[1] Tatitusti nayaruw parlxayarakitu, akham sasa:
[2] “Ezequiel, Israel qullunak uñtam, ukanakarusti nayan sutixaru
[3] parlam, akham sasa: ‘Israel qullunaka, Tatitun arunakap ist'apxam. Tatitux jach'a qullunakaru, jisk'a qullunakaru, jawiranakaru, qhirwanakarux akham siwa: Jumanakxarux nuwasiñanak apayanipxäma, qullu patanakan diosanakamar yupaychañ chiqanak q'al t'unjä.
[4] Kawkïr altaranakantix jumanakax wilañchanak luqtasipkta, inciensonaksa nakhayasipkta ukanak q'al tukjä, jaqinakaparusti pachpa diosanakap nayräxaruw jiwarayarakï.
[5] Israelita jaqinakan jiwarat janchinakapasti, pachpa diosanakapan nayraqataparuw liwt'ä, ch'akhanakapsti altaranakap nayräxaruw willitatä.
[6] Kawkhanakantix jumanakax jakapkta ukawjanakan markanakamax t'unjata uñjasini, diosanakar yupaychañ altaranakamasa q'ala t'unjatäniwa. Altaranakamax q'ala t'unjatapunïniwa, diosanakamas jisk'a jisk'a tukjatäniwa; incienso luqtasiñ altaranakamas pampa tukuyatäniwa, taqi kuntix jumanakax lurapkta ukanakasti q'ala chhaqtayatäniwa.
[7] Ukatsti walja jaqinakar jumanak taypin jiwaraskir uñjapkäta ukapachaw yatipxäta, nayan Tatitütaxa.
[8] Ukampis nayax jumanakat mä qawqhanirux jiwañat qhispiyarakïwa, jupanakasti yaqha markanakan apanukutaw jakapxani.
[9] Uka jilt'irinakasti, uka jaya markanakan nayat amtasipxitani; kunjämtix nayax jupanakar t'aqhisiykäyäta, nayar taqi chuymampi jan arkapxatapata, diosanakar yupaychañ layku nayat jayarst'apxatapata, taqi ukanakat amtasipxani. Jupanakasti taqi uka axtaskañ ñanqha luräwinakap amthapisisinxa, jupanakpachaw axtasipxani.
[10] Ukapachaw jupanakax yatipxani, nayan Israelan Diosapätaxa, jan walt'añanak apayaniñ arsutaxasa jan aliqa inamaya axsarayañatakïtapa’ ” sasa.
[11] Tatitusti saskakituwa: “Amparanakam t'axllisim, kayunakam takisim, Israel markan axtaskañ juchanak luratapat wararim, uka markasti nuwasiñ utjatapata, kunayman mach'anak utjatapata, usunak utjatapat jiwarani.
[12] Jayankirinakax usunakampiw jiwarapxani, jak'ankirinakasti nuwasïwin jiwarapxani, kawkïrinakatix ukanakatsa jakañan qhiparapkani ukanakasti, manq'atjamaw jiwarapxarakini. Ukham nayax Israel markxarux phiñasiñaxa samarasï.
[13] Uka jaqinakan jiwarat janchinakapasti diosanakap jak'an jaqtatäniwa, jiwaratanakax taqi chiqan utjani: altaranakap jak'ana, jisk'a qullunak jak'ana, jach'a qullunak patana, quqanak k'uchunakana, inciensonak q'aphichapxirïki uka chiqanakan jaqtatäniwa, ukapachaw yatipxani, nayan Israelan Tatitupätaxa.
[14] Mutuyäwixax jupanakatak sinti jach'apunïniwa. Uraqinakapsti alayat aynachkama, Riblá chiqat qalltasina, wasarkama, ch'usa laqaya wasararuw tukuyarakï. Ukapachaw yatipxani, nayan Tatitütaxa” sasa.