[1] Perse masakɛ Sirus ka masaya san sabanan la, ko dɔ jirala Daniɛl la. A bɛ wele fana ko Beltisazar. O ko tun ye tiɲɛ ye, a bɛ ko jugu nata ko fɔ. Daniɛl ye o yeli fɛn ni a kɔrɔ faamu.
[2] O waati la, ne Daniɛl ɲɛnasisilen tun don dɔgɔkun saba kɔnɔ.
[3] Ne ma dumuni fɛn ɲuman si dun, sogo wala diwɛn si ma don ne da la. Ne ma ne fari mun ni tulu si ye fo ka o dɔgɔkun saba dafa.
[4] San kalo fɔlɔ tile mugan ni naaninan don, ne taara ne yɛrɛ sɔrɔ Tigire ba da la.
[5] Ne ye ne ɲɛ kɔrɔta ka filɛli kɛ. O yɔrɔ nin bɛɛ, ne ye cɛ dɔ ye. Lenfu fini tun bɛ a kan na. Ufaz sanu yɛrɛwolo cɛ sirilan tun kɛra ka a cɛ siri.
[6] A farikolo tun bɛ i ko krisolite kabakurun. A ɲɛda tun bɛ manamana i ko san yɛgɛyɛgɛ. A ɲɛw tun bɛ i ko tasuma manabaw. A bolokalaw ni a senkalaw tun bɛ i ko nsiranɛgɛ yɛrɛntɔ. A kumakan tun bɛ i ko jamaba mankan.
[7] Ne Daniɛl kelenpe ye o yeli fɛn ye. Minw tun bɛ ne fɛ yen, olu si m'a ye nka ja tigɛba ye olu sɔrɔ. Olu bolila ka taa u dogo.
[8] Ayiwa, ne kelen tora yen. Ne ye o yeli fɛnba ye minkɛ, ne barika banna. Ne ɲɛda cogo yɛlɛmana ka fin i ko fɛn tolilen. O ye ne barika bɛɛ ban.
[9] Ne ye o cɛ kumakan mɛn minkɛ, o yɔrɔ nin bɛɛ ne kirinna ka ne bi ka ne ɲɛ biri duguma.
[10] O tuma la dɔ bolo magara ne la ka ne lawuli ka ne ɲɔngiri ne kunberew kan ka ne tɛgɛ fila to duguma.
[11] O kɔ, a y'a fɔ ne ye ko: «Daniɛl, Ala bɛ i kanu. I ka ne ka kuma fɔtaw kɔlɔsi. Wuli ka i jɔ, sabu ne cira i ma sisan.» A kumana ne fɛ tuma min na, ne yɛrɛyɛrɛtɔ wulila ka ne jɔ.
[12] A y'a fɔ ne ye ko: «Daniɛl, i kana siran, sabu kabini i ye i yɛrɛ majigin i ka Ala ɲɛ kɔrɔ don min na walisa i ka nin yeli fɛn kɔrɔ faamu, i ka delili jaabira. Ne nana i ka kuma fɔlen kosɔn.
[13] Perse masaya kuntigi ye ne bali tile mugan ni kelen kɔnɔ nka kuntigibaw la kelen min tɔgɔ ko Mikaɛl, o nana ne dɛmɛ. O de kosɔn ne mɛnna Perse jamana masakɛw fɛ yen.
[14] A filɛ, ko minw na i ka mɔgɔw sɔrɔ laban donw na, ne na o jira i la sisan k'a masɔrɔ o yeli fɛn bɛ waati jan ko de fɔ.»
[15] K'a to o kumaw fɔli la, ne ye ne ɲɛ biri duguma, ne ma se ka kuma.
[16] O yɔrɔ nin bɛɛ, cɛ min bɔlen bɛ Hadamaden fɛ, o magara ne dawolo la. O tuma la ne ye ne da yɛlɛ ka kuma. Cɛ min jɔlen tun bɛ ne ɲɛ fɛ, ne y'a fɔ o ye ko: «Ne matigi, nin yeli fɛn ye ne hakili ɲaami fo ka ne barika ban.
[17] Ne matigi ka jɔnkɛ bɛ se ka kuma ne matigi fɛ cogo di? Ayiwa barika si tɛ ne la tun, ne ninakili minɛna.»
[18] Min bɔlen bɛ Hadamaden fɛ, o magara ne la ko kura ka barika di ne ma.
[19] O y'a fɔ ne ye ko: «Ala ka cɛ kanulen, i kana siran. Hɛrɛ ka kɛ i ye. I ja gɛlɛya, i ja gɛlɛya.» K'a to kuma la ne fɛ, ne ye barika sɔrɔ. Ne y'a fɔ ko: «Ne matigi, i ka kuma, sabu i ye barika don ne la.»
[20] A y'a fɔ ne ye ko kura ko: «Ne nana i yɔrɔ la kun min na, i bɛ o dɔn wa? Ko min sɛbɛnna tiɲɛ kitabu kɔnɔ, ne nana o jira i la. Ayiwa sisan ne bɛ kɔsegin ka taa Perse kuntigi kɛlɛ. Ni ne taara, Javan kuntigi bɛ na. Mɔgɔ si tɛ ne dɛmɛ ka o kuntigi juguw kɛlɛ fɔ aw kuntigi Mikaɛl kelenpe.