hiông-thàn. Kì-têu chiông Â-sa-lâ ńg-sṳ̀n chhû-siong lâu só-yû khì-thâ ngiéu-siong chhiòn-phu khau-sui, chhùi cho fún, yèn-heu ve chhai ke-têu hien-chi pûn ngiéu-siong ke ngìn ke fùn-mu táng.
[5] Kì chiông yi-kau chi-sṳ̂ ke kut-thèu piong chhai kì-têu pai ke chi-thàn táng sêu-thet. Án-ngiòng, kì kiet-chhiang Yù-thai lâu Yâ-lu-sat-lâng.
[6] Kì yu to Mâ-nâ-sî, Yî-fap-lièn, Sî-mién, chhṳ̍t-to pet-phién ke Nâ-fut-thâ-li kok sàng-chṳ́n lâu kì-têu si chû-vì su pho-fái ko ke só-chhai ya cheu án-ngiòng cho.
[7] Kì chiông pet-koet Yî-set-lie̍t chhiòn-thi ke chi-thàn, Â-sa-lâ ńg-sṳ̀n chhû-siong, lâu khì-thâ ngiéu-siong chhiòn-phu chhak-thet, chhùi cho fún, yu chiông só-yû hiông-thàn khau-sui, yèn-heu to-chón Yâ-lu-sat-lâng.
[8] Yok-sî-â-vòng chhai-vi ke thi sṳ̍p-pat ngièn, kiet-chhiang koet-thú, chhai sṳn-thien fi-thet yi-kau chhùng-pai yî-heu, kì phai sâm-ke ngìn hi cháng Song-chú — kì Song-ti ke sṳn-thien. Liá sâm-ke ngìn he: Â-sat-li-ngâ ke lai-é Sâ-fân, Yâ-lu-sat-lâng sṳ-chóng Mâ-sî-ngâ, lâu Yok-ha̍p-sṳ̂ ke lai-é li̍t-sṳ́-kôn Yok-â.
[9] Kì-têu hi kien thai-chi-sṳ̂ Hî-le̍t-kâ, chiông sṳn-thien sû-si̍p ke chhièn kâu-pûn kì. (Liá-chhièn he sú-ví thien-mùn ke Li-vi-ngìn tui Mâ-nâ-sî, Yî-fap-lièn lâu pet-koet Yî-set-lie̍t chhûn hâ-lòi ke ngìn sû-lòi ke; ya yû tui chhiòn Yù-thai, Phien-ngâ-mén lâu Yâ-lu-sat-lâng ngìn-mìn sû-lòi ke.)
[10] Kì-têu chiông liá-chhièn chón-pûn fu-chit cháng Song-chú sṳn-thien ke ngìn; kì-têu yu chiông chhièn kâu-pûn
[11] muk-siong lâu kien-chuk kûng-ngìn hi mâi sa̍k-chhòi, muk-chhòi lòi cháng sṳn-thien sún-fái ke só-chhai, chhiu-he Yù-thai ke-têu vòng mò cheu-ku hó chṳ-to sún-fái ke.
[12] Cho liá kûng-chok ke ngìn chhiòn-phu tông chûng-sṳ̀n; si-ke kam-kûng ke Li-vi-ngìn he: Mí-lâ-li chûng-chhu̍k ke Ngâ-ha̍p lâu Ngò-pâ-tí, Kô-hot chûng-chhu̍k ke Sat-kâ-li-â lâu Mí-sû-làn. Hàn-yû Li-vi-ngìn chhiòn-phu he yû-siu ke yîm-ngo̍k kâ,
[13] kì-têu yu fu-chit kam-tuk pân-yun chhòi-liau lâu tak-chúng kûng-chhàng; ya yû Li-vi-ngìn pó-kón ki-liu̍k ya-he cho sú-ví.
[14] Kì-têu tui sṳn-thien chhông-khu nâ chhièn chhut-lòi ke sṳ̀, thai-chi-sṳ̂ Hî-le̍t-kâ fat-hien Song-chú ke Fap-li̍t-sû, chhiu-he Song-ti kâu-pûn Mô-sî ke Fap-li̍t-sû.
[15] Hî-le̍t-kâ tui vòng-sṳt sû-ki Sâ-fân kóng: “Ngài chhai Song-chú ke sṳn-thien tú fat-hien Fap-li̍t-sû.” Hî-le̍t-kâ chiông sû kâu-pûn Sâ-fân,
[16] Sâ-fân chiông sû tai-to vòng ke-vi, hiong vòng po-ko kóng: “Ngì min-lin ngài-têu ke yí-kîn phan-hó lé.
[17] Ngài-têu yí-kîn chiông sṳn-thien tú ke chhièn kâu-pûn kam-kûng lâu kûng-ngìn.”
[18] Sû-ki Sâ-fân yu tui vòng kóng: “Chi-sṳ̂ Hî-le̍t-kâ nâ yit-kién sû pûn ngài.” Sâ-fân chhiu chhai vòng mien-chhièn thai-sâng thu̍k.
[19] Vòng thâng-tó Fap-li̍t-sû ke fa chhiu chhá-lan sâm,
[20] fûn-fu Hî-le̍t-kâ, Sâ-fân ke lai-é Â-hî-kâm, Mí-kâi-â ke lai-é Â-pí-tun, vòng-sṳt sû-ki Sâ-fân, lâu vòng ke phu̍k-ngìn Â-sat-ngâ, kóng:
[21] “Ngì-têu hi vi ngài lâu hàn liù chhai Yî-set-lie̍t pin Yù-thai ke ngìn-mìn khiù-mun Song-chú, to-tái liá-kién sû ke kau-hiun he má-ke. Song-chú hiong ngài-têu thai fat-khién he yîn-vi ngài-têu ke chú-siên mò thâng-chhiùng Song-chú ke fa, mò cheu liá-sû só ki-chai ke hi-cho.”
[22] Só-yî, Hî-le̍t-kâ lâu khì-thâ kí-ke ngìn fung vòng ke min-lin hi khiù-mun yit-ke miàng-ham Fu-le̍t-thai ke ńg siên-tî. Ńg siên-tî he̍t chhai Yâ-lu-sat-lâng ke thi-ngi khî. (Kiâ ló-kûng Sâ-liùng he Thi̍t-ngá ke lai-é, Ha̍p-ngí-ha̍p-sṳ̂ ke sûn-é, tâm-ngim chú-kón sṳn-thien lî-fu̍k ke chṳt-vu.) Kì-têu hiong kì kóng-hí só fat-sên ke sṳ.
[23] Kì ham kì-têu chón-hi tui vòng kóng: “Song-chú — Yî-set-lie̍t ke Song-ti án-ngiòng kóng:
[24] ‘Ngài oi cheu Yù-thai-vòng só thâng-tó ke-pún sû só-siá ke chu-chú, kong châi-fo pûn Yâ-lu-sat-lâng lâu liá-vi só-yû ke ngìn-mìn.
[25] Kì-têu lì-khôi Ngài, hiong phe̍t ke sṳ̀n-mìn sêu-hiông, yung kì-têu ke sú só-chho ke ngiéu-siong ngiâ Ngài su-hi, só-yî Ngài oi hiong Yâ-lu-sat-lâng thai fat-khién mò so̍t.’
[26] Yû-koân Yù-thai-vòng pún-ngìn, ngì-têu oi án-ngiòng lâu kì kóng: ‘Song-chú — Yî-set-lie̍t ke Song-ti án-ngiòng kóng: Ngì yit thâng-tó ke-pún sû só-siá ke,
[27] chhiu chhai Ngài mien-chhièn khiâm-pî fí-kói. Ngì yit thâng-tó Ngài kín-ko oi chit-fa̍t Yâ-lu-sat-lâng lâu kì ke ngìn-mìn, chhiu chhá-lan sâm, chhai Ngài mien-chhièn liù muk-chṳp fí-kói, Ngài chhiu thâng ngì ke khì-tó.
[28] Ngài yit-thin voi sṳ́ ngì phìn-phìn ôn-ôn sṳ̍t-to ló, chong chhai ngì lie̍t-chú ke fùn-mu ke-vi; ngì hàn chhai sṳ-kiên ke sṳ̀, m̀-voi khon-tó Ngài kong châi-nan pûn liá thi-fông lâu kì ke ngìn-mìn.’ ” Kì-têu chhiu chiông liá sêu-sit tai chón-hi lâu vòng kóng.
[29] Yok-sî-â-vòng phai-ngìn seu-si̍p Yù-thai lâu Yâ-lu-sat-lâng só-yû ke liâng-chhiu.
[30] Vòng lâu Yù-thai chung-ngìn, he̍t chhai Yâ-lu-sat-lâng ke ngìn, hàn-yû chi-sṳ̂, Li-vi-ngìn, lâu só-yû ke ngìn-mìn, mò-lun phìn-fu, ya chhiòn-phu khiung-ha to Song-chú ke sṳn-thien hi. Vòng chhiu chiông ke chhai sṳn-thien tú fat-hien ke yok-sû chhiòn-phu thu̍k pûn kì-têu thâng.
[31] Vòng khî chhai thai-chhû sùn-thèu, hiong Song-chú li̍p-yok, oi thâng-chhiùng Song-chú, yit-sîm yit-yi chûn-sú Kì ke fap-li̍t kie-min, pin sṳ̍t-hàng yok-sû song só kûi-thin ke min-lin.
[32] Kì sṳ́ Phien-ngâ-mén-ngìn lâu só-yû chhai Yâ-lu-sat-lâng ke ngìn tap-yin oi chûn-sú liá-yok. Só-yî Yâ-lu-sat-lâng ngìn-mìn chûn-hàng kì-têu lâu kì-têu chú-siên ke Song-ti só-li̍p ke yok.
[33] Yok-sî-â-vòng chiông Yî-set-lie̍t-ngìn koet-nui só-yû sià-ok ke ngiéu-siong chhiòn-phu chhù-thet, ham Yî-set-lie̍t kin-nui só-yû ke ngìn chhiòn-phu sṳ-fung Song-chú — kì-têu ke Song-ti. Yok-sî-â hàn-sâng ke sṳ̀, kì-têu yit-chhṳ̍t mò lì-khôi Song-chú — kì-têu chú-siên ke Song-ti.