[1] Llätunkïr marana, tunkïr phaxsina, tunka uru saraqatarusti, Tatitux nayaruw sarakitu:
[2] “Jichhürux kuna urükitix uk sum qillqantam, jichhüruw Babiloniankir reyix Jerusalén markar nuwantañ qallti.
[3] Ukatsti aka nayataki sayt'asir markatak aka uñtasïwi arsurakim, jupanakan amuyt'asipxañapataki. Nayan sutixar sarakim: “ ‘Nina patar mä phukhu itxatam, ukarusti umampi warantam;
[4] uka phukhurusti kharitatat ovej aychanak ucham, charawjankiri, jikhanïxankir suma aychanaka, ch'akhanakatsa sumäki uk ucharakim.
[5] Jichhasti lawanakampi phaykatam, aychasa, ch'akhanakasa sum qhathiñapataki.
[6] “ ‘Tatitusti siwa: ¡Kunakïkani jaqi jiwayir markatakixa! Jupax mä saruntat phukjamawa, sarupa jan qaqstiri phukhu. Jumax mayat mayat uka aychanak apsum, ch'usa phukhu antutañkama.
[7] Markasti wila wartatampi phuqhantatawa; jaqinakarux qarqanakar jisktasaw jiwaraytaxa; wilapsa janirakiw uraqirux puriyktati, ukhamat laq'an jan imxatañapataki.
[8] Nayasti uka wilxa pachpa q'ara qarqxaruw wañt'ayä, ukhamat jan chhaqtañapataki, uka wila uñjasin phiñasiñaxan ninjam aqtañapataki, taqi kunas chiqapar uñjatäñapataki.
[9] “ ‘Tatitusti siwa: ¡Kunakïkani jaqi jiwayir markatakixa! Naya kipkaw mä nina naktayä.
[10] Jumasti Ezequiel, walja lawanak aptanim, ninsa naktayarakim, uka aychsti suma qhathiyam, uman q'al wañkatañapkama, ch'akhanakan nakhantañapkama;
[11] ukasti uka ch'usa phukhu ninar itxatam, uka phukhun nina sank'aru tukuñapkama, ukhamat q'umachata uñjasini; uka saruntatas chhaqtxarakini.
[12] Ukampis phukhun sinti saruntatätap laykux janiw ninampis q'umachañjamäkiti, sasa.
[13] “ ‘Jerusalén marka, nayax uka ñanqha juchanak luratamat q'umachañ munäyäsma, ukampis janiw q'umachatäktati. Nayax mutuykäm ukkhakiw q'umachat uñjasïta.
[14] Naya, Tatituw uk arsta, ukasti ukhamapunïniwa. Naya kipkaw ukanak lurä, ukanaksti phuqhapunïwa; janipuniw khuyapt'ayaskäti, janirakiw chuymaxansa amtkäti. Taqi sarnaqäwimata, luräwinakamat mutuyapunïmawa. Naya, Tatituw uk arsta.’ ”
[15] Tatitux sarakituwa:
[16] “Ezequiel, warmimarux walpun munastaxa, ukampis mä akatjamat apaqäma. Ukhamasti janiw jachätati, janirakiw llakisïtasa.
[17] Amukiw t'aqhisïta, janirakiw llaki isimpis isthapisïtati kunjämatix jiwirinakat isthapisipki ukhama. Jan q'ara p'iqis sarnaqamti, janirak q'ara kayus saramti; ajanumsa jan imt'asimti mä kunatsa t'aqhiskasma ukhama, janiraki uka pachanakan manq'añ t'ant'a manq'amti.”
[18] Nayasti uka willjtax jaqinakampiw parlaskäyäta, jayp'urusti warmixax jiwxiwa; qhipärmanthisti kunjämtix Tatitux siskitu ukarjamaw lurarakta.
[19] Ukatsti markankir jaqinakax sapxarakituwa: “¿Janit nanakar uka luratam qhanañchapkitätasti?” sasa.
[20] Nayasti jupanakarux saraktwa: “Tatituw nayar akham situ:
[21] ‘Israel markar parlam: Tatitux akham siwa: Nayasti qullan utaxa q'al tukjä, kawkïrtix wal munapkta, muspharañampi uñch'ukt'apxarakta, uka utaxat jach'a jach'as tukupkarakta uka uta; Jerusalén markar jaytanipkta uka yuqall wawanakamasa, imill wawanakamasa jiwarayatäpxaniwa.
[22] Jumanakax kuntix nayax lurkta ukhamarak lurapxäta, ayquñanakam uñacht'ayañatakisti janiw ajanunakam imt'asipkätati, janirakiw uka pachanakan manq'añ t'ant'sa manq'apkätati.
[23] Janiw q'ara p'iqisa, q'ara kayusa sarnaqapkätati. Janiw jachapkätati, janirakiw t'aqhisipkätasa. Ñanqha juchanak lurapxatam laykusti jan ch'amaniw uñjasipxäta, ukatsti jumanakkamaw jachapxarakïta.
[24] Ezequiel profetax jumanakatakix mä amuyt'asïwïniwa, kuntix jupax jichhax lurki taqi ukanak jumanakax lurapxarakïta. Taqi ukanakax luraskani, ukapachaw jumanakax yatipxäta, nayan Tatitütaxa.
[25] “ ‘Jichhasti israelitanakat ch'ama churir qullan utaxa apaqäwa; kawkïrirutix wal munapki, muspharañampi uñch'ukt'apkaraki, uka utaxat jach'a jach'as tukupkaraki uka uta; yuqall wawanakaparusa, imill wawanakaparus apaqarakïwa.
[26] Uka urusti, khititix taqi ukanakat jaltkani ukaw jumar yatiyir jutani.
[27] Uka uruw jan juk'ampi amutükxätati, ukatsti khititix jaltankatayna ukampiw parlt'asirakïta. Ukhamat jumax aka jaqinakatakix mä yatichäwi tuküta, jupanakasti ukapachaw nayan Tatitütax yatipxarakini.’ ”