[1] Ko wɛrɛ filɛ nin ye, ne ye min ye ne ka miirili la, ne b'a fɛ ka o jɛya. Ne y'a ye ko mɔgɔ tilennenw ni mɔgɔ hakilimanw ani u ka kɛwalew bɛɛ bɛ Ala bolo. Ni kanuya don wala ni koniya don, Hadamaden tɛ o dɔn. Fɛn bɛɛ bɛ u ɲɛ.
[2] Fɛn bɛɛ bɛ mɔgɔw bɛɛ sɔrɔ cogo kelen na. Fɛn kelen min bɛ mɔgɔ tilennen sɔrɔ, o bɛ mɔgɔ jugu fana sɔrɔ. A bɛ mɔgɔ ɲuman jɛlen sɔrɔ ka mɔgɔ nɔgɔlen sɔrɔ. A bɛ saraka bɔbaa sɔrɔ, a bɛ saraka bɔbali sɔrɔ. Mɔgɔ ɲuman ni jurumukɛla ka kan. Kalilikɛla ani min bɛ siran kalili ɲɛ, olu ka kan.
[3] Kojuguba min bɛ tile jukɔrɔ, o filɛ nin ye, ko fɛn kelen bɛ mɔgɔ bɛɛ sɔrɔ. Ka fara o kan, ni mɔgɔ dusukun fara juguya la, hakilintanya bɛ sigi a dusukun na a si bɛɛ la. O kɔ, a bɛ sa.
[4] Ka Hadamaden ɲɛnama to mɔgɔw cɛma, jigi b'a la, k'a masɔrɔ hali wulu ɲɛnama ka fisa ni waraba su ye.
[5] Mɔgɔ ɲɛnamaw kɔni b'a dɔn ko u bɛ sa nka mɔgɔ salenw tɛ foyi dɔn. Olu fɛ, baraji tɛ yen. U ko tɛ to mɔgɔw kɔnɔ tun.
[6] U ka kanuya ni u ka koniya kow ani u ka ko latigɛlenw bɛɛ banna. Ko minw bɛ kɛ tile jukɔrɔ, u niyɔrɔ si tɛ olu la tun.
[7] I ka taa ka dumuni kɛ ni ɲagali ye ka i ka diwɛn min ni nisɔndiya ye sabu i ka kɛwalew diyara Ala ye.
[8] I ka fini jɛmanw don i kan na tuma bɛɛ ka tulu suma duman mun i kun na.
[9] I ka i ɲɛnajɛ ni i diyaɲe muso ye ka i ɲɛnama to, Ala ye si tile minw kalifa i ma tile jukɔrɔ sani olu ka ban, k'a masɔrɔ o ye i niyɔrɔ sɛbɛ ye i ka ɲɛnamaya la i ka baara kɛlenw cɛma tile jukɔrɔ.
[10] I bolo bɛ baara fɛn o fɛn sɔrɔ, i ka o kɛ ka kɛɲɛ ni i se ko ye, sabu baara wala miirili wala hakilitigiya wala dɔnniya tɛ lahara, i bɛ taa o yɔrɔ min na.
[11] Ne y'a ye tile jukɔrɔ ko kura ko ɲɔgɔn danni ko tɛ sen diya nɔ ye. Kɛlɛ yɔrɔ la se sɔrɔli tɛ fariya nɔ ye. Dumuni fɛn sɔrɔli tɛ hakilitigiya nɔ ye. Nafolotigiya tɛ faamuli nɔ ye. Madiyali tɛ dɔnniya nɔ ye. K'a masɔrɔ kow bɛɛ ni u waati ni u tuma don.
[12] Mɔgɔ si tɛ a sa don dɔn. Jɛgɛ bɛ minɛ jɔ la cogo min na, ani kɔnɔ bɛ minɛ folo la cogo min na ka bala u la, o cogo la mɔgɔ tɛ miiri don min na, bɔnɛ bɛ cun a kan o don na.
[13] Ne y'a ye tile jukɔrɔ ko nin hakilitigiya fana kɛra koba ye ne ɲɛ na.
[14] Dugu misɛn dɔ tun bɛ yen min kɔnɔ mɔgɔw tun man ca. Masakɛ barikama dɔ wulila olu kama k'a lamini kogow kooli
[15] k'a sɔrɔ faantan hakiliman dɔ tun bɛ o dugu kɔnɔ. O ye o dugu tila ni a ka hakilitigiya ye. O bɛɛ n'a ta mɔgɔ si tun tɛ miiri o faantan ko la.
[16] Ayiwa, ne ko hakilitigiya ka fisa ni barika ye, o bɛɛ n'a ta faantan ka hakilitigiya tɛ jate, mɔgɔ si tɛ a ka kumaw lamɛn.
[17] Ka i muɲu ka hakilitigi ka kuma lamɛn, o ka fisa ni hakilintanw kuntigi ka pɛrɛnkan lamɛnni ye.
[18] Hakilitigiya ka fisa ni kɛlɛkɛ minanw ye nka jurumukɛla kelen bɛ ko ɲuman caman tiɲɛn.