[1] E kamalen, i ka ɲagali i ka kamalenya la ka i dusukun ɲɛnajɛ i ka kamalenya donw na, ka i diyaɲekow kɛ ka kɛɲɛ ni i ɲɛ ka ko yetaw ye, nka i k'a dɔn ko Ala na i ɲininka o kow bɛɛ la.
[2] O de kosɔn i ka ɲɛnasisi kow bɔ i kɔnɔ ka tɔɔrɔ kow mabɔ i farisogo la k'a masɔrɔ i ka kamalenya waati bɛ tɛmɛn joona.
[3] I ka i hakili to i Dabaa la i ka kamalenya waati la sani don juguw ka se, i b'a fɔ san minw ko la ko i diyaɲe fɛn si tɛ sɔrɔ olu la tun.
[4] I ka i hakili to i Dabaa la, sani tile ni kɛnɛ ni kalo ni dolow ka kɛ dibi ye, sani san ka fin ko kura sanji nalen kɔ.
[5] So kɔlɔsibaaw na yɛrɛyɛrɛ o don na, cɛ barikamaw na kuru. Silikɛlaw na sili dabila k'a masɔrɔ u to man ca. Minw bɛ filɛli kɛ finɛtiri fɛ, olu na lafin.
[6] Bulon dala konw na tugu, sili kɛ mankan na dɔgɔya. Mɔgɔ na wuli kɔnɔ kasi tuma la, dɔnkili dalaw kan na dɔgɔya.
[7] O tuma la mɔgɔ na siran tintin kan yɛlɛnni ɲɛ, mɔgɔ na siran taama ɲɛ tuma bɛɛ. A kunsigi na jɛya i ko amande sun feere, a tɛna se ka pan tun i ko ntɔn. Diyaɲeko si tɛ mɔgɔ la tun k'a masɔrɔ mɔgɔ bɛ surunya a sigi yɔrɔ banbali la. Su kasilaw bɛ dugu bɔlɔnw yɔrɔ bɛɛ la ka ban.
[8] I hakili to i Dabaa la sani warijɛ juru ka tigɛ, sani sanu dagani ka ci, sani filen ka ci ji boyi da la, sani ji bɔ poli ka kari kɔlɔn da la,
[9] sani buguri ka segin a bɔ yɔrɔ la, sani ni ka kɔsegin a dibaa Ala ma.
[10] Waajulikɛla ko: «Fufafuw ni fufafuw ka fufafu, bɛɛ ye fuu ye.»
[11] Waajulikɛla ma kɛ hakilitigi dama ye, a ye mɔgɔw kalan dɔnniya fana la. A y'i miiri ntalen caman na ka u kɔrɔ ɲini ka u tugutugu ɲɔgɔn na.
[12] Waajulikɛla y'i jija ka ntalen ɲuman caman sɔrɔ ka tiɲɛ kumaw fɔ ka jɛya. A ye min fɔ, o ye tiɲɛ ye.
[13] Hakilitigiw ka kumaw bɛ i ko miseliw, ntalen bɛɛ lajɛlen bɛ i ko nɛgɛ bɔlɔ minw gengenna kogo la kosɛbɛ. U dira karamɔgɔ kelen fɛ.
[14] Ka fara o kan, ne denkɛ, i ka i yɛrɛ kɔlɔsi, o kow ka i kalan. Mɔgɔ bɛ kitabu caman sɛbɛn, u dama tɛ dɔn, kalanba bɛ farikolo sɛgɛn.
[15] An ka nin kumaw bɛɛ lajɛlen laban mɛn. I ka siran Ala ɲɛ ka a ka ci fɔlenw mara. O de ye wajibi ye mɔgɔw bɛɛ kan.
[16] K'a masɔrɔ Ala na ɲininkali kɛ kɛwalew bɛɛ ko la, hali ko dogolenw, ko ɲuman fara ko jugu kan.