[1] Jɔn bɛ i ko hakilitigi? Jɔn bɛ kow kɔrɔ dɔn? Hakilitigiya bɛ mɔgɔ nisɔndiya, a t'a ɲɛnasisi.
[2] Ne b'a fɔ i ye ko i ka masakɛ ka ci kɛ i ka kalili kosɔn Ala la.
[3] I kana boli ka bɔ a ɲɛ kɔrɔ. I kana i sen don kɛwale juguw la, k'a masɔrɔ masakɛ bɛ a diyaɲekow bɛɛ kɛ.
[4] Fangaba bɛ masakɛ dala kumaw la. Jɔn bɛ se k'a fɔ a ye ko: «I bɛ mun kɛ?»
[5] Mɔgɔ min bɛ a ka ciw kɛ, o tɛna a ka juguya dɔn. Hakilitigi dusukun bɛ kiri tilennen waati makɔnɔ cogo dɔn.
[6] Ko bɛɛ ni a kɛ waati don, a kiri ko fana bɛ yen. O tuma la mɔgɔ bɛ sɛgɛnba sɔrɔ.
[7] O cogo la, ko min na mɔgɔ sɔrɔ, a tɛ o dɔn. O kow na kɛ cogo min na, jɔn bɛ se ka o fɔ a ye?
[8] Fanga tɛ mɔgɔ si fɛ a yɛrɛ ninakili kan, walisa a ka a ninakili mara. Fanga tɛ a fɛ fana saya don kama. Mɔgɔ si tɛna se ka tila o kɛlɛ la. Juguya tɛna juguyatigi kisi.
[9] Ne ye o bɛɛ ye ka miiri tile jukɔrɔ ko kɛtaw bɛɛ la. Tuma dɔ la mɔgɔ dɔ bɛ sigi kuntigiya la dɔ kun na ka bɔnɛ lase o ma.
[10] Ne y'a ye ko mɔgɔ juguw suw donna ko ɲuman k'a sɔrɔ ko ɲumankɛlaw minɛna ka bɔ dugu senuma kɔnɔ. U ka dugu mɔgɔw ɲinɛna u kɔ. O fana ye fuu ye.
[11] Mɔgɔ min bɛ ko jugu kɛ, o tɛ ɲankata joona, o de kosɔn mɔgɔw ja gɛlɛyara ko jugu kɛli la.
[12] Hali ni o ɲɔgɔn kojugukɛla bɛ ko jugu kɛmɛ kɛ ka si tile jan sɔrɔ, o bɛɛ n'a ta ne b'a dɔn ko Ala ɲɛsiranbaaw na hɛrɛ sɔrɔ u ka Ala ɲɛsiran kosɔn.
[13] Nka hɛrɛ si tɛ mɔgɔ jugu ye. A tɛ se ka si tile jan sɔrɔ, a bɛ tɛmɛn i ko ja, sabu a ma siran Ala ɲɛ.
[14] An bɛ se ka fɛn fuu dɔ wɛrɛ ye dugukolo kan. Mɔgɔ tilennen dɔw bɛ minɛ i ko kojugukɛla. Mɔgɔ jugu dɔw bɛ minɛ i ko mɔgɔ tilennen. Ne ko, o fana ye fuu ye.
[15] Ayiwa ne y'a daminɛ ka ne yɛrɛ ɲɛnajɛ, sabu foyi man fisa Hadamaden ma tile jukɔrɔ ka tɛmɛn dumuni ni minni ani ɲɛnajɛ kan. Hadamaden bɛ nafa min sɔrɔ a ka baara la a si tile bɛɛ kɔnɔ, Ala ye o min di a ma, o filɛ o ye.
[16] Ne ye ne kɔnɔ miiri ka hakilitigiya faamu dugukolo kan ka ko kɛtaw bɛɛ dɔn, hali ni mɔgɔ bɛ Ala ka kɛwalew sɛgɛsɛgɛ su fara tile kan, ni a tɛ sunɔgɔ, ne y'a dɔn ko mɔgɔ tɛ se ka tile jukɔrɔ ko kɛlenw bɛɛ faamu. A bɛ a yɛrɛ sɛgɛn ka o ɲini cogo o cogo, a tɛna a sɔrɔ. Hali ni hakilitigi bɛ miiri ko a n'a dɔn, a tɛna se k'a dɔn.