[1] Jerusalɛm masakɛ Dawuda denkɛ, Waajulikɛla ka kuma.
[2] Waajulikɛla ko: «Fufafuw ni fufafuw ka fufafu, bɛɛ ye fuu ye.»
[3] Hadamaden bɛ sɛgɛn baara min na tile jukɔrɔ, a bɛ mun nafa sɔrɔ o bɛɛ la?
[4] Bɔnsɔn dɔ bɛ tɛmɛn, bɔnsɔn wɛrɛ bɛ na olu kɔ, nka dugukolo tɛ yɛlɛma.
[5] Tile bɛ bɔ, tile bɛ bi ka tɛliya ka taa a bɔ yɔrɔ la walisa a ka bɔ ko kura.
[6] Fiɲɛ bɛ ci ka taa worodugu yanfan fɛ ka yɛlɛma ka taa saheli yanfan fɛ. A bɛ munumunu tuma bɛɛ ka taa a taa sira kɔrɔw fɛ.
[7] Bajiw bɛɛ bɛ don kɔgɔji la, nka kɔgɔji tɛ fa. Bajiw bɛ to ka woyo ka taa don kɔgɔji la ka segin ka taa u bɔ yɔrɔ la ko kura.
[8] Sɛgɛnba bɛ kow bɛɛ la Hadamaden tɛ se ka a ɲɛ fɔ. Ɲɛ tɛ wasa filɛli la abada, tulo tɛ wasa mɛnni la.
[9] Fɛn min tun bɛ yen, o na kɛ yen ko kura. Fɛn min kɛra ka kɔrɔ, o na kɛ yen tun. Fɛn si tɛ kura ye tile jukɔrɔ.
[10] Ni fɛn dɔ sɔrɔla, mɔgɔ b'a fɔ ko: «Fɛn kura filɛ nin ye,» k'a sɔrɔ o fɛn tun bɛ yen waati tɛmɛnnenw la ka kɔrɔ.
[11] Mɔgɔw hakili tɛ to ko tɛmɛnnenw na. Mɔgɔ minw bɛ na an kɔ, olu kɔ, mɔgɔw hakili tɛna to olu ka kow la.
[12] Ne Waajulikɛla, ne kɛra Israɛl bɔnsɔn ka masakɛ ye Jerusalɛm.
[13] Ne ye ne kɔnɔ miiri sankolo jukɔrɔ ko kɛtaw bɛɛ la ka ɲininkali kɛ ka sɛgɛsɛgɛli kɛ u bɛɛ ko la ni hakilitigiya ye. O baara ye sɛgɛn ko ye, Ala y'a di Hadamadenw ma walisa u ka sɛgɛn a fɛ.
[14] Ayiwa, fɛn minw bɛɛ bɛ kɛ tile jukɔrɔ, ne ye olu bɛɛ kɔlɔsi. Ne y'a ye ko o bɛɛ ye fuu de ye, fiɲɛ ɲinili don.
[15] Fɛn kurulen tɛ se ka latilen, fɛn min tɛ yen, o tɛ se ka jate.
[16] Ne y'a fɔ ne yɛrɛ kɔnɔ ko: «A filɛ, ne ka bon, ne ɲɛfɛ masakɛ minw ye Jerusalɛm mara, ne tɛmɛnna olu bɛɛ kan hakilitigiya la. Ne dusukun ye hakilitigiya ni dɔnniya dama dɔnbali sɔrɔ.»
[17] Ɔwɔ, ne ye dɔnniya ni hakilitigiya ɲini ni ne dusukun bɛɛ ye, ka fatɔya ni hakilintanya faranfasi, nka ne y'a faamu ko o fana ye fuu ye, fiɲɛ ɲinili don.
[18] Dusukasi ko caman bɛ sɔrɔ hakilitigiya la, ni min ye dɔnniya caman sɔrɔ, o na ɲɛnasisi ko caman fana sɔrɔ.