[1] Yok-sâ-fap sí-heu, chong chhai Thai-ví-sàng ke vòng-sṳt fùn-mu tú. Kiâ lai-é Yok-hò-làn sṳ̀n-chiap kì cho vòng.
[2] Yù-thai-vòng Yok-sâ-fap ke lai-é Yok-hò-làn yû liuk-ke hiûng-thi; kì-têu ke miàng he: Â-sat-li-ngâ, Yâ-hiet, Sat-kâ-li-ngâ, Â-sat-lie̍t-fû, Mí-kâ-le̍t, Sṳ-fap-thì-ngâ.
[3] Kì-têu ke â-pâ pûn kì-têu tông-tô kîm-ngiùn lâu khì-thâ ta̍t-chhièn ke tûng-sî, phai kì-têu kón-lî Yù-thai ke fòng-ví-sàng. Yîn-vi Yok-hò-làn he chóng-chṳ́, Yok-sâ-fap li̍p kì cho thai-chṳ́.
[4] Yok-hò-làn kiên-ku chhṳ-kâ ke vòng-vi heu, chiông ke-têu ló-thâi chhiòn-phu chhṳ̀-thet, ya chhṳ̀-thet hó-tô Yî-set-lie̍t ke kôn-yèn.
[5] Yok-hò-làn sâm-sṳ̍p ngi-se ke sṳ̀ cho vòng, chhai Yâ-lu-sat-lâng thúng-chhṳ pat-ngièn.
[6] Kì thó Â-ha̍p ke moi-é cho pû-ngiòng, só-yî kì chhiu chhiong Â-ha̍p vuk-hâ ke ngìn khiung-yong, cho Yî-set-lie̍t ke-têu vòng só-cho, Song-chú khon-cho sià-ok ke sṳ.
[7] Chúng-he Song-chú m̀-hén me̍t Thai-ví ke vòng-chhèu; yîn-vi Kì sṳt lâu Thai-ví li̍p-yok, tap-yin kì, kóng kì ke chṳ́-sûn oi yún-yén yû-ngìn cho vòng.
[8] Yok-hò-làn chhai-vi khì-kiên, Yî-tûng chho-fán, tui Yù-thai thu̍k-li̍p chhut-hi, chhṳ-kâ sat-li̍p vòng.
[9] Só-yî Yok-hò-làn tai-liâng kiûn-chhui, chan-chhâ hi kûng-tá Yî-tûng-ngìn, fán-chón sa pûn kì-têu pâu-vì, to am-pû-sṳ̀ chang thò-chéu.
[10] Án-ngiòng, tui ke-ngit yî-heu, Yî-tûng chhiu tui Yù-thai thu̍k-li̍p chhut-hi. Chhai liá khì-kiên, Li̍p-nâ-sàng ya chho-fán, yîn-vi Yok-hò-làn lì-khôi Song-chú — kiâ chú-siên ke Song-ti.
[11] Kì sṳm-chṳ chhai Yù-thai ke sân-kông táng hí sṳ̀n-meu, hoi Yù-thai lâu Yâ-lu-sat-lâng ke ngìn-mìn fam yìm-lon tet-chhui Song-chú.
[12] Siên-tî Yî-li-â siá sin-é pûn Yok-hò-làn kóng: “Song-chú — ngiâ chú-siên Thai-ví ke Song-ti chit-phi ngì; yîn-vi ngì mò ho̍k ngiâ-pâ Yok-sâ-fap lâu ngiâ-kûng Yù-thai-vòng Â-sat ke hó mù-yong,
[13] fán-chón hi ho̍k Yî-set-lie̍t ke-têu vòng ke fái-yong, tai-liâng Yù-thai lâu Yâ-lu-sat-lâng ke ngìn-mìn hàng yìm-lon phoi-ngia̍k Song-ti, chhiong Â-ha̍p lâu kì ke ki-sṳ̀n-ngìn khiung-yong tai-liâng Yî-set-lie̍t-ngìn phoi-ngia̍k Song-ti. Ngì sṳm-chṳ chhṳ̀-thet ke-têu ló-thâi, sṳ̍t-chhai kì-têu pí ngì kha-hó.
[14] Só-yî, Song-chú oi ngiàm-ngiàm chit-fa̍t ngì ke ngìn-mìn, ngì ke chṳ́-ńg, lâu pû-ngiòng, se-chiá, yu fí-fái ngì yit-chhiet ke chhòi-vu̍t.
[15] Ngì pún-ngìn voi pot yit-chúng ngiàm-chhung ke chhòng-è phiang, yit-ngit pí yit-ngit li-hoi, chhṳ̍t-to chhòng-è lau hâ-lòi.”
[16] Yû-têu Fî-li-sṳ-ngìn lâu he̍t chhai Kú-sṳ̍t piên-sùn ke Â-lâ-pak-ngìn; Song-chú sṳ́ kì-têu lòi kûng-tá Yok-hò-làn.
[17] Kì-têu kûng-ngi̍p Yù-thai, fong-se chhióng vòng-kiûng, chiông vòng ke pû-ngiòng, se-chiá lâu ke-têu lai-é chhiòn-phu chok-hi, chṳ́-yû chhûn-tó kì ke mân-chṳ́ Â-ha̍p-chhia.
[18] Liá-têu sṳ yî-heu, Song-chú sṳ́ vòng pot yit-chúng ngiàm-chhung ke chhòng-è phiang;
[19] liá-chúng phiang thai-yok thô lióng-ngièn kiú, yit-ngit pí yit-ngit kha ngiàm-chhung, chhòng-è lau hâ-lòi, chui-mî thung-khú to sí. Kì ke ngìn-mìn pin-mò vi kì hàng sêu-fó lî, mò chhiong ngìn-mìn tui kiâ chú-siên só-cho ke án-ngiòng.
[20] Yok-hò-làn sâm-sṳ̍p ngi-se cho vòng, chhai Yâ-lu-sat-lâng thúng-chhṳ pat-ngièn. Kì sí ke sṳ̀ mò ngìn sṳ̂-ngiam kì. Kì-têu chiông kì chong chhai Thai-ví-sàng, chúng-he mò chong chhai vòng-sṳt ke fùn-mu tú.