[1] Ayiwa masakɛ Nebukadnezar ye ja belebeleba sanulama dɔ dila. O kundama tun ye nɔnkɔn ɲɛ biwɔɔrɔ ye, a bonya tun ye nɔnkɔn ɲɛ wɔɔrɔ ye. A ye o ja jɔ Dura jɛkɛnɛ la Babilonɛ jamana la.
[2] O kɔ, masakɛ Nebukadnezar ye ci bila ka jamana kɔnɔ gɔfɛrɛnɛrɛw ni jamanatigiw ni komandanw ni kiritigɛlaw ni wari minɛlaw ni laadibaaw ni sariya ko ɲɛnabɔbaaw ani jamana baarakɛlaw bɛɛ wele ko u ka na masakɛ Nebukadnezar ka ja dilalen seli la.
[3] O tuma la jamana kɔnɔ gɔfɛrɛnɛrɛw ni jamanatigiw ni komandanw ni kiritigɛlaw ni wari minɛlaw ni laadibaaw ani sariya ko ɲɛnabɔbaaw ani jamana baarakɛlaw bɛɛ nana masakɛ ka ja dilalen seli la ka u jɔ Nebukadnezar ka ja dilalen ɲɛ fɛ.
[4] O tuma la welewele dala pɛrɛnna ni kanba ye ko: «Mɔgɔw ni siyaw ni kanw bɛɛ fɔbaaw, ci min dira aw ma, o filɛ nin ye.
[5] Ni aw ye buru ni file ni jeli nkɔni ni nkɔni ni npɔlɔn ani file sifa dɔ ani fɔlifɛn sifa bɛɛ fɔkan mɛn tuma min na, aw bɛɛ ka aw biri masakɛ Nebukadnezar ka sanu ja dilalen kɔrɔ k'a bato.
[6] Ko ni mɔgɔ o mɔgɔ ma sɔn ka i biri ka o ja bato, o tigi na fili gwantugu tasumaba la o yɔrɔ nin bɛɛ.»
[7] O de kosɔn kabini mɔgɔw bɛɛ ye buru ni file ni jeli nkɔni ni nkɔni ni npɔlɔn ani file sifa dɔ ani fɔlifɛn sifa bɛɛ fɔkan mɛn tuma min na, mɔgɔw bɛɛ ni siyaw bɛɛ ni kan bɛɛ fɔbaaw ye u biri masakɛ Nebukadnezar ka sanu ja dilalen kɔrɔ k'a bato.
[8] O tuma la, Kaldeka dɔw gɛrɛla ka Yahutuw don bolo la.
[9] U y'a fɔ masakɛ Nebukadnezar ye ko: «Masakɛ, i ka si sɔrɔ badaa.
[10] Masakɛ, e yɛrɛ ye ci di ko ni mɔgɔw bɛɛ ye buru ni file ni jeli nkɔni ni nkɔni ni npɔlɔn ani file sifa dɔ ani fɔlifɛn sifa bɛɛ fɔkan mɛn tuma min na, ko u bɛɛ ka u biri ka o sanu ja bato.
[11] Ko ni mɔgɔ o mɔgɔ ma sɔn ka o ja bato, ko o tigi na fili gwantugu tasumaba la.
[12] O bɛɛ n'a ta, i ye Yahutu mɔgɔ minw ɲɛnatɔmɔ ka kɛ Babilonɛ jamana baarakɛlaw ye, Sadrak ni Mesak ani Abɛd-Nego kɔni, masakɛ, olu tɛ i jate. U tɛ sɔn ka i ka bato fɛnw bato, u tɛ sɔn ka i ka sanu ja dilalen fana bato.»
[13] Masakɛ Nebukadnezar diminna kosɛbɛ. A dusu bɔlen ye ci di ko u ka taa Sadrak ni Mesak ani Abɛd-Nego minɛ. O yɔrɔ nin bɛɛ o mɔgɔw taara o cɛw minɛ ka taa ni u ye masakɛ ɲɛ kɔrɔ.
[14] Nebukadnezar y'a fɔ u ye ko: «Sadrak ni Mesak ani Abɛd-Nego, tiɲɛ la ko aw tɛ sɔn ka ne ka bato fɛnw bato ka ne ka sanu ja dilalen bato wa?
[15] Ayiwa sisan, ni aw ye buru ni file ni jeli nkɔni ni nkɔni ni npɔlɔn ani file sifa dɔ ani fɔlifɛn sifa bɛɛ fɔkan mɛn tuma min na, aw ka aw biri ne ka sanu ja dilalen kɔrɔ k'a bato. Ni aw ma aw biri a kɔrɔ, o yɔrɔ nin bɛɛ aw na fili gwantugu tasumaba la. Bato fɛn jumɛn bɛ se ka aw tila ka bɔ ne bolo?»
[16] Sadrak ni Mesak ani Abɛd-Nego ye masakɛ Nebukadnezar jaabi ko: «An man kan ka i jaabi nin ko la,
[17] sabu an bɛ Ala min bato, o de bɛ se ka an tila, siga t'a la. Masakɛ, a bɛ se ka an kisi gwantugu tasumaba ma ani ka an bɔ e fana bolo.
[18] Masakɛ, hali ni o ma kɛ, i k'a dɔn k'a jɛya ko an tɛna i ka bato fɛnw bato. An tɛna i ka sanu ja dilalen fana bato.»
[19] Nebukadnezar dusu bɔra kosɛbɛ fo a ɲɛda cogo yɛlɛmana Sadrak ni Mesak ani Abɛd-Nego kama. O kɔ, a y'a fɔ u ka tasuma bonya siɲɛ wolonwula ka tɛmɛn fɔlɔ ta kan.
[20] A ye a ka sɔrɔdasi barikama dɔw wele ko olu ka Sadrak ni Mesak ani Abɛd-Nego siri ka u fili o tasumaba la.
[21] O yɔrɔ nin bɛɛ u ye u siri ka u ka dulɔkiw ni u ka dulɔkibaw ani u ka finiw bɛɛ to u la ka u fili gwantugu tasumaba cɛmancɛ la.
[22] Nka masakɛ ka ci tun ka tɛli, tasuma fana tun ka bon, o de kosɔn minw taara Sadrak ni Mesak ani Abɛd-Nego fili tasuma la, tasuma mana ye olu faga.
[23] O cɛ saba, Sadrak ni Mesak ani Abɛd-Nego sirilen bira tasuma cɛmancɛ la.
[24] O tuma la masakɛ Nebukadnezar ja tigɛra. A wulila joona k'a fɔ a laadibaaw ye ko: «Yala an ma cɛ saba sirilen fili tasuma la wa?» Olu y'a jaabi ko: «Siga t'a la, masakɛ.»
[25] A y'a fɔ ko kura ko: «Ne dun ɲɛ bɛ cɛ naani foninen na. U bɛ yaalayaala tasuma cɛma. Foyi tɛ kɛ u la. O naaninan cogo bɔlen bɛ bato fɛn denkɛ fɛ.»
[26] O kɔ, Nebukadnezar gɛrɛla tasumaba la k'a fɔ ko: «Sebaayabɛɛtigi Ala ka baaradenw, Sadrak ni Mesak ani Abɛd-Nego, a' ye bɔ tasuma la ka na yan.» Ayiwa Sadrak ni Mesak ani Abɛd-Nego bɔra tasuma cɛma.
[27] Masakɛ ka gɔfɛrɛnɛrɛw ni jamanatigiw ni komandanw ani masakɛ ka laadibaaw bɛɛ lajɛlen y'a ye ko tasuma ma se ka o cɛw fari jeni. Hali u kunsigiden kelen ma funfun, u ka dulɔkiw si ma jeni tasuma fɛ. Tasuma kasa si ma kɛ u la.
[28] O tuma la Nebukadnezar ko: «Sadrak ni Mesak ani Abɛd-Nego ka Ala ka tanu. O Ala ye a ka mɛlɛkɛ ci ka na a ka jɔnw kisi, olu jigi dalen tun bɛ a kan, olu ye masakɛ ka ci fɔlen tiɲɛn ka u yɛrɛw farikolo di walisa u kana baara kɛ bato fɛn wɛrɛ si ye u ka Ala kɔ.
[29] O de kosɔn ne bɛ ci di ko ni mɔgɔ o mɔgɔ wala siya o siya wala kan o kan fɔbaa ye kuma jugu fɔ Sadrak ni Mesak ani Abɛd-Nego ka Ala ma, o tigi ka tigɛtigɛ. A ka so na kɛ tomon ye, sabu bato fɛn wɛrɛ si tɛ se ka mɔgɔ kisi i ko ale.»
[30] Ayiwa, masakɛ ye Sadrak ni Mesak ani Abɛd-Nego fanga bonya Babilonɛ jamana kɔnɔ.