[1] Ne ye ko jugu dɔ wɛrɛ ye tile jukɔrɔ min ye kojuguba ye Hadamaden kan.
[2] Ala ye bolo fɛn caman ni nafoloba ani bonyaba di mɔgɔ dɔ ma, fo a ma dɛsɛ a sago la fɛn si la, nka Ala ma o dunni fanga di a ma, nka dunan bɛ a dumu. O ye fuu ye, bɔnɛba don.
[3] Hali ni den kɛmɛ bɛ mɔgɔ dɔ fɛ ka si tile caman sɔrɔ fo ka a si tilew caya k'a sɔrɔ a ma nisɔndiya a bolo fɛnw kosɔn, ni a ma su don ko ɲuman sɔrɔ, ne b'a fɔ ko den kɔnɔ dafabaliya ka fisa o ye.
[4] K'a masɔrɔ o den bɛ na fuu, a bɛ taa dibi la, a tɔgɔ bɛ to dibi la.
[5] O den ma hali tile ye, a ma ko dɔn. O de kosɔn a ye lafiya sɔrɔ ka tɛmɛn dɔ kan.
[6] Hali ni dɔ ye san waa kelen sigi yɔrɔma fila sɔrɔ k'a sɔrɔ a ma hɛrɛ ye, o bɛ mun ɲɛ sa? Yala u fila bɛɛ tɛ taa yɔrɔ kelen na wa?
[7] Mɔgɔ bɛ baara kɛ dumuni kosɔn nka a tɛ wasa tuma si.
[8] Ayiwa hakilitigi bɛ mun nafa sɔrɔ ka tɛmɛn hakilintan kan? Faantan min bɛ a taama cogo dɔn mɔgɔ ɲɛnamaw ɲɛ kɔrɔ, a bɛ nafa sɔrɔ o la?
[9] Mɔgɔ bɛ fɛn min ye ka ɲagali o kosɔn, o ka fisa ni nege la fɛn ye mɔgɔ ɲɛ tɛ min na, sabu o fana ye fuu ye, fiɲɛ ɲinili don.
[10] Fɛn o fɛn bɛ kɛ, o tɔgɔ fɔra kabini tuma jan. Hadamaden na kɛ min ye, o dɔnna ka kɔrɔ. Mɔgɔ min barika ka bon a ta ye, a tɛ se ka o sɔsɔ.
[11] Kuma caman bɛ fufafu caya. Mɔgɔ bɛ se ka mun nafa sɔrɔ o la?
[12] Ayiwa, min ka fisa Hadamaden ma, jɔn bɛ se ka o dɔn? A bɛ si tile dɔɔnin sɔrɔ, o kɔ ka tɛmɛn i ko ja. Ko min bɛ kɛ mɔgɔ salen kɔ tile jukɔrɔ, jɔn bɛ se ka o fɔ a ye?