[1] Ne ye kɔlɔsili kɛ ko kura k'a ye ko tilenbaliya kow bɛ tile jukɔrɔ. Ne ye mɔgɔ degunnenw ɲɛji bɔtɔ ye. Mɔgɔ si ma sɔrɔ ka u dusu saalo. U tɔɔrɔbaaw tun ka farin u ma, mɔgɔ si ma u dusu saalo.
[2] O de kosɔn ne y'a fɔ ko mɔgɔ minw sara ka ban olu ka fisa ni mɔgɔ ɲɛnamaw ye, olu minw ɲɛnama don bi.
[3] Nka mɔgɔ min ma bange fɔlɔ, ni a ma kɛwale juguw ye tile jukɔrɔ, o ka fisa u fila bɛɛ ye.
[4] Ayiwa ne y'a ye ko mɔgɔw bɛ u jija walisa u ka baara ka ɲɛ sabu u sigiɲɔgɔn bolo fɛn caman keleya bɛ u la. O fana ye fuu ye, fiɲɛ ɲinili don.
[5] Hakilintan bɛ a bolo kolonso ɲɔgɔn na k'a yɛrɛ tiɲɛn ten.
[6] Tɛgɛ kelen falen hɛrɛ la, o ka fisa ni tɛgɛ fila falen ye baara ni fiɲɛ ɲinili la.
[7] Ne ye hakilintanya ko wɛrɛ kɔlɔsi tile jukɔrɔ,
[8] o filɛ nin ye. Mɔgɔ dɔ bɛ to a dan na, mɔgɔ si tɛ a kɛrɛ fɛ, denkɛ wala balima t'a la, o bɛɛ n'a ta a bɛ baara kɛ tuma bɛɛ. A ɲɛ tɛ wasa fɛntigiya la nka a tɛ ɲininkali kɛ ko: «Ne bɛ baara kɛ jɔn ye ka ne yɛrɛ sɛgɛn ten?» O fana ye fiɲɛ ɲinili ni fuu ye.
[9] Mɔgɔ fila ka fisa ni mɔgɔ kelen ye, k'a masɔrɔ u bɛ tɔnɔ ɲuman sɔrɔ u ka baara la.
[10] Ni u la kelen bira, dɔ bɛ se ka a lawuli. Nka ni mɔgɔ kelen bira, o ye bɔnɛ ye sabu mɔgɔ si tɛ yen k'a lawuli.
[11] O cogo la ni mɔgɔ fila bɛ da ɲɔgɔn kɛrɛ fɛ, u fila bɛ nɛnɛ bɔ ɲɔgɔn na, nka min kelen don, o bɛ se ka nɛnɛ bɔ a yɛrɛ fari la cogo di?
[12] Ni binkannikɛla bira mɔgɔ fila kan, olu bɛ ɲɔgɔn dɛmɛ nka mɔgɔ kelen tɛ se. Jurukisɛ saba melekelen ɲɔgɔn na, o tigɛ man di.
[13] Denmisɛn hakilitigi faantan ka fisa ni masakɛ kɔrɔlen hakilintan ye min tɛ laadili lamɛn,
[14] hali ni o denmisɛn bɔra kaso la ka kɛ masakɛ ye, k'a sɔrɔ a bangera faantanya la jamana kɔnɔ.
[15] Ne ye mɔgɔ ɲɛnamaw bɛɛ ye, u bɛ taa ka segin tile jukɔrɔ. Denmisɛn min bɛ na sigi masakɛ nɔ na, u tugulen bɛ o la.
[16] A tun bɛ jamaba min ɲɛ fɛ, o dama dɔnbali tun don. O bɛɛ n'a ta o masakɛ ko tɛna diya bɔnsɔn nataw ye tun. O bɛɛ ye fuu de ye, fiɲɛ ɲinili don.
[17] Ni i bɛ don Ala ka so kɔnɔ, i ka i taama cogo dɔn. I ka i madon ka lamɛnni kɛ, i kana sarakaw lase i ko hakilintan minw tɛ u yɛrɛw ka fililiw dɔn.