[1] Babilonɛ masakɛ Belsazar ka masaya san fɔlɔ la, Daniɛl dalen sugora. A ye yeli fɛn dɔw ye. O kɔ, a ye o sugo sɛbɛn ka a kobaw fɔ.
[2] Ayiwa Daniɛl ko: «Ne ye fɛn min ye yeli fɛn na su fɛ, fiɲɛ cira ka bɔ sankolo fan naani la ni barikaba ye ka Kɔgɔjiba lamaga.
[3] Wara belebeleba naani bɔra Kɔgɔji la. U si ni si tun tɛ kelen ye.
[4] Wara fɔlɔ bɔlen tun bɛ waraba fɛ. Bɔn kamanfuraw tun bɛ o la. Ka ne to o filɛli la, o kamanfuraw farala ka bɔ a la. A wulila ka i jɔ a sen fila kan i ko cɛ dɔ. Hadamaden hakili dira a ma.
[5] «O yɔrɔ nin bɛɛ, ne ye wara filanan ye. O bɛ i ko ursi wara. O wara jɔlen tun bɛ a kɔfɛ senw na. Galakakolo saba tun bɛ a da la ɲinw na. A fɔra a ye ko: ‹I ka wuli ka sogo caman dun.›
[6] «O kɔ, ne ye wara dɔ wɛrɛ ye. O bɛ i ko waraninkalan. Kɔnɔ kamanfura naani tun bɛ a kɔ la. Kunkolo naani tun bɛ o wara la. Kuntigiya dira a ma.
[7] «O kɔ, ne ye wara naaninan ye su fɛ yeli fɛn na. O tun ye siranfɛnba kabakoma ye. A barika tun ka bon kosɛbɛ haali. A da kɔnɔ ɲinw tun ye nɛgɛ ye. A ye farafarali kɛ ka karikarili kɛ ka o fɛn tɔw cɔngɔ a sen kɔrɔ. A ni wara tɔw tun tɛ cogo kelen na. Biɲɛkolo tan tun b'a la.
[8] Ne ye o biɲɛkolow kɔlɔsi. Ne y'a ye ko biɲɛkolo fitinin bɔra tɔw cɛma. Biɲɛkolo fɔlɔ taw la saba bira ka bɔ o biɲɛkolo ɲɛ. Ɲɛkisɛ tun bɛ o biɲɛkolo la i ko mɔgɔ ɲɛkisɛw. Da tun bɛ a la, a tun bɛ kuncɛbaya kumaw fɔ.
[9] «Ne tora ka filɛli kɛ, masasigilanw sigira. O min tun bɛ yen kabini fɔlɔfɔlɔ, o y'i sigi. A ka finiw tun ka jɛ i ko neje jɛman. A kunsigiw tun bɛ i ko sagasi yɛrɛwolo jɛman. A ka masasigilan tun bɛ i ko tasuma mana. A ka masasigilan sen koolilenw tun bɛ i ko tasuma belebeleba.
[10] Tasuma mana tun bɛ seri a ɲɛ fɛ i ko kɔji. Mɛlɛkɛ waa caman tun ye a ka baarakɛlaw ye. Mɛlɛkɛ waa tan-tan caman jɔlen tun bɛ a ɲɛ kɔrɔ. Kiritigɛlaw ye u sigi, kitabuw da yɛlɛla.
[11] «Ne tora ka filɛli kɛ k'a masɔrɔ o biɲɛkolo tun bɛ to ka kuncɛbaya kuma fɔ. Ne y'a ye ko o wara fagara, a farisogo halakira, a jenina ni tasuma ye.
[12] O wara tɔw kɔni, olu bɛɛ barika bɔsira u la nka waati wɛrɛ farala u si tile kan fo ka se waati latigɛlen ma.
[13] «Ne ye yeli kɛ su fɛ yeli fɛn na ko kura ka mɔgɔ dɔ ye. O bɔlen bɛ mɔgɔ denkɛ fɛ. O nana sankabaw kan. Min tun bɛ yen kabini fɔlɔfɔlɔ, a taara gɛrɛ o la.
[14] Sebaaya ni nɔɔrɔ ni masaya dira a ma. Hadamaden bɛɛ ni siyaw bɛɛ ni bɔnsɔnw bɛɛ ani kumakan bɛɛ fɔbaaw dira a ma ka baara kɛ a ye. A ka masaya banbali don, a tɛ ban. A ka kuntigiya tɛ tiɲɛn abada.
[15] «Ne Daniɛl hakili ɲaamina ka ne ja tigɛ o yeli fɛn jiralenw kosɔn.
[16] Minw jɔlen tun bɛ yen, ne gɛrɛla o la kelen na ka o ɲininka o fɛnw kɔrɔ ko la. O ye ne jaabi ka o fɛnw kɔrɔ fɔ ne ye k'a jɛya.
[17] A ko: ‹O wara belebeleba naani ye dugukolo kan masakɛ naani de ye.
[18] Nka Kɔrɔtalenba ka senumaw na o masaya sɔrɔ. O masaya na kɛ u ta ye badaa badaa.›
[19] «Ayiwa ne tun b'a fɛ ka o wara naaninan ko dɔn k'a jɛya, o min ni tɔw tun tɛ cogo kelen na. Siranfɛnba kabakoma don, a ɲinw tun ye nɛgɛfin ye, a sɔninw tun ye nsiranɛgɛ ye, a tun bɛ farafarali kɛ ka karikarili kɛ ka fɛn tɔw cɔngɔ a sen kɔrɔ.
[20] Ne tun b'a fɛ ka o wara biɲɛkolow ko dɔn k'a jɛya, biɲɛkolo tan minw tun bɛ o wara kun na ani o biɲɛkolo kelen wɛrɛ min bɔra biɲɛkolo saba nɔ na ni saba bira ka bɔ o ɲɛ. Ɲɛkisɛ tun bɛ o biɲɛkolo la, da tun bɛ o biɲɛkolo la, o da tun bɛ kuncɛbaya kumaw fɔ. O biɲɛkolo tun bɛ i ko a ka bon ka tɛmɛn fɔlɔ taw kan.
[21] «Ne ye filɛli kɛ, ne y'a ye ko o biɲɛkolo tun b'a la ka senumaw kɛlɛ ka se sɔrɔ u kan.
[22] Min tun bɛ yen kabini fɔlɔfɔlɔ fo o ka na ka jo di Kɔrɔtalenba ka senumaw ma, fo senumaw ka masaya sɔrɔ waati ka se.
[23] «Ayiwa mɛlɛkɛ y'a fɔ ne ye ko: ‹Wara naaninan bɛ masaya naaninan jira. O bɛ na dugukolo kan. O masaya ni masaya tɔw tɛ kelen ye. O na dugukolo kan mɔgɔw bɛɛ farafara ka u cɔngɔ a sen kɔrɔ ka u ɲɔɲɔ.
[24] O biɲɛkolo tan ye masakɛ tan ye minw na sigi o masaya kun na. Masakɛ wɛrɛ na wuli olu kɔ, o cogo ni tɔw ta tɛna kɛ kelen ye. O na masakɛ saba labi ka sigi u nɔ na.
[25] O na kuma jugu fɔ Kɔrɔtalenba ma ka Kɔrɔtalenba ka senumaw tɔɔrɔ ka waati sigilenw ni sariyaw yɛlɛma. Senumaw na kɛ o masaya fanga kɔrɔ san saba ni tila kɔnɔ.
[26] O kɔ, kiri waati na se. O masakɛ ka masaya na bɔsi a la ka a tiɲɛn ka ban pewu pewu.
[27] O tuma la sankolo jukɔrɔ masayaw ni kuntigiyaw ni sebaayaw na di Kɔrɔtalenba ka senumaw ma. O ka masaya ye masaya banbali ye. Setigiw bɛɛ na baara kɛ a ye ka a kan minɛ.›
[28] «O kumaw bɛɛ fɔlen kɔ, ne, Daniɛl hakili ɲaamina kosɛbɛ. Ne fari cogo yɛlɛmana. O kow tora ne kɔnɔ.»