[1] Dimɔgɔ suw bɛ tulu suma duman toli k'a kasa bɔ cogo min na, hakilintanya dɔɔnin bɛ hakilitigi ka dɔnniya ni a tɔgɔ ɲuman tiɲɛn ten.
[2] Hakilitigi dusukun bɛ a kinin yanfan fɛ, nka hakilintan dusukun bɛ a numan yanfan fɛ.
[3] Ka hakilintan to taama la sira kan, a taama cogo b'a ka hakilintanya jira. A b'a jira mɔgɔ bɛɛ la ko a ye hakilintan de ye.
[4] Ni kuntigi diminna i kɔrɔ, i kana bɔ i nɔ na k'a masɔrɔ sabalilenya bɛ filili caman datugu.
[5] Ne ye ko jugu dɔ ye jamana marabaaw fɛ tile jukɔrɔ,
[6] o filɛ nin ye, ko hakilintan bɛ sigi kuntigiya la k'a sɔrɔ nafolobatigiw tɛ jate.
[7] Ne ye jɔnw yɛlɛnnen ye sow kan, k'a sɔrɔ faamaw bɛ taama u senw na i ko jɔnw.
[8] Mɔgɔ min bɛ dingɛ sen, o yɛrɛ na bi a kɔnɔ. Min bɛ sinsan kari, sa na o tigi cin.
[9] Mɔgɔ min bɛ kabakurunw lawuli, kabakurun na o tigi jogin. Mɔgɔ min bɛ dɔgɔ ci, o bɛ farati la.
[10] Ni jele da man di, ni i ma a da diya, i k'a kɛ ni barikaba ye, nka nafa bɛ hakilitigiya la, a bɛ kow ɲɛnabɔ.
[11] Ni sa ye mɔgɔ dɔ cin k'a sɔrɔ dɔnnikɛla ka dabali ma kɛ a la, a ka dabaliw tɛ foyi ɲɛ a la tun.
[12] Hakilitigi ka kumaw b'a to a bɛ mɔgɔw sɔrɔ, nka hakilintan da b'a yɛrɛ halaki.
[13] Hakilintan ka kuma daminɛ ye hakilintanya ye, a bɛ a laban ni fatɔya ye.
[14] Hakilintan bɛ kumaw caya. Mɔgɔ si tɛ a yɛrɛ laban dɔn. Ko minw na kɛ mɔgɔ kɔ, jɔn bɛ se ka o fɔ a ye?
[15] Hakilintan bɛ a yɛrɛ sɛgɛn fuu, hali a tɛ a yɛrɛ ka dugu sira dɔn.
[16] E jamana min ka masakɛ ye denmisɛn ye, ni i ka kuntigiw bɛ dumuniba kɛ sɔgɔma da fɛ, bɔnɛ bɛ i ye.
[17] E jamana min ka masakɛ ye siya tɔgɔmaba ye, ni i ka kuntigiw bɛ dumuni kɛ waati bɛnnen na ka barika sɔrɔ, ni u tɛ u fa minni fɛn farinmaw la, e ye dubaden ye.
[18] Salaya de b'a to bili bon bɛ firi, ni min bolo tɛ baara kɛ, ji na don o tigi ka so kɔnɔ.
[19] Mɔgɔ bɛ dumuniba dila ɲɛnajɛ kosɔn, diwɛn bɛ mɔgɔ nisɔndiya, wari bɛ kow bɛɛ ɲɛnabɔ.
[20] I kana masakɛ neni, hali i kana miiri a la, i kana kuntigiw neni, hali i sibon kɔnɔ, sabu sanfɛ kɔnɔ dɔ bɛ se ka taa ni i ka kuma ye, ciden kamanma bɛ i ka kuma fɔ yɔrɔ bɛɛ.