[1] Jupax sarakituwa: “Jumasti, aka qillqat manq'antam, ukatsti Israel markar parlir jank'ak saram” sasa.
[2] Nayasti lakax jist'arta, ukat jupax uka qillqat nayar manq'antayitu.
[3] Ukatsti sarakituwa: “Jichhasti nayax churksma uka qillqat manq'antam, ukampirak sist'asim” sasa. Nayasti manq'anttwa, uka qillqatasti misk'it sipansa juk'ampi muxsapunïnwa.
[4] Ukatsti sarakituwa: “Jichhasti saram, ukatsti kuntix nayax Israel markar sañaxäki uk yatiyanim.
[5] Janiw nayax yaqha parlani, jan ukax jan amuyt'kaya arunaka parlir markar khitksmati, jan ukasti Israel markaruw khitsma.
[6] Nayasti janiw wali ch'ama parlani markanakar khitksmati, juman jan amuykay parlir markaru. Uka ch'ama parlani markanakaru khitkirisma ukasa, jupanakax parlatamarux ist'apxiristamwa.
[7] Ukampisa, Israel markax janiw jumar ist'añ munkätamti, nayar jan ist'añ munatap layku. Taqi Israel markax k'ullu, jan amuyt'asirïpxiwa.
[8] Ukampis nayax jumarux jupanakjam qala chuymani, qhuru tukuyarakïma.
[9] Diamante qalat sipansa, qarqat sipansa juk'ampi ch'ullqhi tukuyäma. Jan jumax jupanakar axsaramti, kuna ajanumpis jumar uñkatasipkpan, qawqha qhuru jaqinakäsipkpansa, jumax jan axsaramti” sasa.
[10] Ukatsti sarakituwa: “Taqi arunakaxar wali sum ist'am, ukatsti chuymamarurak sum katuqam.
[11] Jaya markanakar apanukutäki uka marka masinakamar uñjir saram, jumarux ist'apxpas janis ist'apkpan, jupanakar saskakim: ‘Tatitux akham siwa’ ” sasa.
[12] Ukapachaw Tatitun ch'amapax nayar aptawayitu, nayan qhipäxaxansti mä jach'a uraqi khathatis jach'a ch'amampi unxtkaspa ukham ist'arakta, ukasti Tatitun jach'a kankañapaw ukawjat sartäna.
[13] Uka pusinin chhiqhanakap purapat jawq'asitapampi, muyuri muruq'unakan ch'axmitanakapampix uraqi khathatin ch'axmitapjamänwa.
[14] Tatitun ch'amapaw nayarux aptitu ukatsti uka chiqat apsunirakitu, nayasti wali llakt'ata mayjt'ataw sarxarakta, ukchañkamasti Tatitux amparapampiw wali waythapirakitu.
[15] Ukatsti Tel Abib sata chiqaruw purta, Quebar sat jawir thiyaru, kawkhantix jaya markar apanukut israelitanakax jakapkäna uka chiqaru, ukansti jupanakampix paqallqu uruw qamararakta, jan kun lurasa, jan kun kamsasa.
[16] Uka paqallqu uru qhipatsti, Tatitux sarakituwa:
[17] “Jaqin yuqapa, nayax Israel markan uñjiripat usksma. Nayax kunsa jumar yatiykäma ukkhasti, jank'akiw Israel markarux yatiyañama, ukhamat jupanakan taqi kunsa suma yatipxañapataki.
[18] Nayax inas mä jan wali jaqin jiwañapatak arsurista; jumatix uka qhuru jaqir jan parlxaykäta, uka jan wali lurañanakap apanukuñapataki, ukhamat uka jaqin jakaskañapatakixa, jupax juchap laykuw jiwani, ukampis nayax jumaruw uka jaqin jiwatapat wayt'äma.
[19] Ukampis jumatix uka qhuru jaqiru uka jan wali luratanakap apanukxañapatak parlxayäta, ukatsti janiraki uka jaqix ist'kätam ukaxa, jupax juchapat jiwaskani, jumasti janiw kuna juchanïkätasa.
[20] Ukhamarakiw utjaspa, mä aski jaqix uka aski kankañap apanukxas jan walinak luraspa, nayas juparux jan walt'añar nukt'irista; ukampis jumatix uka jaqir jan amuyt'aykätaxa, uka jaqix jiwaniwa. Nayatakisti uka aski luratapax janiw kunäkanisa, jupax juchap laykuw jiwani, uka jaqin jiwatapatsti jumaruw wayt'äma.
[21] Ukampis jumatix uka jaqir amuyt'ayäta, ukatsti jupax janirak juk'ampi jucha lurkxaniti ukkhaxa, juman arum ist'atapat jupax jakaskakiniwa, jumasti janirakiw kuna juchanïkätasa” sasa.
[22] Tatitusti ukkhanpach amparap luqxatasin sarakitu: “Sartasim, pampa tuqir saram, ukan nayax jumar parlxayäma” sasa.
[23] Nayasti sartasin pampa tuqiruw sarta, ukan nayax Tatitun k'ajkir kankañap uñjta, kunjämatix Quebar jawir thiyan uñjkäyät ukhama. Uraqir puriñkamarakiw p'iqix alt'asta,
[24] ukampis Tatitun ch'amapaw nayarux phuqhantitu, ukat sayt'ayitu. Ukatsti Tatitux akham sasaw parlxayitu: “Utamar sarxam, ukatsti ukan jist'antasim.
[25] Yatiñamawa, jumarux phalanakampiw ñach'antapxätam, ukatsti janiw markankirinakampis chikäkätati.
[26] Ukhamarus nayax laka manqhimaruw laxram lip'katayä, ukatsti amutuw tuküta. Uka qhuru jaqinakarusti janirakiw juk'ampi tuqinuqxätati.
[27] Ukampis nayatix jumaru mä kunsa sañ munäma ukkhaxa, wasitat parlayxäma, ukat akham sarakïta: ‘Tatitux akham siwa.’ Ist'añ muniristi ist'aniwa, jan ist'añ muniristi janiw ist'kaniti, nayatak sayt'asir jaqinakäpxatap layku.