[1] Ne y'a fɔ ne dusukun ye ko: «An ka taa ka ɲɛnajɛ kow kɔrɔbɔ ka diyaɲekow sifilɛ.» Nka ne y'a ye ko o bɛɛ ye fuu ye.
[2] Ne y'a fɔ yɛlɛ ma ko o ye hakilintanya ye, k'a fɔ ɲɛnajɛ ko ma, ko a bɛ mun ɲɛ?
[3] Ne y'a miiri ne kɔnɔ ko ne na ne farisogo ɲɛnajɛ ni diwɛn ye ka ne dusukun to hakilitigiya kan fana. Ne ko ne na hakilintanya fana cogo dɔn, walisa ko min bɛ bɛn Hadamadenw ma k'a kɛ sankolo jukɔrɔ u si tilew bɛɛ la, ne ka o dɔn.
[4] Ne ye baarabaw kɛ ka masaya sow jɔ ka rezɛn sunw turu.
[5] Ne ye nakɔ bi ka jiri denta sifa bɛɛ turu.
[6] Ne ye ji dingɛw sen walisa ka o jiriw sɔn.
[7] Ne ye jɔnkɛw ni jɔnmusow san, jɔnw bangera ne ka du kɔnɔ. Bagankulu caman tun bɛ ne fɛ, misikuluw ni sagakuluw, olu tun ka ca ne ɲɛfɛ mɔgɔw bɛɛ ta ye Jerusalɛm.
[8] Ne ye warijɛ ni sanu ni masakɛw ka nafolo caman lajɛ ne ka nafolo mara yɔrɔw la. Ne ye dɔnkili dalaw cɛmaw ni musomaw ni Hadamaden diyaɲe fɛnw lajɛ ne ka so, muso caman kɔni.
[9] Ne kɛra mɔgɔba ye ka tɛmɛn ne ɲɛfɛ mɔgɔw bɛɛ kan Jerusalɛm. Ne ka hakilitigiya tun ka bon.
[10] Ne ɲɛ bɔra fɛn o fɛn fɛ, ne ma ne yɛrɛ bali o si la. Ne ma ne dusukun bali a diyaɲeko si la. Ne dusukun tun bɛ ɲagali ne bolo baara nɔw kosɔn, o kɛra ne ka baara nafa ye.
[11] O tuma la ne ka baaraw bɛɛ jatelen kɔ ani ne ye tɔɔrɔ minw sɔrɔ u kosɔn, ne y'a faamu ko o bɛɛ ye fuu de ye, ko fiɲɛ ɲinili don. Nafa tɛ u si la tile jukɔrɔ.
[12] Ne ye ne yɛlɛma ka sɛgɛsɛgɛli kɛ yala mun nafa bɛ hakilitigiya la ka tɛmɛn nalonmaya ni fatɔya kan, k'a masɔrɔ mɔgɔ jumɛn bɛ sigi ne bɔɲɔgɔnko masakɛ nɔ na ka fɛn kura kɛ min ɲɔgɔn ma deli ka kɛ?
[13] O de y'a to ne y'a ye ko hakilitigiya ka fisa ni hakilintanya ye i ko kɛnɛ ka fisa ni dibi ye cogo min na.
[14] Ɲɛ bɛ hakilitigi kun k'a sɔrɔ hakilintan bɛ taama dibi la, nka ne ye fɛn kelen kɔlɔsi, ko u fila bɛɛ laban ye kelen ye.
[15] Ne y'a fɔ ne dusukun na fana ko: «Hakilintan laban ko na kɛ i ko ne ta. Ayiwa, o cogo la mun nafa bɛ hakilitigiya la?» Ne y'a fɔ ne dusu ye ko: «Nin fana ye fuu de ye.»
[16] Hakilitigi ko tɛ to mɔgɔw kɔnɔ ka tɛmɛn hakilintan kan, k'a masɔrɔ don nata la u fila bɛɛ ko na bɔ mɔgɔw kɔnɔ. Ɔwɔ, hakilitigi bɛ sa, hakilintan fana bɛ sa.
[17] O de kosɔn ɲɛnamaya ko man di ne ye k'a masɔrɔ tile jukɔrɔ ko kɛtaw ye ne sɛgɛn. U bɛɛ ye fuu ye, fiɲɛ ɲinili don.
[18] Ne ye baaraba minw bɛɛ kɛ tile jukɔrɔ ka ne sɛgɛn, u si tun man di ne ye sabu olu na kɛ mɔgɔ wɛrɛ ta ye ne kɔ.
[19] Ayiwa, jɔn b'a dɔn ni o tigi na kɛ hakilitigi wala hakilintan ye? O bɛɛ n'a ta o tigi na ne bolo baara tɔnɔ sɔrɔ, ne ye sɛgɛn min kɛ olu kosɔn ni hakilitigiya ye. O bɛɛ ye fuu de ye.
[20] O de y'a to, ne ye baara minw kɛ tile jukɔrɔ, ne jigi tɛ olu si kan tun.
[21] Mɔgɔ dɔ bɛ baara kɛ ni hakilitigiya ni dɔnniya ni kisɛya ye, nka a bɛ o to mɔgɔ min bolo ka kɛ o ta ye a kɔ, o tigi ma baara si kɛ a la. O fana ye fuu de ye. Bɔnɛ koba don.
[22] Mɔgɔ bɛ baara min kɛ tile jukɔrɔ k'a kɛ ni a dusu bɛɛ ye ka sɛgɛn a la, a bɛ mun nafa sɔrɔ o bɛɛ la?
[23] A si tile bɛɛ bɛ kɛ ni sɛgɛn ye, a tɛ nafa si sɔrɔ a ka baara la sɛgɛn kɔ. Hali su fɛ, a dusukun tɛ lafiya si sɔrɔ. O fana ye fuu de ye.
[24] Foyi man ɲi Hadamaden ma fɔ dumuni ni minni ani k'a ɲɛnajɛ a bolo baara nɔw la. Nka ne y'a kɔlɔsi ko o ye Ala ka nili fɛn ye.
[25] Mɔgɔ jumɛn bɛ se ka dumuni sɔrɔ ni Ala ma o di a ma ka a nisɔndiya?
[26] Ala bɛ hakilitigiya ni dɔnniya ni nisɔndiya di a diyaɲe mɔgɔ ma, nka a b'a to jurumukɛla ka baara kɛ ka nafolo lajɛ k'a caya, walisa a ka o di Ala diyaɲe mɔgɔ ma. O fana ye fuu ye, fiɲɛ ɲinili don.