[1] Tɔgɔ ɲuman ka fisa ni tulu suma duman sɔngɔ gɛlɛn ye. Mɔgɔ sa don ka fisa ni a bange don ye.
[2] Ka taa sangabon dala, o ka fisa ni dumuniba so kɔnɔ taali ye, sabu o ye mɔgɔw bɛɛ laban ye, mɔgɔ ɲɛnamaw na u hakili to o la.
[3] Ɲɛnasisi ka fisa ni yɛlɛ ye, k'a masɔrɔ ɲɛnasisi bɛ mɔgɔ dusu sɔn hakili la.
[4] Hakilitigi dusukun bɛ sangabon kɔnɔ, nka hakilintan dusukun bɛ ɲɛnajɛ yɔrɔ la.
[5] Mɔgɔ hakiliman ka laadili lamɛnni ka fisa ni hakilintan ka dɔnkili dakan lamɛnni ye,
[6] sabu hakilintan yɛlɛkan bɛ i ko nwɔni pɛrɛnkan tasuma la. O fana ye fuu ye.
[7] Ka fanga digi mɔgɔ la, o bɛ hakilitigi kɛ hakilintan ye. Surɔ fɛn bɛ mɔgɔ dusu tiɲɛn.
[8] Fɛn laban ka fisa ni a daminɛ ye, sabali ka fisa ni kuncɛbaya ye.
[9] I dusu kana bɔ joona, katuguni dimiya bɛ to hakilintanw dusu la.
[10] I kan'a fɔ ko: «Mun y'a to tile tɛmɛnnen kɔrɔw ka fisa ni sisan tilew ye?» katuguni o ɲininkali tɛ hakilitigiya nɔ ye.
[11] Hakilitigiya nafa ni ciyɛn nafa bɛɛ ka kan, a ka fisa ni o ye don yebaaw fɛ.
[12] Hakilitigiya bɛ mɔgɔ mara i ko nafolo bɛ mɔgɔ mara cogo min na, dɔnniya min bɛ bɔ hakilitigiya la, o bɛ mɔgɔ ni mara.
[13] I ka miiri Ala ka kɛwalew la. Ala ye fɛn min kuru, jɔn bɛ se ka o latilen?
[14] I ka nisɔndiya hɛrɛ tuma la. I ka miirili kɛ sɛgɛn tuma la, k'a masɔrɔ u fila bɛɛ ye Ala nɔ ye walisa mɔgɔ kana a kɔ fɛ ko nata dɔn.
[15] Ne si tile surumanni fuuw kɔnɔ, ne y'a ye ko fɛn bɛɛ bɛ se ka kɛ. Mɔgɔ dɔ bɛ sa hali ni a tilennen don, k'a sɔrɔ dɔ bɛ si tile jan sɔrɔ hali ni a ka jugu.
[16] I kana tilen ka dama tɛmɛn, i kana i yɛrɛ kɛ hakilitigi ye fana ka dama tɛmɛn. Mun kosɔn i bɛ i yɛrɛ tiɲɛn?
[17] I kana juguya ka dama tɛmɛn, i kana kɛ hakilintan ye ka dama tɛmɛn fana. Mun kosɔn i ka sa i sa don ɲɛ?
[18] A ka ɲi ni i bɛ to u fila cɛmancɛ la, i kana dɔ bila, k'a masɔrɔ mɔgɔ min bɛ siran Ala ɲɛ, o man kan ka dantɛmɛn kow kɛ.
[19] Hakilitigiya bɛ barika di hakilitigi ma ka tɛmɛn dugu kɔnɔ fangatigi tan kan.
[20] Mɔgɔ tilennen si tɛ dugukolo kan min bɛ ko ɲuman kɛ ni a tɛ ko jugu si kɛ, siga tɛ o la.
[21] Kuma minw bɛ fɔ i ko la, i kana olu bɛɛ jate walisa i kana i ka baaraden ka kuma jugu fɔtaw mɛn i yɛrɛ ko la.
[22] I dusukun ye i yɛrɛ seere ye ko i fana ye kuma juguw fɔ mɔgɔ wɛrɛw ma.
[23] Ne ye o bɛɛ kɔrɔbɔ ni hakilitigiya ye k'a fɔ ko: «Ne b'a fɛ ka hakilitigiya wɛrɛ sɔrɔ.» Nka hakilitigiya yɔrɔ ka jan ne la.
[24] Min yɔrɔ ka jan, ni a ka dun kosɛbɛ, jɔn bɛ se ka o sɔrɔ?
[25] Ne ye ne kɔnɔ miiri kosɛbɛ ka hakilitigiya ni fɛnw kun ɲini ka u sɛgɛsɛgɛ ka u dɔn k'a dɔn fana ko jugu ye hakilintanya ye, nalonmaya ye fatɔya ye.
[26] Ne ye fɛn wɛrɛ ye min ka kuna ni saya ye, muso min dusukun bɛ jan ni juru da mɔgɔw ɲɛ, o bolo ye nɛgɛ juruw ye. Mɔgɔ min ko ka di Ala ye, o bɛ tila o muso la, nka a na jurumukɛlaw sɔrɔ.
[27] Waajulikɛla ko: «A filɛ, ne ye nin faamu. Ne ye fɛnw bɛɛ sɛgɛsɛgɛ ko ɲuman walisa ne ka u kun dɔn.
[28] Ne b'a la k'a ɲini halibi, nka ne m'a ye. Ne ye cɛ kelen sɔrɔ cɛ waa kelen cɛma, nka ne ma hali muso kelen sɔrɔ musow bɛɛ cɛma.
[29] Ne ye min sɔrɔ, o filɛ nin ye ko Ala ye mɔgɔ da ka kɛ tilennen ye nka mɔgɔw ye dabali caman ɲini.»