[1] بئر مودّت سونرا یوسئفه ددئلر: «آتان ناخوشدور.» او، ائکی اوغلونو، مِنَسّه و اِفرایئمی اؤزو ائله گؤتوردو.
[2] یعقوبا خبر ورئب ددئلر: «باخ، اوغلون یوسئف یانینا گلئر.» ائسرایئل گوجونو ییغیب، یاتاغی اوستونده اوتوردو.
[3] یعقوب یوسئفه ددی: «قادئری‌موطلق تاری کَنَعان تورپاغیندا اولان لوزدا منه گؤروندو و برکت وردی.
[4] او منه بله ددی: ”باخ من سنی ثمره‌لی ادئب، نسلئنی چوخالداجاغام، سندن چوخلو خالقلار تؤره‌ده‌جیم. بو تورپاغی سندن سونرا گلن اؤولادلارینا مولک اولاراق همئشه‌لئک وره‌جیم.“
[5] ائندی سنئن یانینا، مئصئره گلمه‌دن قاباق مئصئر تورپاغیندا سنه دوغولان ائکی اوغلون دا منئمدئر: اِفرایئم و مِنَسّه رِعوبئنله شمعون کئمی منئمکی اولاجاق.
[6] آمّا اونلاردان سونرا سنئن اوچون دوغولان اوشاقلار سنئنکی اولاجاق، اؤز مئراث تورپاقلاریندا قارداشلارینین آدلاری ائله قید اولوناجاق.
[7] من پَدّاندان گلنده کَنَعان تورپاغیندا اِفراتا یاخین یرده راحئل یانیمدا اؤلدو. اونو اِله اورادا، اِفرات یولوندا، یعنی بیت‌لِحِمده باسدیردیم.»
[8] ائسرایئل یوسئفئن اوغوللارینی گؤروب سوروشدو: «بونلار کئمدئر؟»
[9] یوسئف آتاسینا جاواب وردی: «تارینین بورادا منه وردئیی اوغوللاردیر.» ائسرایئل ددی: «اونلاری یانیما گتئر، برکت ورئم.»
[10] ائسرایئل آرتیق قوجالمیش، گؤزلری ده ضعئفله‌مئشدی و گؤره بئلمئردی. او واخت یوسئف، اوغوللارینی اونا یاخینلاشدیردی و ائسرایئل اونلاری اؤپوب قوجاقلادی.
[11] سونرا ائسرایئل یوسئفه ددی: «دوشونموردوم کی، اوزونو بئر ده گؤره‌رم، آمّا باخ، تاری منه سنئن اؤولادلارینی دا گؤرستدی.»
[12] یوسئف اؤولادلارینی آتاسینین دئزلری یانیندان چکدی و اوزونو یره قویوب سجده اتدی.
[13] یوسئف اوغوللارین ائکئسئنی ده گؤتوروب، اِفرایئمی صاغ اَلی ائله ائسرایئلئن سول طرفئنه، مِنَسّه‌نی ده سول اَلی ائله ائسرایئلئن صاغ طرفئنه چکئب اونا یاخینلاشدیردی.
[14] ائسرایئل اَللرئنی چارپاز اوزاتدی: صاغ اَلئنی کئچئک اولان اِفرایئمئن، سول اَلئنی ده مِنَسّه‌نئن باشینا قویدو. گرچی مِنَسّه ائلک اوغول ائدی.
[15] ائسرایئل یوسئفه برکت وره‌رَک بله ددی: «آتالاریم ائبراهئم و ائسحاقین خئدمت اتدئیی تاری، عؤمرومون بویو قدر منه چوبانلیق ادن تاری،
[16] منی بوتون پئسلئکلردن خئلاص ادن مَلَک، قوی بو اوشاقلارا دا برکت ورسئن! قوی منئم آدئم، آتالاریم ائبراهئم و ائسحاقین آدی بو اوشاقلارلا یاشاسین. یر اوزونده چوخالدیقجا چوخالسین!»
[17] یوسئف آتاسینین صاغ اَلئنی اِفرایئمئن باشینا قویدوغونو گؤردو و بو، اونون خوشونا گلمه‌دی. او، ائسته‌دی کی، آتاسینین اَلئنی اِفرایئمئن باشیندان گؤتوروب، مِنَسّه‌نئن باشینا قویسون.
[18] بونا گؤره ده آتاسینا ددی: «آتا، بله دوز دیئل. ائلک اوغول مِنَسّه‌دئر، صاغ اَلئنی اونون باشینا قوی.»
[19] لاکئن آتاسی ائستمه‌یئب ددی: «بئلئرم، اوغلوم، بئلئرم؛ مِنَسّه‌نئن نسلئندن ده بؤیوک بئر خالق اولاجاق. لاکئن کئچئک قارداش بؤیوک قارداشدان بؤیوک اولاجاق و اونون نسلئندن بئر چوخ مئلّت دوغاجاق.»
[20] او گون ائسرایئل نوه‌لرئنه برکت وره‌رک ددی: «ائسرایئل نسلی، سنئن آدینلا بَرَکتله‌یئب دئیه‌جک: ”تاری سنی اِفرایئم و مِنَسّه کئمی اتسئن“» یعقوب بله‌جه اِفرایئمی مِنَسّه‌دن اوستون توتدو.
[21] ائسرایئل یوسئفه ددی: «باخ، آرتیق من اؤلورَم، آمّا تاری سئزئنله اولاجاق، سئزی آتالارینیزین تورپاغینا قایتاراجاق.
[22] سنه قارداشلاریندان بئر پای دا آرتیق ورئرم؛ او یری کی، من اِمورلولارین الئندن قیلینج و کامانیملا آلمیشام.»