[1] Masakɛ Darius ye kuntigi kɛmɛ ni mugan sigi, olu tilatilara ka sigi a ka masaya mara yɔrɔw bɛɛ kun na.
[2] Kuntigi saba minw sigilen tun bɛ olu kun na, o la kelen tun ye Daniɛl ye. O kuntigiw tun ka kan ka u ka baara ɲɛ fɔ o cɛ saba ye walisa masakɛ ka fɛn si kana tiɲɛn.
[3] O bɛɛ n'a ta Daniɛl tun bɛ jate ka tɛmɛn o kuntigiw ni gɔfɛrɛnɛrɛw kan sabu a tun bɛ ko dɔn ka tɛmɛn tɔw kan. Masakɛ tun b'a fɛ ka Daniɛl sigi a ka mara bɛɛ kun na.
[4] Ayiwa kuntigiw ni gɔfɛrɛnɛrɛw tun bɛ cogo ɲini ka Daniɛl sendon o masaya kosɔn, nka u ma cogo si ni sababu si sɔrɔ ka o kɛ k'a masɔrɔ dannamɔgɔ tun don. O de kosɔn u ma se ka filili wala tilenbaliya ko si sɔrɔ a la.
[5] O tuma la o cɛw y'a fɔ ko: «An tɛ cogo si sɔrɔ ka Daniɛl sendon fo ni an y'a sɔrɔ a ka Ala ka sariya ko la.»
[6] Ayiwa o kuntigiw ni o gɔfɛrɛnɛrɛw y'u tɛliya ka taa masakɛ yɔrɔ k'a fɔ a ye ko: «Masakɛ Darius, i ka si sɔrɔ badaa.
[7] I ka masaya kuntigiw ni jamanatigiw ni gɔfɛrɛnɛrɛw ni laadibaaw ani komandanw bɛɛ y'a latigɛ ko masakɛ ka sariya sigi k'a gɛlɛya ko ni mɔgɔ o mɔgɔ ye bato fɛn wɛrɛ wala mɔgɔ wɛrɛ deli tile bisaba kɔnɔ ni e masakɛ yɛrɛ tɛ, o tigi ka fili dingɛ kɔnɔ warabaw kɔrɔ.
[8] Ayiwa masakɛ, i ka o sariya sigi ka i tɔgɔ sɛbɛn a kan sisan walisa o kana se ka yɛlɛma, k'a masɔrɔ o ye Medikaw ni Persekaw ka sariya ye, o tɛ se ka yɛlɛma.»
[9] Masakɛ Darius ye a tɔgɔ sɛbɛn o sɛbɛnni ni o sariya kan.
[10] Daniɛl y'a mɛn ko o sariya tara tuma min na, a donna a ka sankanso bon kɔnɔ. O finɛtiriw da yɛlɛlen tora ka sin Jerusalɛm fan fɛ. A ye i ɲɔngiri yen siɲɛ saba don o don ka Ala deli i ko a tun delila k'a kɛ cogo min na.
[11] O tuma la o cɛw girinna ka taa. U y'a sɔrɔ Daniɛl bɛ a ka Ala deli k'a bonya.
[12] O yɔrɔ nin bɛɛ u taara masakɛ sɛgɛrɛ ka kuma a fɛ o sariya sigilen ko la, ko: «Masakɛ, yala e ma sariya sigi ko ni mɔgɔ o mɔgɔ ye bato fɛn wɛrɛ wala mɔgɔ wɛrɛ deli tile bisaba kɔnɔ ni e tɛ, ko o na fili dingɛ kɔnɔ warabaw kɔrɔ wa?» Masakɛ ye u jaabi ko: «O ye tiɲɛ ye ka kɛɲɛ ni Medikaw ni Persekaw ka sariya ye, o tɛ se ka yɛlɛma.»
[13] U y'a fɔ masakɛ ye ko: «E masakɛ, Daniɛl min ye Juda bɔnsɔn jɔnw la kelen ye, o tɛ i jate. A tɛ i ka sariya fana jate nka a bɛ a ka delili kɛ siɲɛ saba don o don.»
[14] Masakɛ ye o kuma mɛn tuma min na, o digira a la kosɛbɛ. A y'a miiri a yɛrɛ kɔnɔ ko a bɛ Daniɛl tila. A ye cogo bɛɛ kɛ ko a na Daniɛl kisi sani tile ka bi.
[15] Nka o mɔgɔw bolila ka taa masakɛ sɛgɛrɛ k'a fɔ a ye ko: «Masakɛ, i k'a dɔn ko, ka kɛɲɛ ni Medikaw ni Persekaw ka sariya ye, ko a tɛ bɛn ka masakɛ ka sariya sigilen dɔ yɛlɛma.»
[16] O tuma la masakɛ ye ci di ko u ka Daniɛl fili dingɛ kɔnɔ warabaw kɔrɔ. Masakɛ y'a fɔ Daniɛl ye ko: «I bɛ baara kɛ i ka Ala min ye tuma bɛɛ ni i barika bɛɛ ye, o yɛrɛ ka i kisi.»
[17] O kɔ, u ye kabakurun dɔ ta ka waraba dingɛ da tugu. Masakɛ ye a yɛrɛ ni a ka kuntigiw ka taamashyɛn kɛ o kan walisa foyi kana yɛlɛma Daniɛl ko la.
[18] O kɔ, masakɛ taara a ka masaya so kɔnɔ. A ye su bɛɛ kɛ, a ma sɔn ka dumuni kɛ. A ma sɔn muso ka na a yɔrɔ la, a ma se ka sunɔgɔ.
[19] Dugu jɛ da fɛ masakɛ solila ka wuli ka tɛliya ka taa warabaw dingɛ da fɛ.
[20] A gɛrɛlen dingɛ da la, a ɲɛnasisilen ye Daniɛl wele ko: «Ala ɲɛnama ka jɔnkɛ Daniɛl, i ka Ala, i bɛ baara kɛ o min ye, o sera ka i kisi warabaw ma wa?»
[21] O yɔrɔ nin bɛɛ, Daniɛl ye masakɛ jaabi ko: «Masakɛ, i ka si sɔrɔ badaa.
[22] Ne ka Ala ye a ka mɛlɛkɛ ci ka na warabaw daw siri. U ma se ka foyi kɛ ne la, sabu ne jalakibali tun don Ala ɲɛ kɔrɔ. Masakɛ, ne jalakibali don e fana ɲɛ kɔrɔ. Ne ma filili si kɛ.»
[23] O tuma la masakɛ nisɔndiyara kosɛbɛ haali. A ye ci di ko u ka Daniɛl labɔ warabaw dingɛ kɔnɔ. U ye Daniɛl labɔ warabaw dingɛ kɔnɔ. U ma joginda ye a yɔrɔ si la, sabu a jigi dalen tun bɛ a ka Ala kan.
[24] Masakɛ ye ci di ko u ka na ni Daniɛl sendonbaaw ye ka olu ni u denw ani u musow fili dingɛ kɔnɔ warabaw cɛma. Sani olu ka se dingɛ ju la, warabaw ye u bɛɛ minɛ ka u farafara ka u kolow bɛɛ karikari.
[25] O tuma la masakɛ Darius ye sɛbɛnni kɛ k'a ci mɔgɔw bɛɛ ni siyaw bɛɛ ani kan wɛrɛ fɔbaaw bɛɛ ma dugukolo fan bɛɛ la ko: «Hɛrɛ ka kɛ aw ye k'a caya.
[26] Ne bɛ ci di ko mɔgɔw bɛɛ ka u biri Daniɛl ka Ala kɔrɔ k'a bato ne ka mara yɔrɔw bɛɛ la. K'a masɔrɔ Ala ɲɛnama don, a bɛ to badaa. A ka masaya tɛ tiɲɛn, a ka kuntigiya tɛ ban.
[27] A bɛ kisili kɛ, a bɛ mɔgɔ tila. A bɛ taamashyɛnw ni kabakow kɛ sankolo la ani dugukolo kan. Ale de ye Daniɛl tila ka bɔ warabaw da la.»
[28] Ayiwa Daniɛl ye tɔgɔba sɔrɔ Darius ka masaya ni Perse masakɛ Sirus ka masaya waatiw la.