[1] Ayiwa masakɛ Belsazar ye dumuniba labɛn a ka mɔgɔbaw ye. U tun bɛ mɔgɔ waa kelen bɔ. A ye diwɛn min u ɲɛ kɔrɔ.
[2] Ka Belsazar to diwɛn min la, a fa Nebukadnezar tun ye sanu ni warijɛ minan minw cɛ ka bɔ Alabatosoba kɔnɔ Jerusalɛm, a ye ci fɔ ko u ka na ni olu ye a yɔrɔ la walisa masakɛ ni a ka kuntigiw ni a furumusow ani a ka muso wɛrɛw ka diwɛn min olu kɔnɔ.
[3] Ayiwa, o sanu minan minw cɛra ka bɔ Alabatosoba kɔnɔ Jerusalɛm, u taara ni olu ye yen. Masakɛ ni a ka kuntigiw ni a furumusow ani a ka muso wɛrɛw ye minni kɛ olu kɔnɔ.
[4] U ye diwɛn min k'u fa tuma min na, u ye sanu ni warijɛ ni nsiranɛgɛ ni nɛgɛfin ni jiri ni kabakurun boliw bato.
[5] O waati yɛrɛ la, u ye mɔgɔ bolo bisigi ye. O tun b'a la ka sɛbɛnni kɛ masaya so kogo jɛman kan fitinɛ kuntilenna la. Masakɛ ye o bolonkɔniw ye sɛbɛnni la.
[6] O tuma la masakɛ ɲɛda cogo yɛlɛmana. A hakili ɲaamina, a kolow fagara, a kunberew tun bɛ yɛrɛyɛrɛ ka ɲɔgɔn gosi.
[7] Masakɛ pɛrɛnna ni kanba ye ko u ka dɔnbaaw ni jinɛmoriw ani sankolola taamashyɛn dɔnbaaw wele. O kɔ a y'a fɔ Babilonɛ hakilitigiw ye ko: «Ni mɔgɔ o mɔgɔ ye nin sɛbɛn dɔn ka a kɔrɔ fɔ ne ye, lomaasa fini na don o kan na. Sanu jɔlɔkɔ na don a kan na ka o tigi kɛ ne ka masaya kuntigi sabanan ye.»
[8] Masakɛ ka hakilitigiw bɛɛ donna yen nka u ma se ka o sɛbɛnni kalan. U ma se k'a kɔrɔ fɔ masakɛ ye.
[9] Masakɛ Belsazar ja tigɛra kosɛbɛ fo ka a ɲɛda cogo yɛlɛma. A ka kuntigiw hakili ɲaamina.
[10] Masakɛ woloba ye masakɛ ni a ka faamaw ka kuma mɛn. O donna dumuni kɛ yɔrɔ la so kɔnɔ k'a fɔ ko: «Masakɛ, i ka si sɔrɔ badaa. I hakili kana ɲaami, i ɲɛda cogo kana yɛlɛma.
[11] Cɛ dɔ bɛ i ka mara la, bato fɛn senumaw ni bɛ o la. I fa Nebukadnezar tile la an ye kɛnɛ ni faamuli ani hakilitigiya sɔrɔ ale fɛ i ko bato fɛnw ka hakilitigiya. Ayiwa masakɛ, i fa Nebukadnezar, i yɛrɛ fa ye o cɛ sigi ka kɛ filɛlikɛlaw ni dɔnbaaw ni jinɛmoriw ani sankolola taamashyɛn dɔnbaaw kuntigi ye.
[12] O cɛ ye Daniɛl ye. I fa ye a tɔgɔ da ko Beltisazar. An y'a sɔrɔ ko hakilitigiya ni dɔnniya ni bɛ a la ka sugow kɔrɔ fɔ ka gundow jira ka ɲininkali gɛlɛnw jaabi. Ayiwa, an ka Daniɛl wele, ale na o kɔrɔ fɔ.»
[13] U nana ni Daniɛl ye masakɛ ɲɛ kɔrɔ. O tuma la masakɛ y'a fɔ Daniɛl ye ko: «Ne fa ye Juda mɔgɔ minw minɛ ka na ni u ye, Daniɛl min bɛ o mɔgɔ minɛlenw cɛma, i ye o ye wa?
[14] Ne ye i ko mɛn ko bato fɛnw ni bɛ i la, ko mɔgɔw bɛ kɛnɛ ni faamuli ani hakilitigiya kabakoma sɔrɔ i fɛ.
[15] U nana ni hakilitigiw ni dɔnbaaw ye ne ɲɛ kɔrɔ walisa u ka nin sɛbɛn kalan k'a kɔrɔ jira ne la, nka olu si ma se ka o kumaw kɔrɔ fɔ ne ye.
[16] Ne y'a mɛn ko i bɛ se ka kumaw kɔrɔ jira ka ko gɛlɛnw jaabi. Ni i bɛ se ka nin sɛbɛnni kalan ka a kɔrɔ fɔ ne ye, lomaasa fini na don i la, ka sanu jɔlɔkɔ don i kan na. I na kɛ ne ka mara la kuntigi sabanan ye.»
[17] Daniɛl ye masakɛ jaabi ko: «I ka to ni i ka nili fɛnw ye ka u di mɔgɔ wɛrɛw ma. O bɛɛ n'a ta masakɛ, ne na nin sɛbɛnni kalan i ye k'a kɔrɔ fɔ i ye.
[18] Masakɛ, Sebaayabɛɛtigi Ala ye masaya ni bonya ni nɔɔrɔ ani saramaya di i fa Nebukadnezar ma.
[19] O tɔgɔba dilen kosɔn a ma, mɔgɔw bɛɛ ni siyaw bɛɛ ni kumakan bɛɛ fɔbaaw tun bɛ yɛrɛyɛrɛ ka siran a ɲɛ. A tun b'a fɛ ka mɔgɔ min faga, a ye o faga. A tun b'a fɛ ka mɔgɔ min ɲɛnama to, a ye o to yen. A tun b'a fɛ ka min kɔrɔta, a tun bɛ o kɔrɔta. A tun b'a fɛ ka min majigin, a tun bɛ o majigin.
[20] Nka a ye a yɛrɛ kɔrɔta ka a kuncɛ bonya. A ka masaya bira, a nɔɔrɔ banna.
[21] A gɛnna ka bɔ Hadamadenw cɛma. A miiriliw kɛra baganw ta ye. A ni kungo faliw sigira ɲɔgɔn fɛ. A ye bin dun i ko misi. Sankolo ngomi ye a farikolo ɲigin fo a k'a dɔn tuma min na ko Sebaayabɛɛtigi Ala bɛ Hadamadenw ka masayaw bɛɛ kun na. Min ka di a ye, a bɛ a di o ma.
[22] «E Belsazar min ye o denkɛ ye, i ma sɔn ka i yɛrɛ majigin, hali k'a sɔrɔ i ye a kow bɛɛ dɔn.
[23] Nka e fana wulila sankolotigi Ala kama ka Alabatosoba kɔnɔ minanw ta, e ni i ka kuntigiw ni i furumusow ani i ka muso wɛrɛw ye diwɛn min olu kɔnɔ. I ye warijɛ ni sanu ni nsiranɛgɛ ni nɛgɛfin ni jiri ani kabakurun boliw fana bato. Olu tɛ yeli kɛ, u tɛ mɛnni kɛ, u tɛ foyi dɔn. I ninakili ni i ka ɲɛnamaya bɛɛ bɛ Ala min bolo, i ma sɔn ka o bato.
[24] O de kosɔn a ye nin bolonkɔniw ci ka na nin sɛbɛnni kɛ.
[25] Ayiwa, sɛbɛnni min kɛra, o filɛ nin ye, ‹Mene, mene, tekɛl, ufarsin,› o kɔrɔ, dannen, dannen, sumanen, tilalen.
[26] O kuma kɔrɔ filɛ nin ye. ‹Dannen›, o kɔrɔ, Ala ye i ka masaya dan, a y'a ban.
[27] ‹Sumanen›, o kɔrɔ, i sumana ja la, i ka fiɲɛ.
[28] ‹Tilalen›, o kɔrɔ, i ka masaya tilara, a dira Medikaw ni Persekaw ma.»
[29] O yɔrɔ nin bɛɛ masakɛ Belsazar ye ci di ko u ka lomaasa fini ni sanu jɔlɔkɔ don Daniɛl kan na. U ye welewele da ko Daniɛl kɛra masaya la kuntigi sabanan ye.
[30] O su yɛrɛ la, Kaldekaw ka masakɛ Belsazar fagara.
[31] Darius min bɔra Mede, o ye masaya minɛ a si san biwɔɔrɔ ni filanan la.