[1] Â-ha̍p-sṳ̂ ngi-sṳ̍p se ke sṳ̀ cho vòng; kì chhai Yâ-lu-sat-lâng thúng-chhṳ sṳ̍p-liuk ngièn. Kì mò ho̍k kiâ chú-siên Thai-ví-vòng hàng Song-chú khon-cho chho̍k ke sṳ;
[2] kì fán-chón ho̍k Yî-set-lie̍t lie̍t-vòng ke fái mù-yong, chu-chho Pâ-li̍t ke siong,
[3] chhai Hiûn-nun-chṳ́ sân-lak sêu-hiông, sṳm-chṳ chiông chhṳ-kâ ke lai-é yung fó sêu lòi hien-pûn ngiéu-siong, ho̍k ngièn-lòi ngoi-chhu̍k ngìn ke sià-ok hàng-vì; ke-têu ngìn-mìn chhiu-he Yî-set-lie̍t-ngìn ngi̍p-hi liá-thi ke sṳ̀ Song-chú kiuk chhut-hi ke ngìn.
[4] Â-ha̍p-sṳ̂ chhai sṳ̀n-meu nui, sân-kông táng, lâu tak-thèu thai-su hâ hien-chi sêu-hiông.
[5] Yîn-vi Â-ha̍p-sṳ̂-vòng fam-chhui, Song-chú — kì ke Song-ti pûn Si-li-â-vòng tá-yàng kì, chok tông-tô Yù-thai-ngìn to Thai-mâ-sṳ-kiet hi. Song-chú ya pûn Li-mâ-li ke lai-é Yî-set-lie̍t-vòng Pí-kâ thai-yàng Â-ha̍p-sṳ̂, chhai yit-ngit nui chhṳ̀-thet sṳ̍p-ngi van Yù-thai ke chîn-pîn. Song-chú — kì-têu chú-siên ke Song-ti chún liá-sṳ fat-sên he yîn-vi Yù-thai ngìn-mìn lì-khôi Kì.
[7] Yit-ke Yî-set-lie̍t sṳ-pîn Se-kî-li chhṳ̀-thet Â-ha̍p-sṳ̂-vòng ke lai-é Mâ-sî-ngâ, ya chhṳ̀-thet vòng-kiûng chúng-kón Ap-sṳ̂-li-kâm lâu chái-siong Yî-li-kâ-nâ.
[8] Yî-set-lie̍t kiûn-chhui chiông kì-têu ke thùng-pâu Yù-thai-ngìn, lièn pû-ngiòng ngìn lâu se-ngìn-è chúng-khiung ngi-sṳ̍p van-ngìn chok-to Sat-mâ-li-â hi, ya chhióng-chéu chhin-tô chhòi-vu̍t.
[9] Yû Song-chú ke yit-ke siên-tî ôn-to Ngò-tet, he̍t chhai Sat-mâ-li-â-sàng. Yî-set-lie̍t kiûn-chhui tai-tén tui Yù-thai chok-lòi ke ngìn chón-to Sat-mâ-li-â, oi ngi̍p-sàng ke sṳ̀, Ngò-tet hi kien kì-têu, kóng: “Song-chú — ngì-têu chú-siên ke Song-ti yîn-vi nâu Yù-thai chang pûn ngì-têu tá-yàng kì-têu, ngì-têu sa thai fat-khién, lon chhṳ̀ kì-têu.
[10] Liá-ha, ngì-têu yu sióng-oi sṳ́ Yâ-lu-sat-lâng lâu Yù-thai ke nàm-ńg cho ngì-têu ke nù-chhòi. Kám-kóng ngì-têu m̀-sṳt tet-chhui Song-chú — ngì-têu ke Song-ti he-mò?
[11] Thâng ngài kóng! Liá-têu chok-lòi ke ngìn he ngì-têu ke hiûng-thi chí-moi. Piong kì-têu chón-hi, yîn-vi Song-chú hiong ngì-têu thai fat-khién lé.”
[12] Pet-koet ke Yî-fap-lièn yû kí-ke liâng-chhiu — Yok-ha̍p-nàn ke lai-é Â-sat-li-ngâ, Mí-sṳ̍t-li-ma̍t ke lai-é Pí-li-kâ, Sâ-liùng ke lai-é Yâ-hî-sî-kâ, Ha̍p-tet-lòi ke lai-é Â-mâ-sat khiung-ha chú-tóng chan-chên chón-lòi ke kiûn-chhui.
[13] Kì-têu kóng: “M̀-hó chiông ke-têu chok-lòi ke ngìn tai-to liá-vi lòi! Ngài-têu chó chhiu tet-chhui Song-chú; yin-kôi pûn Kì chit-fa̍t. Ngì-têu liá-ha hàn-oi chok-ok kâ-chhûng ngài-têu ke chhui he-mò? Ngài-têu ke ko-fam yí-kîn la chhûng lé; Song-chú ke fat-khién yí-kîn lìm-to Yî-set-lie̍t lé.”
[14] Só-yî liá-têu kiûn-chhui chiông chok-tó ke ngìn lâu chan-li-phín kâu-pûn ngìn-mìn lâu kì-têu ke liâng-chhiu.
[15] Kì-têu thûi-sién liá si-ke liâng-chhiu chhut-lòi cheu-ku chok-lòi ke ngìn; tui chhióng-lòi ke chan-li-phín chûng nâ sâm-fu lâu hài pûn chok-lòi ke ngìn chok, pûn kì-têu la-ngiak ke sṳ̍t-vu̍t, yu yung kám-lám-yù kò kì-têu ke sông-héu, chiông m̀-voi hàng ke piong chhai lì-è poi-táng, sung só-yû chok-lòi ke ngìn chón Yù-thai thi-khî, to chûng-su sàng Yâ-li-kô hi. Yèn-heu, Yî-set-lie̍t-ngìn to-chón Sat-mâ-li-â.
[16] Yî-tûng-ngìn yu lòi chhîm-fam Yù-thai, chok-hi chhin-tô ngìn. Só-yî, Â-ha̍p-sṳ̂-vòng khiù Â-sut fòng-ti Thì-kiet-lâ-Pí-lie̍t-set pông-chhu.
[18] Chhiu chhai liá-sṳ̀, Fî-li-sṳ-ngìn chhîm-fam Yù-thai nàm-phién lâu sî-phién sân kiok-hâ ke sàng-sṳ. Kì-têu cham-liâng Pak-Sṳ-ma̍k, Â-ngâ-lùn, Kî-tâi-lò, Sô-kô, Thìn-nâ, Kiún-só, lâu fu-khiun ke chhûn-chông, yu he̍t chhai ke-vi.
[19] Yù-thai-vòng Â-ha̍p-sṳ̂ hoi ngìn-mìn thai-thai tet-chhui Song-chú, só-yî Song-chú sṳ́ châi-nan lìm-to Yù-thai.
[20] Â-sut fòng-ti m̀ tân-chhiang m̀ pông-chhu Â-ha̍p-sṳ̂, fán-chón lòi khî-fu kì.
[21] Só-yî Â-ha̍p-sṳ̂ chhiu chiông Song-chú sṳn-thien lâu vòng-kiûng ke kîm-é, pin mìn-kiên liâng-chhiu vuk-hâ ke kîm-é chhiòn-phu sung-pûn Â-sut fòng-ti; chúng-he án-ngiòng hàn-he mò má-ke yung.
[22] Chhai liá tông kiên-nàn ke sṳ̀-chiet, Â-ha̍p-sṳ̂-vòng fán-chón pí yî-chhièn kien-kâ tet-chhui Song-chú.
[23] Kì hien sên-ngì pûn Thai-mâ-sṳ-kiet ke sṳ̀n-mìn, yîn-vi Si-li-â-ngìn tá-yàng kì. Kì kóng: “Liá he yîn-vi kì-têu ke sṳ̀n-mìn pông-chhu kì-têu; na-he ngài hiong kì-têu ke sṳ̀n-mìn hien-chi, kì-têu ya khó-nèn voi pông-chhu ngài.” Chúng-he ke-têu sṳ̀n-mìn sṳ́ Â-ha̍p-sṳ̂ lâu kì ke koet me̍t-mòng.
[24] Â-ha̍p-sṳ̂ yu chiông Song-ti sṳn-thien tú só-yû ke tûng-sî khau-sui, chiông Song-chú ke sṳn-thien koân hí-lòi, chhai Yâ-lu-sat-lâng tak chón-kok ke só-chhai sat-li̍p chi-thàn.
[25] Kì yu chhai Yù-thai tak-ke sàng-sṳ ke sân-kông táng hí sṳ̀n-meu, hiong ngoi-chhu̍k sṳ̀n-mìn sêu-hiông. Án-ngiòng, Â-ha̍p-sṳ̂ ngiâ Song-chú — kiâ chú-siên ke Song-ti fat-khién.
[26] Â-ha̍p-sṳ̂ khì-thâ ke sṳ lâu kì ke hàng-vì, chhiùng-thèu to-mî chhiòn-phu ki chhai Yù-thai lâu Yî-set-lie̍t Lie̍t-vòng Sṳ́ tî-poi.
[27] Â-ha̍p-sṳ̂ sí-heu chong chhai Yâ-lu-sat-lâng, chúng-he mò piong chhai vòng-sṳt ke fùn-mu tú. Kì ke lai-é Hî-sî-kâ sṳ̀n-chiap kì cho vòng.