[1] Masakɛ Nebukadnezar ye ci bila ka taa mɔgɔw bɛɛ ni siyaw bɛɛ ani kanw bɛɛ fɔbaaw ma diɲɛ fan bɛɛ la ko: «Hɛrɛ ka kɛ aw ye.
[2] Sebaayabɛɛtigi Ala ye ko ɲuman kɛ ne ye ka kabakow ni taamashyɛnw jira ne la.
[3] «A ka taamashyɛn dan tɛ se ka dɔn, a ka sebaaya ka bon. A ka masaya ye masaya banbali de ye, a ka kuntigiya tɛ ban abada.
[4] «Ne, Nebukadnezar sigilen tun bɛ hɛrɛ ni lafiya la ne ka masaya so kɔnɔ.
[5] Ka ne to ne ka dalan kan, o yɔrɔ nin bɛɛ ne sugora. O ye ne lasiran kosɛbɛ. Ne ye yeli fɛn min ye, o ye ne ja tigɛ kosɛbɛ.
[6] O tuma la ne ye Babilonɛ hakilitigiw bɛɛ wele ko u ka na o sugo kɔrɔ fɔ ne ye.
[7] Ayiwa, filɛlikɛlaw ni dɔnbaaw ni jinɛmoriw ani sankolola taamashyɛn dɔnbaaw nana. Ne ye o sugo lakali u ye nka u ma se ka a kɔrɔ fɔ ne ye.
[8] O tuma la Daniɛl, min tɔgɔ dara ko Beltisazar, ne ka bato fɛn tɔgɔma don, bato fɛn senumaw ni bɛ o min na, o nana ne ɲɛ kɔrɔ. Ne ye ne ka sugo lakali o fana ye, ko:
[9] ‹Filɛlikɛlaw kuntigi Beltisazar, ne y'a dɔn ko bato fɛn senumaw ni bɛ i la, ko gundo si dogolen tɛ i ma. O de kosɔn i ka ne ka sugo ɲɛ fɔ ne ye k'a kɔrɔ fana jira.›
[10] «Ayiwa, ne ye yeli fɛn min ye ka ne to sunɔgɔ la, o filɛ nin ye. Ne ye filɛli kɛ. Ne ye jirisun jamanjan dɔ ye diɲɛ cɛmancɛ la.
[11] O jirisun bonyara ka barikaba sɔrɔ fo a cɛmancɛ bolo sera sankolow ma. A tun bɛ ye dugukolo fan bɛɛ la.
[12] A furaw tun ka ɲi, a denw tun ka ca kosɛbɛ. A tun bɛ kɛ mɔgɔ bɛɛ ka balo ye. Kungo sogow tun bɛ u da a suma la. Sanfɛ kɔnɔw tun bɛ u sigi a bolow la. Dafɛnw bɛɛ tun bɛ balo sɔrɔ a la.
[13] «Ka ne dalen to sunɔgɔ la, ne ye mɛlɛkɛ dɔ ye yeli fɛn na, o senuma jiginna ka bɔ sankolo la.
[14] O pɛrɛnna ni kanba ye ko: ‹A' ye nin jirisun tigɛ ka a bolow tigɛ ka a furaw bɔn duguma ka a denw jɛnsɛn. Kungo sogow ka boli ka bɔ a suma kɔrɔ, sanfɛ kɔnɔw ka bɔ a bolow la.
[15] O bɛɛ n'a ta a gungurun ni a diliw ka to dugukolo rɔ. U ka nɛgɛ jɔlɔkɔ ni nsiranɛgɛ jɔlɔkɔ siri a la kungo kɔnɔ bin cɛma. Sanfɛ ngomi ka a ɲigin. A ni kungo sogow ka bin dun ɲɔgɔn fɛ.
[16] A dusukun ka yɛlɛma ka kɛ i ko bagan dusukun. Waati wolonwula ka tɛmɛn a kan.
[17] O ko latigɛlen kɛra senumaw ka ci ye walisa fɛn ɲɛnamaw bɛɛ k'a dɔn ko Kɔrɔtalenba sigilen bɛ mɔgɔw ka masayaw bɛɛ kun na. A b'a di ka kɛɲɛ ni a yɛrɛ sago ye, a bɛ se hali mɔgɔw bɛɛ la majiginlen kɔrɔta.›
[18] Ayiwa ne, Nebukadnezar ye sugo min kɛ, o filɛ o ye. E, Beltisazar ka o kɔrɔ jira ne la sabu ne ka masaya la hakilitigi si tɛ se ka o kɔrɔ jira ne la. Nka e kɔni, i bɛ se, sabu bato fɛn senumaw ni bɛ i la.»
[19] O tuma la Daniɛl, min tɔgɔ dara ko Beltisazar, o ye waati dɔ ta. A ma se ka kuma o yɔrɔ nin kelen na. A hakili tun ɲaamina. Masakɛ y'a fɔ ko kura ko: «Beltisazar, o sugo ni a kɔrɔ fɔli kana i hakili ɲaami.» Beltisazar y'a jaabi ko: «Ne kuntigi, o sugo ka kɛ i koniyabaaw ta ye. A kɔrɔ ka kɛ i juguw ta ye.
[20] I ye jirisun min ye ni a bonyara k'a bolow se fo sankolo ma fo dugukolo kan mɔgɔw bɛɛ tun bɛ a ye,
[21] o jirisun min furaw cɛ tun ka ɲi, ni a denw tun ka ca fo a tun bɛ kɛ bɛɛ ka dumuni ye, fo kungo sogow tun bɛ u da a suma la ani sanfɛ kɔnɔw tun bɛ sigi a bolow la,
[22] o jirisun kɔni, o ye e yɛrɛ de ye, masakɛ. E kɛra mɔgɔba setigi ye. I bonyara fo ka se sankolo ma fo ka sigi dugukolo kan masayaw bɛɛ kun na.
[23] «Ayiwa masakɛ, i ye mɛlɛkɛ senuma min jigilen ye ka bɔ sankolo la, ni o y'a fɔ ko o jiri ka tigɛ ka halaki, ko nka a jiri gungurun ni a diliw ka to dugukolo rɔ, ko nɛgɛ jɔlɔkɔw ni nsiranɛgɛ jɔlɔkɔw ka siri a la kungo kɔnɔ binw cɛma, ko a ka ngomi sɔrɔ ka bɔ san fɛ, a ni kungo sogow na kɛ cogo kelen na fo ka waati wolonwula dafa.
[24] Masakɛ, o kɔrɔ filɛ nin ye. Kɔrɔtalenba ka ko latigɛlen filɛ nin ye. O kow na kɛ ne matigi masakɛ la ka dafa.
[25] E na gɛn ka bɔ mɔgɔw cɛma. I na sigi kungo waraw cɛma. I na bin dun i ko misi. Sankolo ngomi na i ɲigin. O waati wolonwula na dafa a cogo la fo i k'a dɔn ko Kɔrɔtalenba bɛ dugukolo kan masayaw bɛɛ mara. Mɔgɔ min ka di a ye, a bɛ o tigi kɔrɔta.
[26] A y'a fɔ ko gungurunkun ni a diliw minw ka to dugukolo rɔ, o kɔrɔ ko, i ka masaya na kɔsegin i ma ni i y'a dɔn ko sankolola Ala ye Sebaayabɛɛtigi ye tuma min na.
[27] O de kosɔn masakɛ, i ka sɔn ne ka lasɔmili ma ka fara i ka jurumu la ka tilennenya ko kɛ ka i ka tilenbaliya kow dabila ka makari faantanw na. I na hɛrɛ sɔrɔ.»
[28] O kow bɛɛ ye masakɛ Nebukadnezar sɔrɔ.
[29] Ayiwa, kalo tan ni fila tɛmɛnnen kɔ, k'a to yaala la a ka masaya so kɔnɔ a ka banbe kan Babilonɛ, masakɛ y'a fɔ ko:
[30] «Yala aw m'a dɔn ko ne ye Babilonɛ duguba nin jɔ wa? Ko ne ye nin masaya so jɔ ni ne yɛrɛ ka sebaaya ye k'a kɛ ne nɔɔrɔ ye wa?»
[31] Ka masakɛ to o kuma la, kumakan dɔ bɔra sankolo la ko: «Masakɛ Nebukadnezar, a fɔra ko i ka masaya na bɔsi i la.
[32] Ko i na gɛn ka bɔ mɔgɔw cɛma, ko i na sigi kungo sogow cɛma. I na bin dun i ko misi. Waati wolonwula na dafa fo i k'a dɔn tuma min na ko Kɔrɔtalenba sigilen bɛ Hadamadenw ka masayaw bɛɛ kun na. Mɔgɔ min ka di a ye, a bɛ a di o de ma.»
[33] O ko fɔlen kɛra Nebukadnezar la o waati yɛrɛ la. A gɛnna ka bɔ mɔgɔw cɛma. A ye bin dun i ko misi. A fari ɲiginna sanfɛ ngomiji fɛ. A kunsigi bonyara i ko bon kaman si. A bolo sɔninfaraw ni a sen sɔninfaraw kɛra i ko kɔnɔw ta. Nebukadnezar ko:
[34] «Nka o donw dafalen kɔ, ne Nebukadnezar ye ne ɲɛ kɔrɔta san fɛ. Ne hakili kɔsegira ne ma. Ne ye barika da Kɔrɔtalenba ye. Min ɲɛnama bɛ to badaa, ni a ka sebaaya banbali ye, ni a ka masaya tɛ ban, ne ye o tanu k'a bonya.
[35] Dugukolo kan mɔgɔw bɛɛ ye fuu ye a ɲɛ na. Min ka di a ye, a bɛ o de kɛ sankolola kɛlɛbolow la ani dugukolo kan mɔgɔw cɛma. Mɔgɔ si tɛ se ka a bolo bali wala k'a fɔ a ye ko: ‹I bɛ mun kɛ?›
[36] «Kabini o waati la, ne hakili segira ne ma. Ne ka masaya bonya ni ne ka saramaya ni ne ka nɔɔrɔ kɔsegira ne ma. Ne ka laadibaaw ani ne ka masaya la mɔgɔba ye ne wele tun. Ne kɔsegira ne ka masaya la, ne ka sebaaya bonyara ko kura.
[37] Ayiwa sisan, ne Nebukadnezar bɛ sankolola Masaba tanu k'a tɔgɔ bonya k'a bato. A ka kɛwalew bɛɛ ye tiɲɛ ye. A ka siraw tilennen don. Mɔgɔ minw bɛ taama kuncɛbaya sira fɛ, ale de bɛ se ka olu majigin.»