[1] Solomani ka dɔnkiliw bɛɛ la ɲuman.
[2] I ka ne da susu ni i ka da susuli ye, k'a masɔrɔ i ka kanuya ka di ni diwɛn ye.
[3] I ka tulu suma ka di, i tɔgɔ bɛ i ko tulu suma duman bɔnnen, o de kosɔn i ko ka di npogotigiw ye.
[4] I ka ne sama i nɔ fɛ, an ka boli ɲɔgɔn fɛ. Masakɛ bɛ ne ladon a ka so ɲɛ kɔnɔ la. An ka nisɔndiya ka ɲagali i kosɔn. An na i ka kanuya ko fɔ ka tɛmɛn diwɛn kan. U jo don ka i kanu.
[5] Jerusalɛm musow, ne fari finna, nka halio, ne cɛ ka ɲi. Ne ka fin i ko Kedar kungokolon la finisow, ne cɛ ka ɲi i ko Solomani ka gwa masiri finiw.
[6] I kana ne finya cogo filɛ, tile nɔ don. Ne ba denkɛw diminna ne kɔrɔ ka ne bila u ka rezɛn nakɔ kɔlɔsili la, o de kosɔn ne ma se ka ne yɛrɛ kɔlɔsi.
[7] Ne dusukun ka kanulen, i bɛ i ka sagaw gɛn yɔrɔ min na, ani i bɛ u lafiya yɔrɔ min na tile gwan fɛ, i ka o fɔ ne ye. Mun kosɔn ne ka taa yaalayaala ka i ɲini i taama ɲɔgɔnw ka sagakuluw cɛma?
[8] Ni i ma o dɔn, o musow bɛɛ la cɛɲi, i ka bɔ ka taa sagaw nɔ fɛ, ka i ka badenw gɛn saga gɛnnaw ka buguw kɛrɛ fɛ.
[9] Ne muso mandi, ne bɛ i kɛɲɛ ni Faraon ka wotoro so dɔ ye.
[10] Masiri fɛnw kɛra ka i tamaw cɛɲɛ, i kan masirilen bɛ ni kɔnɔn juruw ye.
[11] An na kanna sanu dila i ye, ka warijɛ falafalaw kɛ u la.
[12] Ne ka nar tulu suma duman suma na bɔ ka masakɛ sigilen to a ka baro kɛ yɔrɔ la.
[13] Ne ɲɛ na ne ka kanulen bɛ i ko mirɛ suma duman tulen min dalen bɛ ne disi la.
[14] Ne ɲɛ na ne ka kanulen bɛ i ko jabi feere tusuu min bɛ Engedi rezɛn nakɔtuw la.
[15] I cɛ ka ɲi ne muso mandi, i cɛ ka ɲi kosɛbɛ. I ɲɛw bɛ i ko ntubaniw.
[16] I cɛ ka ɲi, ne ka kanulen, i ko ka di ne ye. An ka dali dlan ye binkɛnɛ ye.
[17] An ka so cɛ tigɛ jiriw ye sedere jiriw ye, a jiri misɛnw ye sipere jiriw ye.