[1] یوسئف اؤزونو آتاسینین اوستونه آتدی و آغلایاراق اونو اؤپدو.
[2] سونرا حکئم خئدمتچئلرئنه امر اتدی کی، آتاسینین جسدئنی مومئیالاسینلار. حکئملر ائسرایئلی مومئیالادیلار.
[3] بو ائش قیرخ گونه گؤرولدو، چونکی مومئیالاماق اوچون اله بئر مودّت لازیم ائدی. مئصئرلی‌لر یتمئش گون ائسرایئل اوچون یاس توتدولار.
[4] یاس گونلری قورتاراندان سونرا، یوسئف، فئرعونون سارای آداملارینا دانیشیب ددی: «اگر گؤزونوزده لوطف تاپمیشام، خاهئش ادئرم فئرعونا دیئن کی،
[5] آتام منی آند ائچدئرئب دمئشدی: ”باخ، من اؤلورَم. کَنَعان تورپاغیندا اؤزوم اوچون قبئر قازمیشام، منی اورادا باسدیر.“ ائندی قوی او منه ائجازه ورسئن کی، گدئب آتامی باسدیریم و قاییدیم.»
[6] فئرعون ددی: «گت، آتانین سنه آند ائچدئردئیی کئمی اونو باسدیر.»
[7] بله‌جه، یوسئف آتاسینی باسدیرماغا گتدی. فئرعونون بوتون اعیانلاری، سارایین و مئصئرئن بوتون آغساقّاللاری،
[8] یوسئفئن بوتون اِو آداملاری، قارداشلاری و آتاسینین اِو آداملاری اونونلا گتدئلر. گوشِن وئلایتئنده آنجاق اوشاقلارینی، قویون-کِچئلرئنی و مال-حیوانلارینی قویدولار.
[9] اونلارلا بئرلئکده عارابالار و آتلی‌لار دا یولا چیخمیشدی، اونا گؤره ده دسته چوخ بؤیوک ائدی.
[10] اونلار اوردون چایینین او بئری طرفئنده، آتاد خرمنئنه چاتاندا چوخ آجی و بؤیوک ماتمله یاس توتدولار. یوسئف آتاسی اوچون یدّی گون یاس توتدو.
[11] او اؤلکه‌نئن اهالئسی اولان کَنَعانلی‌لار، آتاد خرمنئنده‌کی یاسی گؤرنده ددئلر: «گؤر مئصئرلی‌لر نجه بؤیوک ماتم ائچئنده‌دئرلر.» اونا گؤره ده اوردون چایینین او بئری طرفئنده‌کی بو یِره آبِل‌مئصرایئم آدی ورئلدی.
[12] یعقوبون اوغوللاری آتاسینین وصئیّتئنی امر اتدئیی کئمی یرئنه یتئردئلر.
[13] اونو کَنَعان اؤلکه‌سئنه گتئرئب، مَمرِه‌نئن یاخینلیغینداکی ماکپِلا زمئسئنده اولان ماغارادا باسدیردیلار. ائبراهئم بئر واخت بو ماغارانی قَبئر دوزَلتمک اوچون زمی ائله بئرلئکده خئتلی عِفروندان ساتین آلمیشدی.
[14] یوسئف آتاسینی دفن اتدئکدن سونرا هم اؤزو، هم قارداشلاری، هم ده اونونلا بئرلئکده آتاسینین دفنئنه گلنلرئن هامیسی مئصئره قاییتدیلار.
[15] آتالاری اؤلَندن سونرا یوسئفئن قارداشلاری اؤز آرالاریندا ددئلر: «بلکه یوسئف بئزئم ضئدّئمئزه کئن ساخلاییر. اگر اونا اتدئیئمئز پئسلئیه گؤره بئزدن قئصاص آلسا، نه اده‌رئک؟»
[16] بونا گؤره ده یوسئفه خبر گؤندَردئلر: «آتان اؤلوموندن قاباق بئزه وصئیّت اتدی کی،
[17] یوسئفه بله دیئن: ”باخ سندن خاهئشئم بودور کی، قارداشلارینین گوناهینی و تقصئرئنی باغیشلایاسان. آخی اونلار سنه پئسلئک ادئبلر. خاهئش ادئرئک، سن آتانین تاریسینین قوللاری اولان بئز قارداشلارینین گوناهینی باغیشلا.“» بو سؤزلر یوسئفه چاتاندا او آغلادی.
[18] سونرا قارداشلاری اؤزلری یوسئفئن یانینا گدئب، قاباغیندا یره قاپاندیلار و ددئلر: «باخ، بئز سنئن قوللارینیق.»
[19] یوسئف اونلارا ددی: «مگر من تارییام کی، مندن قورخورسونوز؟
[20] باخین، سئز منئم حاقّیمدا پئس فئکره دوشدونوز، لاکئن تاری اونو یاخشی ائشه چِوئردی کی، بو گون گؤردویونوزو اتسئن و چوخلو آدامین حیاتینی قوروسون.
[21] داها قورخمایین، من هم سئزی، هم ده اؤولادلارینیزی ساخلایاجاغام.» یوسئف اونلارا مهرئبان سؤزلرله تسلّی وردی.
[22] یوسئفئن و آتاسینین نسلی مئصئرده ساکئن اولدو. یوسئف یوز اون ائل عؤمور سوردو.
[23] او، اِفرایئمئن اوچونجو نسئل اؤولادلارینی گؤردو. مِنَسّه‌نئن اوغلو ماکئرئن اؤولادلاری دا یوسئفئن اَلئنده دوغولدو.
[24] بئر گون یوسئف قارداشلارینا ددی: «من اؤلورَم، آمّا تاری آرخایین سئزه نظر سالاجاق. او سئزی بو اؤلکه‌دن او تورپاغا آپاراجاق کی، ائبراهئمه، ائسحاقا و یعقوبا ورمک اوچون آند ائچئب.»
[25] سونرا یوسئف ائسرایئلئن اؤولادلارینا آند ائچدئرئب ددی: «تاری آرخایین سئزه نظر سالاجاق. گدن زامان منئم سوموکلرئمی ده بورادان چیخاردارسینیز.»
[26] یوسئف یوز اون یاشیندا اؤلدو. اونو مئصئرده مومئیالاییب بئر تابوتا قویدولار.