[1] Tatitux sarakituwa:
[2] “Jumasti Ezequiel, jaqi jiwayir markatakiw jichhax arsüta. Axtaskañ luräwinakapat juchañchäta,
[3] ukatsti jupanakarux sarakïtawa: ‘Tatitux akham siwa: Jaqinakamar jiwarayir marka, q'añuchasiñatak diosanak lurasir marka, ¡pachax jumatak niyaw purinxi!
[4] Jaqi jiwayatanakamampiw juchañchjastaxa, juman lurata diosanakamampiw q'añuchjasiraktaxa; jichhax mutuñ katuqañam urux jak'ankxiwa, urunakaman tukusiñapas jak'ankxarakiwa. Jichhax yaqha markanakampiw jisk'achjayäma, taqi markanakampiw larusiyäma.
[5] Jak'ankir markanakasa, jayankir markanakas jumat larusipxätamwa, k'ari diosanakani wali aytat marka, jan wali sarnaqir marka.
[6] Ukankiw Israel marka apnaqirinakaxa, jumanak taypin jakapxaraki, jaqinaksti qawqhtix munapki ukkha jiwarayapxi.
[7] Jaqinakamasti janiw awkiparusa, taykaparusa suman uñjapkiti, yaqha markat jutiri jaqinakarus ñanqhachapxiwa, wajchanakarusa, ijma warminakarus inakiw irnaqayapxi.
[8] Nayan qullan chiqanakaxarusti jisk'achapxiwa, samarañ sábado urunakaxsa janiw imapkarakiti.
[9] Yaqhipa jaqinakamasti, ina ch'usat tumpantapxatap layku jaqinakan jiwaratanakapat juchanïpxiwa; qullu patanakan diosanakar yupaychañatak jach'a manq'äwinakaruw sarapxi, ukansti axtaskañanak lurapxaraki.
[10] Yaqhip jaqinakax pachpa awkipan warmipampiw wachuqa jucha lurapxi, jan ukax phaxsi wilan warmimpiw ikintasipxi.
[11] Yaqhipanakasti jaqi masipan warmipampiw wachuqa jucha lurapxi, yaqhipanakasti pachpa yuxch'apampiw jan wal sarnaqapxi, yaqhipanakasti prima kullakaparuw warmisipxi.
[12] Yaqhip jaqinakamasti jaqi masipar jiwayañatakiw qullqi katuqasipxi. Qullqsa wali jila jalaqtampiw mayt'apxi, jaqi masiparuw t'aqhisiyapxi, inakiw irnaqayapxi, nayatsti armasipxituwa. Naya, Tatituw uk arsta.
[13] “ ‘Jerusalén marka, jaqinakar inaki irnaqayatamata, jupanakar jiwarayatamatsa, nayax jumataki wali phiñasitätwa.
[14] Jumaru mutuyañ amtkä ukkhax, janiw ch'amamax nayar saykatañatakix utjkaniti. Naya, Tatituw uk arsta, arsutaxsti phuqhapunïwa.
[15] Taqi markanakaruw ananuküma, ukhamat juchanakam q'umachsurakïma;
[16] jucham laykuw taqi markanakax nayat jan wal parlapxani, ukampis jumax yatirakïtawa, nayan Tatitütaxa’ ” sasa.
[17] Tatitusti sarakituwa:
[18] “Israelitanakax nayatak q'añu t'unar uñtatawa, kamisatix qullqita, cobreta, estañota, hierrota, plomota, jilt'ir q'añux hornor uchatax qhiparki ukhamawa.
[19] Ukatpï naya, Tatitux sistxa: Jumanakax q'añu t'unar uñtataw tukupxtaxa, jichhax Jerusalén marka taypiruw tantacht'apxäma.
[20] Kunjämatix qullqisa, cobresa, hierrosa, plomosa, estañosa hornor warantataxa, ukatsti ninampi umatatayatarakixa, ukhamarakiw nayax phiñasiñaxan mayawjar tantacht'apxäma, ukatsti uka qhuyanakarjamaw umatatayapxarakïma.
[21] Jïsa, nayax q'apisiñ ninaxa aqtayä, jumanakarusti marka taypin phichkatas umatatayañatakiw tantacht'apxäma.
[22] Kunjämatix qullqix ninan umatatkixa, ukhamarakiw jumanakax marka taypin umatatayata uñjasipxäta, ukhamat jumanakax yatipxäta, naya, Tatitun q'apisiñaxa jumanakxar wartanitaxa” sasa.
[23] Tatitusti saskakituwa:
[24] “Jumasti Ezequiel, Israel markar sarakim: ‘Jumax jan jallu puriñampi, jan uma utjañampi mutuyat markätawa,
[25] marka apnaqirinakamasa leonanakjamaw jaqinakarux manq'antapxi; pachpa uraqipan katutanakaparus warart'asisa wikhanuqapxi, taqi imasitanakapsa, qamir yänakapsa q'al lunthatjapxi, walja warminakaruw ijma uñjasiyapxaraki.
[26] Aka markankir sacerdotenakax, nayan yatichäwinakax maysaruw q'iwipxi, nayataki qullanäki ukanaksti takichasipxiwa; janiw jupanakax kunatix qullanäki, kunatix ñanqhäki uk amuyapkiti, janirakiw mayninakarus kunatix q'umäki, kunatix q'añüki uk amuyapxañapatakis yatichapkiti. Nayan samarañ sábado urunakaxarusa janiw yäqapkiti, janirakiw nayarux jach'añchapkituti.
[27] Aka markan jilïrinakapasti, katutaparu jisk'a jisk'a wikhanuqiri qamaqinakar uñtatäpxiwa, jaqinak jiwarayañatakisti jank'akïpxiwa, ukhamat qamiriptapxañapataki.
[28] Profetanakax kunatix chiqapäki uk imt'apxi, kunjämatix mä jaqix pirqa janq'ur tukuykix ukhama; jupanakasti unañchäwinak uñjapxta sapxiwa, ukampis uka parlatanakapax k'arikamakiwa. Jupanakax nayan sutixaruw parlapxi ukampis janiw nayax jupanakar kunsa parlkti.
[29] Qamir jaqinakax nuwasiñaru, lunthatasiñaru katuyatawa; t'aqhin jakirinakarusa, pist'añan sarnaqirinakarus inakiw irnaqayapxi, yaqha markat jutir jaqinakarus taqi kunansa jan wal uñjapxi.
[30] Nayasti uka jaqinak taypinxa, mayni aski jaqi thaqhäyäta, markapatak mä kuna asksa lurañapataki, aka markar jan t'unjañaxatak nayar achikt'asiñapataki, ukampis janiw uka jaqi jikxatkti.
[31] Ukatpï nayax taqi jupanakxarux mutuyäwixa apayantxa, q'apisiñaxsti mä ninjam jupanakar t'unjañatak wartanirakta, ukhamat sarnaqäwinakapat wayt'asa. Naya, Tatituw uk arsta.’ ”