[1] “Jumasti Ezequiel, nayan sutixar Israel markar parlam, arunakaxsti sum ist'apxpan.
[2] Naya, Tatituw arsta: Israelan uñisirinakapax niyas uka uraqix jupanakankxaspa ukham amuyasipxi.
[3] Jichhasti nayan sutixar parlam, jupanakarusti sarakim: ‘Tatitux akham siwa: Taqi tuqit jumanakarux nuwantanipxtam, t'unjanipxaraktam; taqi yaqha markanakaw jumanakarux katuntapxtam, jaqinakasti phiskasiñampi, jisk'achañampiw uñjapxaraktam.
[4] Ukhamasti, Israelankir jaqinaka, kuna arunaktix Tatitux jach'a qullunakaru, jisk'a qullunakaru, jawiranakaru, qhirwanakaru yatiyki ukanak ist'apxam; Israel uraqin ch'usa wasara tukuyata markanakaru, uka jak'ankir yaqha markanakampi lunthatjatäki, jisk'achañampi uñjatäpki uka markanakax ist'apxpan.
[5] Tatitux akham siwa: Uka yaqha markanakataki, ukat juk'ampis Edom markatakix wali phiñasitapunïtwa, jupanakax wali kusisiñampiw nayan uraqinakax katuntasipxi, wali jisk'achjañampiw pampanakapan achunakapsa lunthatjapxi’ sasa.
[6] “Israel markarux nayan sutixar parlam, ukatsti sarakim: ‘Tatitux jach'a qullunakaru, jisk'a qullunakaru, jawiranakaru, qhirwanakarux akham siwa: Nayax wali phiñasitätwa kawkïr yaqha markanakatix jumanakar jisk'achjasin t'aqhisiyapktam ukanakatakixa.
[7] Uka laykuw naya Tatitux jichhax juramentompi arsta, jumanak jak'ankir markanakax p'inqachjataw uñjasipxani.
[8] Ukampis, jumanakax israelitanaka, markamaru walja achunak churiri jach'a quqanakampi phuqhantata uñjapxäta, jumanakax niya kuttaniñampïsipktawa.
[9] Nayaw jumanakarux arxatapxäma, jumanakarusti suma yapucht'ata, walja yapunakani tukuyapxarakïma.
[10] Ukan jakir israelitanakarusti waljanirupuniw tukuyarakï. Markanakasti jaqinakampi phuqhantatäniwa, t'unjatäkän uka markanakasti wasitat sayt'ayatäxaniwa.
[11] Jumanakan jaqinakamarusa, uywanakamarus waljaptayapunïwa. Nayra urunakanjam waljani tukxapxäta, qalltat sipan juk'ampi askin sarnaqxapxarakïta. Ukapachaw yatipxäta, nayan Tatitütaxa.
[12] Israel qullunaka, markaxax jumanak taypin sarnaqani, ukatsti jupanakaw katusxapxätam, jumanakasti jupanakarux janirakiw jan wawanis uñjasiykxapxätati.
[13] “ ‘Tatitux akham sarakiwa: Jumanakarusti, qullunaka, jaqinak manq'antirita, markarusa jan wawani uñjasiyirit juchañchapxtamxa.
[14] Jichhax jumanakax janipuniw mayampsa jaqinakarux manq'antkxapxätati, janirakiw markaparus jan wawani uñjasiykxapxätati. Naya, Tatituw uk arsta.
[15] Janipuniw mayampsa uka yaqha markanakampix jisk'achaykxämati, uka markanakat janipuniw mayampsa jisk'achäwinak katuqkxapxätati. Naya, Tatituw uk arsta.’ ”
[16] Tatitusti nayarux sarakituwa:
[17] “Israelitanakax pachpa uraqipan jakapkän ukapachasti, jan wali luräwinakapampiw uka uraqirux q'añuchjapxäna. Jupanakan jakäwinakapasti nayatakix axtaskañapunïnwa.
[18] Jaqinakar jiwarayapxatapata, yaqha markankir diosanakar killisipxatapatxa, jach'a phiñasiñaxampiw mutuyarakï,
[19] uka jan wali luratanakap laykuw yaqha markanak taypirux ananukta.
[20] Ukampis, kawki markanakarutix jupanakax puripkän uka markanakansti, jupanakax nayan sutix takisisipkakïnwa, ukatpï jaqinakax sapxarakïnxa: ‘Akanakax Dios Tatitun markapawa, ukampis uraqinakapat jaqunukutaw uñjasipxi’ sasa.
[21] Ukhamasti nayarux chuymax walpun usurakitäna, Israelan jan wali luratanakap layku qullan sutixan takisitätap uñjasina, kawki markanakarutix puripkän uka markanakana.
[22] “Ukat jichhax Israel markarux sarakïta: ‘Tatitux akham siwa: Israelitanaka, kuntix jichhax lurkä ukax janiw jumanak laykut lurkäxa, jan ukasti qullan sutix laykuw lurä, jumanakax kawki markanakarutix sarapkta ukan nayan sutix takisipxtaxa.
[23] Nayaw uka yaqha markanak nayraqatan uñacht'ayarakï, aytat sutixan qullanapunïtapa, jumanakax uka markanak taypin sutixa jisk'achapxtaxa; kunapachatix nayax sutixan jach'ätap uñacht'aykä, ukapachaw jupanakax yatipxarakini, nayan Tatitütaxa. Naya, Tatituw uk arsta.
[24] Nayaw jumanakarux taqi uka markanakat irpsunxapxäma, tantacht'asinsti uraqimaruw kuttayanxapxäma.
[25] Q'uma umampiw jariqt'xapxäma, yaqha diosanakar yupaychas q'añuchasitanakamatsa q'umachxapxarakïmawa;
[26] jumanakarusti mä machaq chuyma, mä machaq ajayu churxapxäma. Jumanakat uka qala chuyma apaqxapxäma, mä llamp'u chuyma churxapxarakïma.
[27] Chuymanakamaruw nayan ajayux uchä, ukhamat kamachinakax phuqhapxañamataki,
[28] ukatsti nayra awkinakamar churata uraqin jakxapxäta, jumanakax nayan markaxäpxätawa, nayasti jumanakan Diosamarakïyäwa.
[29] Janirakiw juk'ampis juchachaskxapxätati. Trigos walipuniw achuntxani, janirakiw mayampsa jumanakarux mach'a apayankxapxämati.
[30] Taqi quqanakan achunakap mirantayä, pampankir yapunakan achunakap mirantayarakï, ukhamat yaqha markanak nayraqatan manq'atjam jan mä p'inqa uñjasisipkañamataki.
[31] Jumanakasti jan wali sarnaqäwinakamata, juchanak lurapxatanakamat amtasipkäta ukapachasti, jumanakpachaw p'inqasipxäta, jan wali luratanakam layku.
[32] Naya, Tatituw uk arsta: ‘Yatipxam israelita jaqinaka, janiw jumanakan ukanak katuqañamatak lurkti, jan ukasti, luräwinakamat jumanak pachpa p'inqasiñanakamatakiw lurta’ sasa.
[33] “ ‘Tatitux akham siwa: Nayax taqi juchanakamat q'umachxapxäma ukkhasti, pachpa markanakaman jakxapxäta, t'unjatäkän ukanaksa wasitat sayt'ayxapxarakïta.
[34] Kawkïr uraqitix wasara tukutäkän ukasti, jichhax taqi jaqinakan uñjkat yapuchatäxaniwa.
[35] Ukatsti sapxarakiniwa: Aka uraqix wasarar tukuyatänwa, ukampis jichhax Edén huertökaspas ukhamäxiwa; t'unjatäpkäna, ninampis nakhantayatäpkän uka markanakasti, jichhax wali suma sayt'ayata, walja jaqinakan markanakäxiwa, sasa.
[36] Ukapachaw uka jak'ankir markanakax yatipxani, kunatix t'unjatäkäna, ninampis nakhantayatäkän ukanak naya, Tatitun wasitat sayt'ayxataxa. Naya, Tatituw uk arsta, arsutaxarusti phuqhapunïwa.
[37] “ ‘Tatitusti akham saskakiwa: Juk'ampsa luraskakïwa. Kuntix Israel markax jupanak layku lurañax maykitani ukanak phuqhäwa; jaqinakapsti mä jach'a tamaruw tukuyxarakï.
[38] T'unjat markanakasti walja jaqinakanipuniw tukxani, kunjämatix ovejanakax wilañcha luqtañatak Jerusalén markar apatäki ukar uñtata. Ukapachaw yatipxani, nayan Tatitütaxa’ ” sasa.