[1] Nebukadnezar ka masaya san filanan la, a sugora. A ja tigɛra fo ka sunɔgɔ tigɛ a ɲɛ la.
[2] O tuma la masakɛ ye ci di ko u ka u ka filɛlikɛlaw ni dɔnbaaw ni subaaw ani jinɛmoriw bɛɛ wele ka na a yɔrɔ la ko u k'a ka sugo ɲɛ fɔ a ye. Olu nana k'u jɔ masakɛ ɲɛ kɔrɔ.
[3] Masakɛ y'a fɔ u ye ko: «Ne sugora, o sugo ye ne hakili ɲaami. Ne b'a fɛ ka a kɔrɔ dɔn.»
[4] Kaldekaw y'a fɔ masakɛ ye Sirikaw ka kan na ko: «Masakɛ, i ka si sɔrɔ badaa. I ka i ka sugo lakali i ka jɔnw ɲɛ na. An na a kɔrɔ fɔ i ye.»
[5] Masakɛ ye Kaldekaw jaabi ko: «Ne y'a latigɛ ko ni aw ma o sugo ɲɛ fɔ ne ye k'a kɔrɔ fana fɔ, ne na aw tigɛtigɛ. Aw ka sow na kɛ tomon ye.
[6] Nka ni aw ye o sugo ni a kɔrɔ fɔ ne ye, ne na nili fɛnw ni bonyali fɛnw ni tɔgɔba di aw ma. Ayiwa, a' ye ne ka sugo ni a kɔrɔ fɔ ne ye sa.»
[7] U y'a fɔ ko kura ko: «Masakɛ, i ka o sugo ɲɛ fɔ i ka jɔnw ye, an na a kɔrɔ fɔ i ye.»
[8] Masakɛ ye u jaabi ko: «A filɛ, aw b'a fɛ ka waati dɔ sɔrɔ sabu aw y'a dɔn ko ne ye o latigɛ ka ban.
[9] Nka ni aw ma o sugo ni a kɔrɔ fɔ ne ye, aw bɛɛ na faga, k'a masɔrɔ aw bɛɛ jɛra ka nin nkalon kuma fɔ, sabu aw bɛ miiri ko nin ko na yɛlɛma. A' ye ne ka sugo ɲɛ fɔ ne ye sa. Ni o kɛra, ne n'a dɔn ko aw bɛ se ka a kɔrɔ fɔ ne ye.»
[10] Kaldekaw ye kuma ta masakɛ ɲɛ kɔrɔ k'a jaabi ko: «Masakɛ, i bɛ min ɲini, mɔgɔ si tɛ dugukolo kan min bɛ se ka o fɔ i ye. Masakɛ, setigi si ma a ka dɔnbaaw ni filɛlikɛlaw ani jinɛmoriw si ɲininka o ɲɔgɔn na fɔlɔ.
[11] O de kosɔn i ye ɲininkali min kɛ, o ka gɛlɛn. Mɔgɔ si tɛ se ka o lakali k'a kɔrɔ fɔ i ye fo bato fɛn minw sigilen tɛ mɔgɔw cɛma.»
[12] Masakɛ dusu bɔra. A diminna kosɛbɛ o kuma kosɔn. O de kosɔn a ye ci di ko Babilonɛ hakilitigiw bɛɛ ka faga.
[13] Ayiwa, o welewele dara ko u ka o hakilitigiw bɛɛ faga. O kɔ, u ye Daniɛl ni a tɔɲɔgɔnw ɲini ko olu fana ka faga.
[14] O tuma la masakɛ ka garadiw kuntigi Arijok bɔra ko a bɛ taa Babilonɛ hakilitigiw bɛɛ faga. Daniɛl kumana ni hakilitigiya ani faamuli ye o ɲɛ na.
[15] A y'a fɔ masakɛ ka garadiw kuntigi Arijok ye ko: «Mun y'a to masakɛ kɔrɔtɔra a ka ci fɔlen na?» Arijok ye o sababu fɔ Daniɛl ye.
[16] O yɔrɔ nin bɛɛ Daniɛl taara masakɛ ka masaya so kɔnɔ ka masakɛ deli ko o ka waati di a ma, ko a na o sugo kɔrɔ fɔ a ye.
[17] O kɔ, Daniɛl taara a ka so ka o kuma fɔ a tɔɲɔgɔnw Hananiya ni Misaɛl ani Azariya ye.
[18] A y'a fɔ u ye ko u ka sankolola Ala deli walisa a ka makari u la ka o gundo jira u la walisa Daniɛl ni a tɔɲɔgɔnw ani Babilonɛ hakilitigiw kana faga ɲɔgɔn fɛ.
[19] Ayiwa, o gundo jirala Daniɛl la yeli fɛn na su fɛ. Daniɛl ye barika da sankolola Ala ye.
[20] A ko: «Ala tɔgɔ ka tanu badaa badaa, k'a masɔrɔ hakilitigiya ni sebaaya ye ale de ta ye.
[21] Ale de bɛ tumaw ni waatiw yɛlɛma, a bɛ masakɛ dɔw labi ka masakɛ dɔw lasigi. A bɛ hakili di hakilitigi ma ka dɔnniya di ko dɔnnaw ma.
[22] Ale de bɛ ko dunbaw ni gundow labɔ kɛnɛkan. A bɛ dibi la kow dɔn. Kɛnɛyeelen sigilen bɛ ale fɛ yen.
[23] Ne bɛnbaw ka Ala, ne bɛ barika da i ye ka i tanu, i ka hakilitigiya ni barika dilen kosɔn ne ma. An ye min deli i fɛ, i ye o jira ne la sisan ka masakɛ ka gundo ɲɛ jira an na.»
[24] O de kosɔn, masakɛ tun ye ci di Arijok min ma ko a ka Babilonɛ hakilitigiw bɛɛ faga, Daniɛl taara o sɛgɛrɛ k'a fɔ o ye ko: «I kana Babilonɛ hakilitigiw faga. I ka taa ni ne ye masakɛ yɔrɔ. Ne na o sugo kɔrɔ fɔ a ye.»
[25] O yɔrɔ nin bɛɛ Arijok taara ni Daniɛl ye masakɛ yɔrɔ k'a fɔ a ye ko: «Masakɛ, ne ye mɔgɔ dɔ sɔrɔ Juda bɔnsɔn mɔgɔ cɛlenw cɛma, o na i ka sugo kɔrɔ fɔ i ye.»
[26] O tuma la Daniɛl, min bɛ wele Beltisazar, masakɛ y'a fɔ o ye ko: «Sɛbɛ la, i bɛ se ka ne ka sugo ɲɛ fɔ k'a kɔrɔ fana fɔ ne ye wa?»
[27] Daniɛl ye masakɛ jaabi ko: «Masakɛ, i b'a fɛ ka gundo min dɔn, hakilitigiw ni filɛlikɛlaw ni dɔnniyakɛlaw ni sankolo taamashyɛn dɔnbaaw si tɛ se ka o jira i la.
[28] Nka sankolola Ala kelenpe de bɛ se ka o gundow bɔ kɛnɛkan. Ko minw na kɛ waati nataw la, a ye o de jira e, masakɛ Nebukadnezar la. Ayiwa i ka sugo ni yeli fɛn minw jirala i la ka i to sunɔgɔ la, olu filɛ nin ye.
[29] «Ayiwa masakɛ, ko minw jirala i la ka i to sunɔgɔ la, o bɛ ko nataw de jira. Min bɛ gundow bɛɛ jira, o ye ko nataw jira i la.
[30] O gundo ma jira ne la ko ne hakili ka bon ka tɛmɛn mɔgɔ tɔw bɛɛ kan, nka a kɛra walisa ne ka o kɔrɔ jira i la ani i ka i dusukun na miiriliw dɔn.
[31] «Masakɛ, i ɲɛ ye mɔgɔ bisigi belebeleba dɔ ye. O ja bisigi tun ka bon, a tun bɛ manamana kosɛbɛ. A jɔlen tun bɛ i ɲɛ kɔrɔ. A ye cogo tun bɛ i lasiran kosɛbɛ.
[32] O ja kunkolo tun ye sanu yɛrɛwolo ye. A disi ni a bolokalaw tun ye warijɛ ye. A kɔnɔbara ani a worow tun ye nsiranɛgɛ ye.
[33] A senkalaw tun ye nɛgɛfin ye. A sentɛgɛw tun ye nɛgɛfin ni bɔgɔ kolonsolen ye.
[34] Ka i to o ja filɛli la, kabakurun dɔ walola a yɛrɛma ka bɔ kulu la ka na o ja sentɛgɛw nɛgɛfin ni bɔgɔ kolonsolen gosi ka o sentɛgɛw karikari.
[35] Ayiwa, o nɛgɛ ni a bɔgɔ ni o nsiranɛgɛ ni o warijɛ ni o sanu bɛɛ karikarila yɔrɔ nin kelen. A kɛra i ko suman tigɛ tuma la gendekɛnɛ la nwɛɲɛ min bɛ taa fiɲɛ fɛ ka ban pewu. Nka kabakurun min nana o ja gosi, o kabakurun kɛra kulu belebeleba ye ka dugukolo yɔrɔw bɛɛ fa.
[36] «Ayiwa sugo ɲɛ fɔlen filɛ o ye. An bɛ na a kɔrɔ fɔ i ye sisan.
[37] Masakɛ, e min ye masakɛw ka masakɛ ye, sankolola Ala ye masaya ni sebaaya ni barika ani nɔɔrɔ di i ma.
[38] A ye i sigi Hadamadenw ni kungo sogow ani sanfɛ kɔnɔw bɛɛ kun na. I kɛra u bɛɛ kuntigi ye. I ye o kunkolo sanuma de ye.
[39] Masaya wɛrɛ na wuli i kɔ min barika ka dɔgɔ i ta ye. A sabanan ye nsiranɛgɛ ye. O na diɲɛ bɛɛ mara.
[40] O kɔ, masaya naaninan barika na kɛ i ko nɛgɛfin barika. Nɛgɛfin bɛ fɛn bɛɛ ɲɔɲɔ ka u karikari cogo min na, o masaya na masaya tɔw karikari ka u ɲɔɲɔ ten.
[41] I ye sen ni sennkɔni minw ye, ni olu tun ye nɛgɛfin ni bɔgɔ ɲaaminen ye, o ye masaya tilalen de ye nka o masaya fan kelen barika na bonya, sabu i ye nɛgɛfin ni bɔgɔ ɲaaminen ye ɲɔgɔn na.
[42] O sennkɔniw tun ye nɛgɛfin ni bɔgɔ ɲaaminen ye ɲɔgɔn na cogo min na, o masaya fan kelen barika na bonya ka fan dɔ barika dɔgɔya ten.
[43] I y'a ye ko bɔgɔ ɲaaminen tun bɛ o nɛgɛfin na. O masaya ni Hadamaden tɔw na jɛ, nka u tɛna ɲɔgɔn minɛ i ko nɛgɛfin ni bɔgɔ ɲaaminen tɛ ɲɔgɔn minɛ cogo min na.
[44] O masakɛw ka masaya waatiw la, sankolola Ala na masaya wɛrɛ lawuli. O tɛna se ka tiɲɛn. O masaya tɛna don siya wɛrɛ bolo. O masaya na masaya tɔw tiɲɛn ka u halaki. Ale yɛrɛ na sigi masaya la badaa.
[45] I ye kabakurun min walolen ye a yɛrɛma ka bɔ kulu la ka na, ni o ye bɔgɔ ni nɛgɛfin ani nsiranɛgɛ ni warijɛ ani sanu karikari, o kabakurun de bɛ o masaya jira. Ko minw na kɛ bi kɔ, Sebaayabɛɛtigi Ala ye o de jira i la. Ayiwa o sugo ko ye ko wulibali de ye, a kɔrɔ fɔlen ye tiɲɛ ye.»
[46] O tuma la masakɛ Nebukadnezar ye i bi k'a ɲɛ biri duguma Daniɛl kɔrɔ. A ye ci di ko u ka na ni nili fɛnw ani suma diyalanw ye ka olu di Daniɛl ma.
[47] O kɔ, masakɛ y'a fɔ Daniɛl ye ko: «Tiɲɛ la, i ka Ala ye bato fɛnw kunna Ala ye ani masakɛw ka Matigi. A ye o gundo bɔ kɛnɛkan, sabu i ye o ko dogolen jira ne la.»
[48] Masakɛ ye dɔ fara Daniɛl fanga kan ka nafoloba ni nili fɛn caman di a ma. A ye Daniɛl sigi ka kɛ Babilonɛ jamana bɛɛ kuntigi ye ka a kɛ Babilonɛ mara la hakilitigiw kalanfa ye.
[49] Daniɛl ye masakɛ deli, masakɛ ye Sadrak ni Mesak ani Abɛd-Nego sigi Babilonɛ jamana kun na. Daniɛl yɛrɛ tora masaya so kɔnɔ yen.