[1] Ukatsti mä aru ist'arakta, nayar saskiri: “Juma, jaqin yuqapa, saythapim, nayaw jumar parlxayäma” sasa.
[2] Ukham nayar parlkipanjam, Tatitun ch'amapax mantitu, ukaw nayar sayt'ayitu. Ukatsti kuntix uka arux parlxaykitän uk ist'arakta
[3] akham siri: “Jaqin yuqapa, jumarusti israelitanakan ukaruw khithäma, uka israelita jaqinakasti nayatakiw sayt'asipxi. Jupanakasa, nayra awkinakapas naya tuqipuniw jichhürkam sayt'asipxi.
[4] Wawanakapas jupanakjam k'ullu, qala chuymani jan amuyt'ani jaqinakäpxarakiwa. Jichhasti jumarux jupanakan ukaruw khithäma, jupanakarusti akham sätawa: ‘Tatitux akham siwa.’
[5] Parlatamarux ist'apxpas janis ist'apkpan, jupanakax nayatak sayt'asir jaqinakäpxiwa, ukampis uka parlatamampix jupanakax mä profetan jupanak taypin utjatap yatipxani.
[6] Jumasti, jupanakarux jan axsaramti, kuntix sapkätam uka arunakarus janirak axsaramti, ch'aphinakan muyuntatjamas uñjaskchïta, jan ukax alacran sata laq'unak taypinjam jikxataskchïta ukasa. Arunakapar janipun axsaramti, jupanakan mayja uñnaqapxatapatsa janirak mayjt'asimti, qawqha naya tuqi sayt'asir jaqinakäsipkpasa.
[7] Jumax nayan arunakax jupanakar qhanañcham, ist'apxpasa janis ist'apkpan, jupanakax qallasir jaqinakawa.
[8] Nayax siskäma uka arunak sum ist'am, janirak jupanakjam jan ist'asir tukumti. Lakam jist'aram ukatsti kuntix churkäm uk manq'antarakim” sasa.
[9] Ukatsti mä ampar naya tuqir luqtasinkir uñjarakta, uka amparasti mä qillqat apt'atänwa.
[10] Uka amparasti nayan nayraqataxan uka qillqat janatati. Uka qillqatasti purapäxar qillqsutänwa: Ukansti jachañanaka, t'aqhisiñanaka, axsarañanak yatiyäwinak qillqsutänwa.