[1] Tatitux nayaruw parlxayitu, akham sasa:
[2] “Ezequiel, jumax saykatasir marka taypin jaktaxa. Jupanakax nayranïsipkiwa, ukampis janiw uñjapkiti, jinchunïsipkiwa, ukampis janiw ist'apkiti, saykatasir markätap layku.
[3] Ukhamax jaya markar apayatäñatak kunatix wakiski ukanak wakicht'asim, ukatsti taqinin uñjkata urpach utamat mistxam, ukatsti yaqha chiqar sarxam; inas ukhamat nayar saykatir markätapat amuyasipxchini.
[4] Jichhax urpacha, taqin uñjkañ yänakam apthapisim, apanukutäñatakis wakichaskasma ukhama; jayp'u tuqirusti taqinin uñjkataraki mistuwayxam, apanukutäsinsa sarkasma ukhama.
[5] Ukatsti pirqarux taqinin uñjkata mä jach'a p'iya p'iysum, uka chiqa yänakamas apt'ata mistuwayxam.
[6] Ch'amakthapxani ukkhasti, taqinin uñjkata, yänakam q'ipt'asit mistuwayxam. Ajanumsa imt'asirakim uka uraqi jan uñjaskañamataki. Ukham luratamampisti Israel markatakix mä uñacht'äwïyätawa” sasa.
[7] Nayasti Tatitun arunakaparjamaw yänakax wakichasxta, urpacharakiw ukanak apt'at mistuwayxta, apanukutäsin sarxiri jaqjama. Jayp'u tuqirusti amparaxampiw pirqan mä jach'a p'iya lurarakta, ukat jayp'thapxipansti taqin uñjkataw yänakax q'ipt'asit mistuwayxta.
[8] Qhipärmanthisti Tatitux nayaruw parlxayitu, akham sasa:
[9] “Uka qallasir israelita jaqinakax, kuntix lurkta ukat jiskt'apxpachätamwa.
[10] Jichhasti nayan sutixampi jupanakarux saskakim, aka yatiyäwix Jerusalén markankir reyitakïtapa, uka markan jakiri taqi uka israelita jaqinakatakïtapa.
[11] Jupanakarusti sarakim, jumax jupanakataki mä yatiyäwi churiri chimpütama, ukatsti jupanakax kuntix jumax lurkta uka kipka lurapxañaparaki, jaya markaru apanukutäpxaniwa uka layku.
[12] Jupanakan jilïripasti q'ipip q'ipt'asitaw uka ch'amakthapix pirqa p'iyanjam mistuwayxañaparaki. P'inqapatsa markar jan uñjañatakix ajanup imt'asisin sarxani.
[13] Nayasti jupxarux qänaxampi jaqxatasin katjä. Babiloniaruw juparux katuntat aparakï, ukampis janiw uka marka uñjkaniti, uka markar janïra purkasin jiwxani.
[14] Juparu muyuntata uñjiri soldadonakarusti, taqi aka uraqpacharuw ananukü, ejercitoparusti q'al tukjañkamaw arknaqarakï.
[15] Yaqha markanak taypin ananukut uñjasipkani ukapachaw yatipxani, nayan Tatitütaxa.
[16] Ukampis nayaw mä qawqha jaqinakar jilt'ayä, nuwasïwin jiwañata, manq'atjam jiwañata, jan ukax kunayman usunakampi jiwañatsa; ukhamat kawki markanakarutix sarapkani ukanakan yatiyapxañapataki, jupanakan kunayman q'añu luräwinakapata. Ukapachaw yatipxani, nayan Tatitütaxa” sasa.
[17] Tatitux wasitat nayar parlxayitu, akham sasa:
[18] “Ezequiel, manq'kasax axsarañat wal khathatïta, wali llakt'atäkasmas ukham uma umt'arakïta.
[19] Aka uraqin jakir jaqinakaru, Jerusalén markan jakirinakaru, taqpach israelita jaqinakarusti sarakim: ‘Tatitux akham siwa: Manq'anakam wali llakisiñampiw manq'apxäta, umañanakamsti wali axsarasaw umapxäta; aka markax jaqinakapan jan walinak lurapxatapat q'ala t'unjata, ch'usarakiw tukuni.
[20] Jaqinakan phuqt'ata markanakax q'ala t'unjatäniwa; aka markasti ch'usa wasarar tukuyatarakïniwa. Ukapachaw jumanakax yatipxäta, nayan Tatitütaxa’ ” sasa.
[21] Tatitux nayar sarakituwa:
[22] “¿Israelitanakax kunsa sañ munapxi uka säwipampixa: ‘Urunakax inakiw sarakipaski, profetan unañchäwi uñjatanakapasti janiw phuqhaskiti’ sasasti?
[23] Jichhasti jupanakarux nayan sutixampi sarakim: ‘Nayaw uka säwi chhaqtayä, janiw mayampisa Israel markan ukax arsutäkxaniti’ sasa. Ukxarusti sarakim: ‘Kuntix profetanakax unañchäwi tuqi uñjapkän ukanakan phuqhasiñap urunakasti niya jak'ankxarakiwa.
[24] Israelitanak taypinsti janipuniw k'ari unañchäwi uñjañax utjkxaniti, janirakiw k'ari profecía arunak parlañas utjkxaniti,
[25] naya, Tatitu kipkaw parlä, nayan arsut arunakasti jank'akiw phuqhasirakini. Jumanakpachaw ukanak uñjapxarakïta, nayatak sayt'asir jaqinaka; nayaw parlä, parlataxasti phuqhasipuniniwa. Naya, Tatituw uk arsurakta’ ” sasa.
[26] Tatitusti nayarux sarakituwa:
[27] “Israelitanakax juman unañchäwi uñjatanakaman jaya urunakat phuqhasirïtap parlapxaraki.
[28] Ukhamasti jupanakar sarakim: Tatitux akham siwa: ‘Nayan arsutanakaxax jank'akiw phuqhasini, arunakaxasti phuqhasipuniniwa. Naya, Tatituw uk arsta’ ” sasa.