[1] I kana tɛliya ka kuma ka layidu ta Ala ɲɛ kɔrɔ, k'a masɔrɔ Ala bɛ san fɛ, e dun bɛ dugukolo kan. O de kosɔn i ka kuma kana caya.
[2] Hami ko caman bɛ sugo bila mɔgɔ la cogo min na, o cogo la kuma caman bɛ bɔ hakilintan da la ten.
[3] Ni i ye i dafale Ala la, i ka o dafale bɔ joona, k'a masɔrɔ Ala tɛ hinɛ hakilintanw na, o de kosɔn i ka i ka dafale dafa.
[4] Dafale kɛbaliya ka fisa ni a bɔbaliya ye.
[5] I kana sɔn i da ka tɛliya ka kuma ka kiri bi i yɛrɛ kan. I kana a fɔ Ala ka ciden ɲɛ na ko i tun man kan ka dafale kɛ walisa Ala kana dimin i kɔrɔ i ka kuma kosɔn ka i ka ko kɛtaw bɛɛ tiɲɛn.
[6] Sugo caman ye fuu ye, kuma caman fana ye fuu ye, nka i ka siran Ala ɲɛ.
[7] Ni i ye faantan tɔɔrɔlen ye jamana kɔnɔ ka sariya ni tilennenya tiɲɛnnen ye, o kana i kabakoya, mɔgɔbaw bɛ mɔgɔba wɛrɛ kɔrɔ, dɔ wɛrɛ bɛ olu san fɛ.
[8] Masakɛ min bɛ bonya a ka jamana kɔnɔ, o ye o jamana ka nafa ye.
[9] Wari nege bɛ mɔgɔ min na, o tɛna wasa wari la. Nafoloba nege bɛ min na, o tɛna tɔnɔ sɔrɔ o la. O fana ye fuu ye.
[10] Ni bolo fɛn cayara, dumunikɛlaw fana bɛ caya. O tigi bɛ mun nafa sɔrɔ o fɛnw la ni u filɛli dama tɛ?
[11] Baarakɛla sunɔgɔ ka di, ni a ye fɛn caman dun wala ni a ye fɛn dɔɔnin dun, a bɛ sunɔgɔ. Nka fɛntigi fa kojugu b'a bali ka sunɔgɔ.
[12] Ne ye sɛgɛn ko dɔ ye tile jukɔrɔ, mɔgɔ bɛ nafolo mara k'a sɔrɔ a bɛ bɔnɛ lase o tigi ma.
[13] O nafolo bɛ tiɲɛn bɔnɛ fɛ. A ye denkɛ sɔrɔ nka foyi tɛ to a bolo.
[14] O cɛ farilankolon bangera, a farilankolon na taa. A tɛ taa ni a bolo baara nɔ si ye a bolo.
[15] A na cogo ni a taa cogo na kɛ kelen ye, o ye kojuguba ye. A bɛ baara kɛ fiɲɛ nɔ fɛ, a bɛ mun nafa sɔrɔ o la?
[16] Ka fara o bɛɛ kan, a bɛ dumuni kɛ dibi la a si tile bɛɛ la. A bɛ tɔɔrɔ ni degun ni dimiya sɔrɔ.
[17] O de kosɔn ne y'a faamu ko mɔgɔ ka dumuni kɛ ka minni kɛ ka i ɲɛnajɛ i bolo baara nɔw la tile jukɔrɔ a si tilew bɛɛ la, Ala ye o minw di a ma, ko foyi man fisa mɔgɔ ma ka tɛmɛn o kan. O ye a niyɔrɔ ye.
[18] Nka ni Ala ye bolo fɛn caman ni nafoloba di mɔgɔ dɔ ma ka a dunni fanga di a ma fana, ka a niyɔrɔ sɔrɔ a la ka a nisɔndiya a ka baara la, o ye Ala ka nili fɛn ye.
[19] K'a masɔrɔ ni mɔgɔ ye ɲagali sɔrɔ Ala fɛ, a tɛ miiri a si tile janya ko ni a surunya ko la.