[1] Asuerus min bɔra Medi siya la, o denkɛ Darius kɛra Kalde jamana masakɛ ye.
[2] O ka masaya san fɔlɔ la, ne Daniɛl y'a ye kitabuw la ko Matigi y'a fɔ kira Jeremi da la ko Jerusalɛm cilen lankolon na to ka san biwolonwula kɛ.
[3] Ne ye sun don ka cafu fini don ka ne sigi bugurijɛ la ka ne ɲɛ sin Matigi Ala ma k'a deli ni delili ni delilibaw ye.
[4] Ne ye Matigi ne ka Ala deli ka nimisali kɛ, ko: «E Matigi, Alaba, siranfɛnba, e min ye kantigi ye i ka layidu kow la, i bɛ makari i kanubaaw ani i ka ci marabaaw la.
[5] An ye jurumu ni tilenbaliya ni kojuguba kɛ. An kɛra kan bilabaaw ye. An jɛngɛna ka mabɔ i ka sariyaw ni i ka ci fɔlenw la.
[6] I ka jɔn kira minw kumana i tɔgɔ la an ka masakɛw ni an ka faamaw ani an bɛnbaw ni jamana mɔgɔw bɛɛ fɛ, an ma olu kan lamɛn.
[7] E, Matigi tilennen don. An kɔni, Juda bɔnsɔnw ni Jerusalɛmkaw ani Israɛl bɔnsɔn bɛɛ minw yɔrɔ ka surun ani minw yɔrɔ ka jan, i ye u gɛn ka taa o jamana minw bɛɛ la u ka tilenbaliya kɛlenw kosɔn i la, an bɛɛ maloyalen kun suulilen don bi donw la.
[8] Ɔwɔ, Matigi, an ka masakɛw ni kuntigiw ni an bɛnbaw bɛɛ maloyalen kun suulilen don, sabu an ye i hakɛ ta.
[9] Hali k'a sɔrɔ an murutira Matigi an ka Ala ma, ale ye makari ni yafalitigi ye.
[10] «An ma sɔn ka Matigi an ka Ala kan minɛ. A ye sariya minw di a ka baaraden kiraw ma ka lase an ma, an ma sɔn ka olu sira taama.
[11] Israɛl bɔnsɔn bɛɛ ye i ka sariya tiɲɛn. U banna i kan minɛli ma. Dangali kow ni kalili ko minw sɛbɛnna Ala ka jɔnkɛ Musa ka sariya la, olu bira an kan katuguni an ye Ala hakɛ ta.
[12] Ala tun ye kuma minw fɔ an ni an ka kuntigiw ni jamana marabaaw ma, a ye olu kɛ ka Jerusalɛm gosi ni tɔɔrɔbaw ye minw ɲɔgɔn ma kɛ sankolo jukɔrɔ abada.
[13] A ye tɔɔrɔ ko minw fɔ Musa ka sariya la, o tɔɔrɔ kow bɛɛ bira an kan. An ma sɔn ka Matigi an ka Ala deli. An ma sɔn ka an ka tilenbaliyaw dabila. An ma sɔn ka a ka tiɲɛ lamɛn.
[14] O de kosɔn Matigi ye o tɔɔrɔ kow bɛɛ bi an kan, k'a masɔrɔ an Matigi an ka Ala tilennen don a ka ko kɛtaw bɛɛ la. Nka an ma sɔn ka a kan lamɛn.
[15] «Ayiwa sisan, Matigi an ka Ala, e de ye i ka mɔgɔw sama ka bɔ Misira jamana kɔnɔ ni i bolo barikama ye. E de ye tɔgɔba sɔrɔ ka o mara fo ka na se bi ma, nka an ye kan bilali kɛ, an jalakilen don.
[16] Matigi, i ka i ka dimiya ni i ka dusubɔ mabɔ i ka dugu Jerusalɛm ni i ka kulu senuma la i ka tilennenyaw kosɔn, k'a masɔrɔ an ka jurumuw ni an bɛnbaw ka tilenbaliyaw y'a to Jerusalɛm dugu ni i ka mɔgɔw kɛra mafiɲɛyali fɛn ye a lamini siyaw fɛ.
[17] Ayiwa sisan, Matigi an ka Ala, i ka sɔn ka i ka jɔnkɛ ka delili ni a ka delilibaw lamɛn. Matigi, i ka nɔɔrɔ da i ka yɔrɔ tiɲɛnnen kan i yɛrɛ ɲɛ kɔrɔ i ka kanuyaba kosɔn.
[18] Ne ka Ala, i ka i tulo majɔ ka lamɛnni kɛ. I ka i ɲɛ yɛlɛ ka an ka yɔrɔ tiɲɛnnen filɛ. Dugu min tun bɛ wele i tɔgɔ la, i ka o filɛ. «An tɛ i deli an ka tilennenya kosɔn fɔ i yɛrɛ ka makariba kosɔn.
[19] Matigi, i ka an lamɛn. Matigi, i ka yafa an ma. Matigi, i ka i tulo majɔ ka an jaabi ka an ka ko ɲɛnabɔ. An ka Ala, i kana mɛn i tɔgɔba kosɔn, sabu e tɔgɔ dara i ka dugu ani i ka mɔgɔw kan.»
[20] Ne kumana ka delili kɛ ko kura. Ne jɔra ne ka jurumu ni ne ka mɔgɔ, Israɛl bɔnsɔn ka jurumu la ka ne ka delilibaw lase Matigi ne ka Ala ma a ka kulu senuma ni Ala tɔgɔ kosɔn.
[21] Ka ne to delili la, ne tun ye o cɛ Gabriɛl min ye yeli fɛn fɔlɔ la, o y'i pan ka tɛliya ka na ne ma wula fɛ saraka lase waati la.
[22] A nana ne kalan ko: «Ne nana sisan ka hakilitigiya ni dɔnniya di i ma.
[23] Daniɛl, kabini i ye delili daminɛ, Matigi ye kuma min fɔ, ne nana o jira i la, sabu Ala bɛ i kanu kosɛbɛ. O de kosɔn i ka i tulo majɔ o kuma la ka o yeli fɛn kɔrɔ faamu.
[24] «Dɔgɔkun biwolonwula latigɛra i ka mɔgɔw ni i ka dugu senuma ye. O waati latigɛra walisa murutili ka ban, jurumu ka dabila, tilenbaliyaw ka yafa u ma, walisa tilennenya banbali ka sigi. Yeli fɛn ni kiraya kuma ka dafa, senumaw ka Senuma ka mun.
[25] Ayiwa, i k'a dɔn k'a jɛya ko kabini Jerusalɛm dugu sigili ni a jɔli ko fɔra fo ka taa se Kuntigi Munlen ka waati ma, o na kɛ dɔgɔkun wolonwula ni dɔgɔkun biwɔɔrɔ ni fila ye. Jerusalɛm fɛrɛkɛnɛw ni a kɛlɛ kunbɛn sow na jɔ ko kura, nka o na kɛ waati gɛlɛnw ye.
[26] «O dɔgɔkun biwɔɔrɔ ni fila tɛmɛnnen kɔ, o Munlen na faga. Mɔgɔ si tɛna sigi ale nɔ na. Kuntigi dɔ ka mɔgɔw bɛ na ka dugu ni yɔrɔ senuma ci. A laban na kɛ halakiba ye i ko jiba bɛ tiɲɛnni kɛ cogo min na. Kɛlɛ na kɛ fo ka taa se a waati laban tuma ma, tiɲɛnni kow latigɛra.
[27] O kuntigi ni kuntigi caman wɛrɛw na layidu tiɲɛnbali ta ɲɔgɔn ye dɔgɔkun kelen kɔnɔ. A na sarakaw ni nili fɛnw laseli dabila dɔgɔkun tilancɛ tɛmɛnnen kɔ. Halakikɛla na a ka batoli haramulenw kɛ o saraka bɔlan yɛrɛ kan fo ka taa se o halakikɛla yɛrɛ halaki tuma ma.»