[1] Masakɛ Belsazar ka masaya san sabanan la, ne Daniɛl ye yeli fɛn dɔ wɛrɛ ye ne ka yeli fɛn fɔlɔ tɛmɛnnen kɔ.
[2] O yeli fɛn ye tuma la, ne taara ne yɛrɛ sɔrɔ Elam jamana masakɛ sigi dugu Suse kɔnɔ. Ne taara Ulayi ba da la o yeli fɛn na.
[3] Ne ye ne ɲɛ kɔrɔta ka sagajigi dɔ jɔlen ye ba da la yen. Biɲɛkolo fila tun bɛ a la. O biɲɛkolo fila bɛɛ tun ka jan nka kelen tun ka jan kelen ye. Min ka jan, o bɔra dɔ bɔlen kɔ.
[4] Ayiwa, ne y'a ye ko o sagajigi tun bɛ tuuli kɛ ni a biɲɛkolow ye tilebi yanfan ni saheli yanfan ni worodugu yanfan fɛ. Dantan fɛn si ma se ka a bali. Mɔgɔ si tun tɛ se ka fɛn tila a la. Fɛn o fɛn tun ka di a ye, a tun bɛ o de kɛ. A barika bonyara kosɛbɛ.
[5] Ka ne to o ko miirili la, ne ye bakɔrɔ dɔ bolitɔ ye ka bɔ tilebi yanfan fɛ ka dugukolo yɔrɔw bɛɛ boliboli k'a sɔrɔ a sen ma se duguma. Biɲɛkolo kelen tun bɛ o bakɔrɔ ɲɛw furancɛ la.
[6] Ne tun ye sagajigi biɲɛ fila tigi min ye ba da la, a taara fo ka se o ma. A girinna ka da o kan ni a barika bɛɛ ye.
[7] Ne y'a ye ko a ye o sagajigi kɛlɛ. A diminnen ye o biɲɛkolo fila kari. Barika tun tɛ sagajigi la k'a kɛlɛ. Bakɔrɔ y'a bi duguma ka a cɔngɔ a sen kɔrɔ. Mɔgɔ si ma se ka sagajigi tila a la.
[8] Bakɔrɔ fana barika bonyara, nka a ye barikaba sɔrɔ tuma min na, a biɲɛkolo janba karila. Ne ye biɲɛkolo naani bɔlen ye o nɔ na ka sin sankolo fiɲɛ bɔ fan naani fɛ.
[9] Biɲɛkolo misɛn wɛrɛ bɔra o biɲɛkolow la kelen na ka janya ka sin worodugu yanfan ni kɔrɔn yanfan ani jamana ɲuman ɲuman yanfan fɛ.
[10] O biɲɛkolo janyara fo ka se sankolola kɛlɛbolo ma ka o kɛlɛbolo dɔw ani dolo dɔw sama ka bi duguma ka olu cɔngɔ a sen kɔrɔ.
[11] A ye a yɛrɛ bonya fo ka a yɛrɛ kɛɲɛ ni kɛlɛbolow kuntigi ye. A ye don o don saraka jenita bɔsi o la ka o sigi yɔrɔ senuma ci.
[12] Kɛlɛbolo ni don o don saraka jenitaw donna a bolo jurumu kosɔn. O biɲɛkolo ye tiɲɛ fili duguma. A ka ko kɛtaw bɛɛ ɲɛna.
[13] Ayiwa ne ye senuma dɔ kumakan mɛn. Senuma dɔ wɛrɛ y'a fɔ o kuma fɔbaa ye ko: «O don o don saraka jenita yeli fɛn na to fo tuma jumɛn? Nin jurumuba na kɛ saraka nɔ na fo tuma jumɛn? Yɔrɔ senuma ni kɛlɛbolo na cɔngɔ sen kɔrɔ fo tuma jumɛn?»
[14] A ye ne jaabi ko: «Fo tile waa kelen ni kɛmɛ ani biduuru ka tɛmɛn. O waati bɛɛ la, sɔgɔma ni wula fɛ sarakaw tɛna bɔ. O kɔ, yɔrɔ senuma na saniya ko kura.»
[15] Ka ne Daniɛl to miirili la, o yeli fɛn ni a kɔrɔ ko la, dɔ jɔlen tun bɛ ne ɲɛ fɛ, o bɛ i ko Hadamaden.
[16] Ne ye kumakan dɔ mɛn ka bɔ Ulayi baji cɛmancɛ la. O pɛrɛnna k'a fɔ ko: «Gabriɛl, i ka o yeli fɛn kɔrɔ jira nin cɛ la.»
[17] O tuma la Gabriɛl nana ne yɔrɔ. K'a gɛrɛtɔ to ne la, ne ja tigɛra. Ne ye ne bi ka ne ɲɛ biri duguma. A y'a fɔ ne ye ko: «Hadamaden, i k'a dɔn k'a jɛya ko o yeli fɛn bɛ laban kow jira.»
[18] K'a to kuma la ne fɛ, ne kirinna. Ne ɲɛ birilen tun bɛ duguma nka a magara ne la ka ne lawuli.
[19] A ko: «Ko min na kɛ a waati latigɛlen na, ne bɛ o jira i la. Ala ka dimiya bɛ ban o de kan.
[20] I ye sagajigi min ye ni biɲɛkolo fila tun bɛ a kun, o biɲɛkolow ye Medi ni Perse masakɛw ye.
[21] O bakɔrɔ ye Javan masakɛ ye. Biɲɛkolo jamanjan min bɛ a ɲɛw furancɛ la, o ye masakɛ fɔlɔ de ye.
[22] O biɲɛkolo na kari. Biɲɛkolo naani wɛrɛw na bɔ a nɔ na. O ye masaya naani ye minw na bɔ o siya la nka olu barika tɛna a ta bɔ.
[23] Olu ka masaya laban waati la ni tilenbaliya kow dafara tuma min na, masakɛ farin kegunman na wuli.
[24] A barika na bonya nka o tɛna kɛ a yɛrɛ barika ye. A na kabako tiɲɛnniw kɛ. A ka ko kɛtaw na ɲɛ. A na se sɔrɔ barikamaw ni senumaw kan ka u halaki.
[25] A ka nanbara kow na ɲɛ a ka keguya kosɔn. O tuma la a na fa kuncɛbaya la. A na mɔgɔ caman faga hɛrɛ waati la. A na wuli masakɛw ka Masakɛ kama nka a fanga na tiɲɛn k'a sɔrɔ mɔgɔ bolo ma se a ma.
[26] Sɔgɔma da ni wula da fɛ yeli fɛn min ko fɔra, o ye tiɲɛ ye, nka i ka o yeli fɛn ko to i kɔnɔ k'a kɛ gundo ye sabu a bɛ waati jan ko de fɔ.»
[27] Ayiwa, ne Daniɛl barika banna fo ka ne bana tile dama dɔw kɔnɔ. O kɔ, ne wulila ka masakɛ ka kow ɲɛnabɔ. Ne kɔnɔna filila o yeli fɛn kosɔn, nka mɔgɔ si ma ne hakili ɲaami kun dɔn.