[1] Kabini Medi masakɛ Darius ka masaya san fɔlɔ la, ne tun bɛ a kɔrɔ k'a dɛmɛ k'a mara.
[2] Ayiwa ne na tiɲɛ jira i la sisan.» Mɛlɛkɛ ko: «Masakɛ saba wɛrɛ na wuli Perse jamana kɔnɔ. Olu naaninan na kɛ fɛntigiba ye ka tɛmɛn u tɔw bɛɛ kan. Ni a ka fɛnw jiidira tuma min na, a na wuli ni a barika bɛɛ ye Javan masaya kama.
[3] «Nka masakɛ ja gɛlɛn dɔ na wuli ka a ka masaya mara ni sebaayaba ye. O na a yɛrɛ sago kɛ.
[4] Ni o ye barika sɔrɔ, o ka masaya na tiɲɛn ka tilatila diɲɛ fan naani la. A bɔnsɔn tɛna masaya wala barika sɔrɔ k'a masɔrɔ o masaya na tila mɔgɔ wɛrɛw cɛ.
[5] «Worodugu yanfan masakɛ barika na bonya, nka o ka kɛlɛbolo kuntigi kelen barika na bonya a ta ye ka sebaaya sɔrɔ. O ka masaya barika na bonya kosɛbɛ.
[6] San dama dɔ mana tɛmɛn, o masakɛw na layidu ta ɲɔgɔn ye. Worodugu yanfan masakɛ denmuso na di saheli yanfan masakɛ ma furu la ka u ka layidu sinsin. O denmuso fa ni a furucɛ na o layidu mara waati dɔɔnin kɔnɔ, nka a fa na a ni a furucɛ janfa, ale ni a cɛ ani minw taara a fɛ. U bɛɛ na faga.
[7] Nka bɔnsɔn wɛrɛ na wuli ka bɔ o muso la ka a fa nɔ ta. O na kɛ kɛlɛkɛ cɛ ye. O na don saheli yanfan masakɛ ka kɛlɛ kunbɛn so kɔnɔ ka se sɔrɔ o masakɛ kan ka a sago kɛ o la.
[8] A na o masakɛ ka bato fɛnw ani a ka nɛgɛ yeelelen jaw ani a ka sanu yɛrɛwolo minanw ni warijɛ minanw minɛ ka taa ni u ye Misira. O kɔ, a na i mabɔ saheli yanfan masakɛ la san dama dɔ kɔnɔ.
[9] O na wuli ka taa worodugu yanfan masakɛ kama ka o kɛlɛ, o kɔ ka kɔsegin a ka jamana kɔnɔ.
[10] «Nka ni kɛlɛbolo dama dɔnbali lajɛra tuma min na, o denkɛw na bɔ ka taa kɛlɛ la. O kɛlɛbolo bɛ gɛrɛ i ko kɔji woyotɔ ka jamana bɛɛ fa ka kɛlɛ kɛ fo ka taa se kɛlɛ kunbɛn so ma.
[11] O tuma la worodugu yanfan masakɛ diminnen na wuli ka bɔ ka taa saheli yanfan masakɛ kɛlɛ. A ka kɛlɛkɛ cɛw na caya kosɛbɛ. Saheli yanfan masakɛ ka kɛlɛbolow na don u bolo.
[12] Ni o kɛlɛbolo bɛɛ fagara tuma min na, worodugu yanfan masakɛ kuncɛ na bonya, nka o mɔgɔ caman fagalen kɔ, a ka se sɔrɔli tɛna mɛn,
[13] sabu saheli yanfan masakɛ na kɔsegin ka taa kɛlɛboloba dama dɔnbali labɛn ko kura. Ni waati dɔ tɛmɛnna san dama dɔw tɛmɛnnen kɔ, saheli yanfan masakɛ na a ka kɛlɛbolo dama dɔnbali kabakoma labɛn ka kɛlɛkɛ minanw caman ta ka taa u kama.
[14] O waati la mɔgɔ caman na wuli worodugu yanfan masakɛ kama. I yɛrɛ ka mɔgɔ farinma dɔw na wuli ka taa a kɛlɛ walisa o yeli fɛn ko ka dafa, nka u tɛna se sɔrɔ.
[15] «O tuma la saheli yanfan masakɛ bɛ na ka daga sigi ka dugu barikama minɛ. Worodugu yanfan kɛlɛbolow kɛlɛkɛ cɛ ja gɛlɛnw tɛna se ka jɔ. Barika si tɛna kɛ u la.
[16] Cɛlikɛla min bɛ na u kama, o na a sago bɛɛ kɛ. Mɔgɔ si tɛna se ka jɔ a ɲɛ. A na i jɔ dugukolo kan jamana duman cɛmancɛ la ni halakili kɛ fɛnw ye a bolo.
[17] «A na a latigɛ ka kɛɲɛ ni a ka masaya barika ye. O kɔ, a ni worodugu yanfan masakɛ na layidu ta ɲɔgɔn ye. A na a denmuso furu o ma walisa worodugu yanfan masaya ka tiɲɛn, nka o ko tɛna ɲɛ. O masaya tɛna don a bolo.
[18] O kɔ, a na i yɛlɛma kɔgɔji da la jamanaw kama ka olu caman minɛ, nka kɛlɛbolo kuntigi dɔ na wuli ka o kuncɛbaya kow ban ka o kow bi a yɛrɛ kan.
[19] Saheli yanfan masakɛ na kɔsegin a yɛrɛ ka jamana la a ka kɛlɛ kunbɛn sow kɔnɔ, nka a na talon ka bi ka ban.
[20] «O tuma la kuntigi wɛrɛ na wuli ale kɔ ka sigi jamana kun na. O na nisɔngɔ minɛla bila ka taa jamana bɛɛ la ɲuman la ka nisɔngɔ diyagoya minɛ u la. Nka tile dama dɔw mana tɛmɛn, o na faga. A tɛna kɛ ni dimiya ye, a tɛna kɛ ni kɛlɛ ye.
[21] «Mɔgɔ sɔnkolon dɔ na sigi ale nɔ na, k'a sɔrɔ masaya bonya ma di o ma, nka a na a yɛrɛ sigi masaya la ni kuma kegunmanw ye.
[22] Kɛlɛboloba dama dɔnbali min fɛnsɛna a ɲɛ kɔrɔ i ko ba woyo karilen, olu bɛɛ na tunun ka ban. Kuntigi min tun ye layidu ta, o fana na halaki.
[23] Layidu talen kɔ a fɛ, a na nanbara kɛ. A na wuli ka taa, hali ni a ka mɔgɔw ka dɔgɔ, a fanga na bonya kosɛbɛ.
[24] A na o jamana bɛɛ la ɲuman minɛ yɔrɔ nin kelen. A na min kɛ, hali a faw ni a bɛnbaw ma o ɲɔgɔn kɛ. A na fɛnw ni nafoloba cɛ ka o fɛnw tilatila a ka mɔgɔw cɛ. A na dabali ɲini kɛlɛ kunbɛn kogow kama waati dɔɔnin kɔnɔ.
[25] «O kɔ, o kuntigi na barika kura sɔrɔ ka taa worodugu yanfan masakɛ kama ni kɛlɛboloba ye. Worodugu yanfan masakɛ na taa kɛlɛ la ni kɛlɛboloba barikama ye, nka a tɛna se ka jɔ sabu u na jɛ siri a kama.
[26] Minw bɛ dumuni kɛ a ka tabali la, olu na a faga. A ka kɛlɛbolo na jɛnsɛn, mɔgɔw caman joginnen na bi ka sa.
[27] O masakɛ fila na ɲɔgɔn koniya u dusukun na. U na ɲɔgɔn lafili u ka dumuni kɛ yɔrɔ la nka u ka dabaliw si tɛna ɲɛ, sabu laban tɛna se ni a waati latigɛlen ma se.
[28] «O tuma la kuntigi na kɔsegin a ka jamana kɔnɔ ni nafolo caman ye. A na cogo ɲini ka o layidu senuma tiɲɛn k'a ka ko latigɛlen kɛ. O kɔ, a na kɔsegin a yɛrɛ ka jamana kɔnɔ.
[29] Ni waati latigɛlen sera, a na wuli worodugu yanfan masaya kama ko kura, nka o kɛlɛ tɛna kɛ i ko fɔlɔ ta.
[30] Kitim jikan kurunw bɛ na a kama, a ja na tigɛ. A na kɔsegin ka taa so. A na wuli o layidu senuma kama. Minw bɛ o layidu senuma tiɲɛn, a ni olu na jɛ.
[31] A na kɛlɛbolo minw ci, olu na wuli ka yɔrɔ senuma ni kɛlɛ kunbɛn so nɔgɔ. Olu na badaa don o don saraka laseli dabila ka tiɲɛnnikɛla ka batoli haramulen laada sigi yɔrɔ senuma kɔnɔ.
[32] A na layidu tiɲɛnbaaw lafili ni kuma kegunman ye, nka mɔgɔ minw bɛ u ka Ala dɔn, olu na barika sɔrɔ ka kobaw kɛ.
[33] Jama la mɔgɔ minw hakili ka di, olu ka mɔgɔ kalannenw na caya nka waati dɔɔnin tɛmɛnnen kɔ, olu na faga tasuma mana ni jɔnya gɛlɛn ani cɛli fɛ.
[34] Ni u bɛ faga tuma min na, u tɛna dɛmɛni bɛrɛ sɔrɔ, katuguni mɔgɔ caman na fara u kan ni filankafoya ye.
[35] O hakilitigiw la mɔgɔ dɔw na sa walisa u ka kɔrɔbɔ ka jɛya ka saniya fo ka taa se laban waati ma. O laban na se a waati latigɛlen na.
[36] «O masakɛ na a yɛrɛ sago kɛ ka a yɛrɛ bonya ka a yɛrɛ kɔrɔta bato fɛnw bɛɛ kun na. A na ko fɔbaliw fɔ bato fɛnw bɛɛ kun na Ala ma. A na jiidi ka ta'a fɛ fo ka taa se hakɛ bɔ don ma. K'a masɔrɔ ko min latigɛra, o na kɛ.
[37] A tɛna a bɛnbaw ka bato fɛnw ani musow ka bato fɛn jate. A tɛna bato fɛn si jate, k'a masɔrɔ a na a yɛrɛ kɔrɔta u bɛɛ kun na.
[38] Nka a na kɛlɛ kunbɛn sow kun na bato fɛn bonya. A bɛnbaw tun ma bato fɛn min dɔn, a na o bato ni sanu ni warijɛ ni kabakurun sɔngɔ gɛlɛnw ni kɔnɔnkisɛw ye.
[39] Siya wɛrɛ ka bato fɛn na a dɛmɛ ka kɛlɛ kunbɛn kogobaw kɛlɛ. Minw bɛ a jate, a na bonyaba di olu ma ka u sigi mɔgɔ caman kun na ka jamana tilatila u cɛ ka o kɛ u sara ye.
[40] «Laban waati mana se, worodugu yanfan masakɛ na wuli a kama. Saheli yanfan masakɛ na bi a kan ni wotorow ni sotigiw ani jikan kurunw caman ye i ko ba karilen. O na don jamanaw kɔnɔ ka u tiɲɛn ka tɛmɛn.
[41] A na don o jamana ɲuman ɲuman kɔnɔ ka mɔgɔ caman faga. Nka Edɔmkaw ni Moab bɔnsɔn kuntigiw na kisi a ka fagali ma.
[42] A na a bolo se jamana caman ma. Misira jamana fana tɛna kisi a ma.
[43] A na Misira jamana sanuw ni o warijɛw ni o fɛn sɔngɔ gɛlɛnw bɛɛ cɛ. Libikaw ni Etiopikaw na tugu a nɔ fɛ.
[44] Kibaru dɔ na bɔ kɔrɔn yanfan ni saheli yanfan fɛ, o na a ja tigɛ. A diminnenba na bɔ yen ka mɔgɔ caman halaki ka u ban.
[45] A na a ka masaya finiso jɔ kɔgɔji ni kulu nɔɔrɔma senuma furancɛ la. O kɔ, a yɛrɛ laban na se, mɔgɔ si tɛna taa a dɛmɛ.