[1] Куньлернинъ биринде Иса бир ерде дува окъуй эди. Дуваны окъуп битирген сонъ, шегиртлеринден бири Онъа: – Рабби, Ягъя озь шегиртлерини огреткени киби, бизни де дува окъумагъа огрет, – деди.
[2] Иса оларгъа: – Дува окъугъанда шойле денъиз: Баба! Сенинъ Мукъаддес Адынъны эр кес сайсын! Сенинъ Падишалыгъынъ кельсин!
[3] Эр кунь бизге куньделик отьмегимизни бер.
[4] Гуналарымызны багъышла, чюнки биз де озюмизге къаршы гуна япкъан эр бир адамны багъышлаймыз. Бизге ёлдан урулмагъа берме, – деди.
[5] Сонъ Иса оларгъа бойле деди: – Биринъизнинъ досту олса, сен яры геджеде онъа келип: «Достум, манъа учь дане отьмек борджкъа берсе.
[6] Шимди бир достум ёлдан кельди, мен исе онъа бир шей теклиф этип оламайым», – десенъ,
[7] о эв ичинден: «Мени раатсыз этме, къапум энди япыкъ, озюм де балаларымнен тёшекте ятам. Турып санъа отьмек берип оламам», – деп джевап берерми?
[8] Сизге догърусыны айтам: достлугъы ичюн турып бир шей бермесе биле, сенинъ исрарлыгъынъ ичюн эп бир турып, истеген шейинъни берер.
[9] Мен сизге айтам: соранъыз – сизге бериледжек. Къыдырынъыз – тападжакъсыз. Такъырдатынъыз – сизге ачыладжакъ.
[10] Эр бир сорагъан ала, къыдыргъан тапа, такъырдаткъангъа къапуны ачалар.
[11] Аранъыздан, огълу балыкъ сораса, онъа балыкъ ерине йылан берген баба тапылырмы?
[12] Я да огълу йымырта сораса, онъа йымырта ерине акъреп берерми?
[13] Эгер сиз, яман адамлар, балаларынъызгъа яхшы бир шей бере бильсенъиз, Коклердеки Бабанъыз да Ондан сорагъангъа Мукъаддес Рухны багъышлар.
[14] Бир кунь Иса тильсизлик джинини къувып чыкъарды. Джин чыкъкъан сонъ, тильсиз адам лаф этип башлады. Халкъ шашты.
[15] Амма араларындан базылары: – О, джинлерни джинлер башлыгъы Беэльзебулнынъ къуветинен къувып чыкъара, – дедилер.
[16] Башкъалары исе Исаны сынап, коктен бир бельги косьтергенини талап эттилер.
[17] Лякин Иса, оларнынъ фикирлерини билип: – Озь ичинден болюнген эр бир падишалыкъ йыкъылып бошар, озь ичинден болюнген эв де йыкъылып кетеджек.
[18] Эгер Шейтан озь ичинден болюнсе, онынъ падишалыгъы насыл тураджакъ? Сиз Меним акъкъымда: «О, джинлерни Беэльзебулнынъ къуветинен къувып чыкъара», – дейсиз.
[19] Эгер Мен джинлерни Беэльзебулнынъ ярдымынен къувып чыкъарсам, кимнинъ ярдымынен джинлерни сизинъ огъулларынъыз къувып чыкъара экенлер? Сизни олар укюм этерлер!
[20] Эгер Мен джинлерни Алланынъ къуветинен къувып чыкъарсам, демек, Алланынъ Падишалыгъы сизлерге етип кельген.
[21] Кучьлю адам силяланып озь эвини къаравулласа, онынъ мал-мулькю хавф астында олмаз.
[22] Амма онъа ондан даа кучьлюси уджюм этсе ве енъсе, о ишангъан силяны тутып алыр ве басып алгъан мал-мулькюни болер.
[23] Ким Меннен олмаса, Манъа къаршыдыр. Ким Меннен берабер джыймаса, о дагъыта.
[24] Арам рух инсандан чыкъкъан сонъ, сувсуз ерлерде быралкъыланып юре, озюне раатланмагъа ер къыдыра ве тапмайып, озюне: «Мен чыкъкъан эвиме къайтып барайым да», – дей.
[25] Къайтып кельгенде исе, эвини сипирильген ве джыйыштырылгъан алда тапа.
[26] О вакъыт джин бара да, озюнинъ янына башкъа, даа бетер еди джинни ала ве оларнен эвге кирип ерлеше. Сонъра, о адамнынъ алы эвелькинден бетер ола.
[27] Иса бу сёзлерни айткъанда, халкъ арасындан бир къадын къычырып: – Сеннен юклю олгъан ве Сени кокюснен эмиздирген апай бахтлыдыр! – деди.
[28] Иса онъа: – Мен шойле дер эдим: Алланынъ Сёзюни динълеп, оны беджергенлер бахтлылар! – деп джевап берди.
[29] Исанынъ чевре-четинде адамлар топланып, эп арта эдилер. О, оларгъа мураджаат этип, бойле деди: – Бу несиль – яман несильдир! Олар бельги талап этелер, амма оларгъа Юнуснынъ бельгисинден гъайры башкъа бельги берильмейджек.
[30] Юнус Ниневе шеэринде яшагъанлар ичюн насыл бельги олгъан олса, Инсан Огълу да бу несиль ичюн шойле оладжакъ.
[31] Дженюп къыраличеси Ахирет кунюнде бу несильнинъ адамларынен берабер тирилип, оларны къабаатлайджакъ. О, Сулейманнынъ икметли лафларыны динълемек ичюн, дюньянынъ о бир четинден кельген. Мында исе Сулеймандан буюкче Сою бар!
[32] Ниневе адамлары Ахирет кунюнде бу несильнен берабер турып, оны къабаатлайджакълар, чюнки олар Юнуснынъ огреткенлеринден сонъ тёвбе эттилер. Мында исе Юнустан да буюги бар!
[33] Ич кимсе чыракъ якъып, оны гизли ерге я да бир савут тюбюне къоймай. Аксине, киргенлер ярыкъны корьсюн деп, оны шамдангъа къоялар.
[34] Козь – беденнинъ нурудыр. Эгер сенинъ козюнъ сагълам олса, бутюн беденинъ де ярыкъкъа толу олур. Козьлеринъ яман олса исе, беден де къаранлыкъкъа толу олур.
[35] Шунынъ ичюн, бакъ, ичинъдеки ярыкъ къаранлыкъ олмасын!
[36] Эгер бутюн беденинъ ярыкъкъа толу олса, сенде ич бир къара къысым олмаса, чыракъ парылдавынен сени ярыкълаткъан киби, эр бир еринъ яп-ярыкъ олур.
[37] Иса буны айткъан сонъ, бир ферисе Оны эвине ашамагъа давет этти. Иса ферисенинъ эвине кирип, софра башында ер алды.
[38] О, аштан эвель абдест алмагъаныны корьген ферисе пек тааджипленди.
[39] Амма Рабби онъа: – Сиз, фериселер, пиала ве табакънынъ тышыны темизлейсиз, амма ичинъиз саранлыкъ ве яманлыкъкъа толу.
[40] Акъылсызлар! Эм тышыны, эм ичини бир Яратыджы яратмадымы?
[41] Джан-юректен садакъа беринъиз, сонъ эр шей сиз ичюн элял олур! – деди.
[42] – Эй, фериселер, алынъыз беля! Сиз нане, седеф оту ве эписи башкъа ешилликлернинъ ондан бир пайыны бересиз, амма адалет ве Алла севгиси акъкъында унутасыз! Буларнынъ бирисини беджере турып, экинджисини де унутмамакъ керек.
[43] Фериселер, алынъыз беля! Сиз синагогаларда энъ сайгъылы ерде отурмакъны ве базар мейданларында халкътан урьметли селям алмакъны севесиз.
[44] Алынъыз беля! Сиз корюнмеген къабирлер кибисиз: адамлар сезмейип, оларнынъ устюнден басып кечелер.
[45] О вакъыт Къанун оджаларындан бириси Исагъа джевап берип: – Оджа, бу сёзлерни айтып, бизим джанымызны да агъыртасынъ, – деди.
[46] Иса исе: – Къанун оджалары, сизинъ де алынъыз беля! Сиз инсанларгъа агъыр юклерни юклейсиз, озьлеринъиз исе, оларгъа ярдым этмек ичюн пармакънен биле къыбырдатмайсыз.
[47] Алынъыз беля! Сиз, бабаларынъыз ольдюрген пейгъамберлерге дюрбелер къурасыз,
[48] шунынънен бабаларынъызнынъ япкъанларына шаат ве оларнен разы оласыз. Олар пейгъамберлерни ольдюргенлер, сиз исе шу пейгъамберлерге дюрбелер къурасыз!
[49] Онынъ ичюн Алланынъ икмети шойле деген: Мен оларгъа пейгъамберлерни ве хаберджилерни ёлларым. Олардан базыларыны ольдюреджеклер, базыларыны къуваджакълар.
[50] Дюнья яратылгъанындан берли эписи пейгъамберлернинъ тёкюльген къаны ичюн бу несильге джеза олсун,
[51] Хабильнинъ къанындан башлап, къурбан еринен Алланынъ Сарайы арасында ольдюрильген Зекъарьянынъ къанына къадар. Эбет, сизге айтам: эр шей ичюн бу несиль джевап береджек!
[52] Къанун оджалары, алынъыз беля! Сиз бильги анахтарыны къолгъа алдынъыз, лякин къапугъа озьлеринъиз де кирмединъиз, кирмеге истегенлерге де ёл бермединъиз, – деди.
[53] Сонъ Иса шу ерден кетти. Къанун оджалары ве фериселер Исагъа душманлыкънен бакъып, Онъа бир чокъ суаль бере эдилер,
[54] айткъан сёзюнде тутмагъа гъайретнен тырыша эдилер.