[1] Â-lâ-pak-ngìn ke thu̍t-kit-chhui sṳt chiông Yù-thai-vòng Yok-hò-làn só-yû ke lai-é chhiòn-phu chhṳ̀-thet, chṳ́-yû chhûn-tó mân-chṳ́ Â-ha̍p-chhia. Só-yî, Yâ-lu-sat-lâng ngìn-mìn li̍p Â-ha̍p-chhia sṳ̀n-chiap kiâ-pâ ke vòng-vi.
[2] Â-ha̍p-chhia ngi-sṳ̍p ngi-se ke sṳ̀ cho Yù-thai-vòng, chhai Yâ-lu-sat-lâng thúng-chhṳ yit-ngièn. Kiâ-mê ôn-to Â-thâ-li-ngâ, he Yî-set-lie̍t-vòng Â-ha̍p ke moi-é, Am-li ke sûn-ńg.
[3] Â-ha̍p-chhia ya ho̍k Â-ha̍p-kâ ke fái mù-yong; yîn-vi kiâ-mê thoi kì chhut chú-yi, tai kì cho fái-sṳ.
[4] Â-ha̍p-chhia hàng Song-chú khon-cho sià-ok ke sṳ; yîn-vi kiâ-pâ sí-heu, Â-ha̍p-vòng vuk-hâ ke ngìn pien-cho kì ke ku-mun, kâu-fái kì.
[5] Kì thâng kì-têu ke kien-ngi, lâu Yî-set-lie̍t-vòng Â-ha̍p ke lai-é Yok-làn lièn-ha̍p hí-lòi, hi kûng-tá Si-li-â-vòng Ha̍p-siet. Sûng-fông kiûn-chhui chhai Kî-lie̍t ke Lâ-ma̍t siông-chhṳ̀, Yok-làn chho̍k-sông,
[6] chhiu chón-to Yâ-sṳ̂-lie̍t-sàng liàu-sông; Â-ha̍p-chhia to ke-vi hi khon kì.
[7] Song-ti yîn-vi Â-ha̍p-chhia hi khon Yok-làn liá-khien sṳ sṳ́ kì me̍t-mòng. Â-ha̍p-chhia chhai Yâ-sṳ̂-lie̍t ke sṳ̀, kì lâu Yok-làn tù-tó Nèn-sṳ ke sûn-é Yâ-fu; Yâ-fu he Song-chú kién-sién lòi fí-me̍t Â-ha̍p vòng-chhèu ke ngìn.
[8] Ke-sṳ̀, Yâ-fu tú-hó hi chṳp-hàng Song-ti tui Â-ha̍p-kâ ke chit-fa̍t, tù-tó ke-têu thèn Â-ha̍p-chhia lòi ke Yù-thai liâng-chhiu lâu kì ke-têu chhṳ̍t-é. Yâ-fu chiông kì-têu chhiòn-phu chhṳ̀-thet.
[9] Â-ha̍p-chhia khong chhai Sat-mâ-li-â, pûn Yâ-fu ke ngìn chhìm-tó, chiông kì kâu-pûn Yâ-fu chhṳ̀-sí. Kì-têu chiông kì mài-chong, yîn-vi kì-têu kóng: “Mò-lun ngióng-pân kóng, kì hàn-he ke chôn-sîm chhìm-khiù Song-chú ke Yok-sâ-fap-vòng ke sûn-é.” Â-ha̍p-chhia-kâ mò chhûn yit-ke ngìn hó pó-chhùn vòng-vi.
[10] Â-ha̍p-chhia-vòng ke â-mê Â-thâ-li-ngâ yit thâng-kóng kiâ lai-é pûn-ngìn chhṳ̀-sí, chhiu ha-lin chiông Yù-thai-vòng ke kâ-chhu̍k chhiòn-phu chiáu-me̍t.
[11] Â-ha̍p-chhia yû yit-ke khiung-yà mò khiung-ôi ke ló-moi ôn-to Yok-sṳ-pâ; kì he Yok-hò-làn-vòng ke moi-é, ka-pûn chi-sṳ̂ Yâ-hò-yâ-thai. Yok-sṳ-pâ chiông Â-ha̍p-chhia ke yit-ke lai-é Yok-â-sṳ̂ tui ke-têu voi pûn-ngìn chhṳ̀-sí ke vòng-chṳ́ chûng thêu-thêu-é kiu chhut-lòi, chiông kì lâu nen-ôi khong chhai sṳn-thien tú ke kiên-fòng. Yok-sṳ-pâ chiông Yok-â-sṳ̂ khong hí-lòi, kiu kì lì-khôi Â-thâ-li-ngâ ke sú, mò pûn thai-heu chhṳ̀-sí.
[12] Â-thâ-li-ngâ yung thai-heu ke sṳ̂n-fun thúng-chhṳ Yù-thai ke khì-kiên, Yok-â-sṳ̂ chhai Song-ti ke sṳn-thien tú khong liuk-ngièn.