[1] I ka i ka dumuni seri baji kan, sabu i na o sɔrɔ don dɔ la.
[2] I ka i bolo fɛnw dɔ di mɔgɔ wolonwula ma, hali mɔgɔ segin yɛrɛ, k'a masɔrɔ bɔnɛ min na se dugukolo kan, i tɛ o dɔn.
[3] Ni sankabaw fara sanji la, u b'a bɔn dugukolo kan. Ni jirisun bira worodugu yanfan fɛ wala saheli yanfan fɛ, a bira yɔrɔ min na a bɛ to yen.
[4] Mɔgɔ min bɛ fiɲɛ kɔlɔsi, o tɛna danni kɛ. Mɔgɔ min bɛ sankaba filɛ, o tɛna suman tigɛ.
[5] I tɛ fiɲɛ taa sira dɔn ani i tɛ mɔgɔ kolo dila cogo dɔn a ba kɔnɔ. I tɛ se ka Ala ka kɛwalew faamu tɛn, ale min ye fɛn bɛɛ da.
[6] I ka i ka danni si dan kabini sɔgɔma da fɛ, i kana salaya wula da fɛ k'a masɔrɔ i t'a dɔn yala ni sɔgɔma da ta na ɲɛ wala wula da ta na ɲɛ wala u fila bɛɛ na ɲɛ.
[7] Kɛnɛyeelen ka di, i ɲɛ ka tile ye, o ye fɛn duman ye.
[8] Ni mɔgɔ dɔ ye tile caman ye, o ka kan ka ɲagali a si bɛɛ la, nka a bɛ na don minw kɛ dibi la, a kana ɲinɛ olu kɔ. Ko nataw bɛɛ ye fuu de ye.