[1] Fɛn bɛɛ ni a waati don, sankolo jukɔrɔ kow bɛɛ ni a kɛ tuma don.
[2] Bange tuma ni saya tuma, jiri turu tuma ni jiri bɔ tuma,
[3] fagali tuma ni kɛnɛyali tuma, so ci tuma ni so jɔ tuma,
[4] kasi tuma ni yɛlɛ tuma, su kasi tuma ni dɔnkɛ tuma,
[5] kabakurunw fili tuma ni kabakurunw lajɛ tuma, ɲɔgɔn poron tuma ni ɲɔgɔn bila tuma,
[6] ɲinili tuma ni tununli tuma, fɛn mara tuma ni fɛn fili tuma,
[7] fini fara tuma ni fini kala tuma, makunni tuma ni kuma tuma,
[8] kanuya tuma ni koniya tuma, kɛlɛ tuma ni hɛrɛ tuma.
[9] Baarakɛla bɛ mun nafa sɔrɔ a ka sɛgɛn bɛɛ la?
[10] Ala ye baara min di Hadamadenw ma, walisa u ka sɛgɛn o fɛ, ne ye o kɔlɔsi.
[11] A ye fɛn bɛɛ kɛ ka ɲɛ a waati la, ka fara o kan a ye badaa miirili kɛ mɔgɔ dusukun na. O bɛɛ n'a ta Ala ye baara min kɛ kabini daminɛ fo laban, mɔgɔ si tɛ se ka o cogo dɔn.
[12] Hadamaden ka ɲagali a bolo baara nɔw kosɔn a si bɛɛ la, foyi man fisa a ma ka tɛmɛn o kan.
[13] Ka dumuni kɛ ka minni kɛ ka nisɔndiya a bolo baara nɔw kosɔn, o ye Ala ka nili fɛn ye.
[14] Ne y'a kɔlɔsi ko Ala ye min kɛ, o bɛ to badaa. Mɔgɔ tɛ se ka fɛn fara o kan wala ka fɛn bɔ a la. Ala ye o kɛ ten walisa mɔgɔ ka siran a ɲɛ.
[15] Fɛn min bɛ yen, o tun bɛ yen ka kɔrɔ, fɛn min na kɛ yen, o kɛra ka kɔrɔ. Ko minw tɛmɛnna, Ala na olu jira ko kura.
[16] Ne y'a ye tile jukɔrɔ tun ko tilenbaliya bɛ kɛ kiri tigɛ yɔrɔ la. Tilenbaliya bɛ kɛ tilennenya so kɔnɔ.
[17] O tuma la ne y'a fɔ ne yɛrɛ kɔnɔ ko: «Ala na kiri tigɛ mɔgɔ tilennen ni mɔgɔ jugu bɛɛ kan k'a masɔrɔ a ye waati dɔ sigi a na kiri tigɛ baaraw bɛɛ ni kɛwalew bɛɛ kan o waati la.»
[18] Ne y'a fɔ ne yɛrɛ kɔnɔ ko: «Ala y'a kɛ ten walisa a ka Hadamadenw kɔrɔbɔ k'a jira u la ko u ni bagan bɛɛ ka kan,
[19] k'a masɔrɔ ko min bɛ Hadamadenw sɔrɔ, o bɛ baganw fana sɔrɔ. Fɛn kelen bɛ u fila bɛɛ sɔrɔ, u fila bɛɛ sa cogo ye kelen ye, ninakili kelen bɛ u bɛɛ la. Mɔgɔ man fisa bagan ye, katuguni fɛn bɛɛ ye fuu ye.
[20] U fila bɛɛ bɛ taa yɔrɔ kelen na. U bɛɛ bɔra buguri la, u bɛɛ na kɔsegin buguri la.
[21] Jɔni b'a dɔn yala ni Hadamaden ni bɛ taa san fɛ ni bagan ni bɛ jigin dugukolo jukɔrɔ?»
[22] O de kosɔn ne y'a ye ko foyi man fisa mɔgɔ ma ka tɛmɛn nisɔndiya kan a bolo baara nɔw kosɔn. O de ye a niyɔrɔ ye. Ko minw bɛ kɛ mɔgɔ salen kɔ, jɔn n'a to a ka olu ye?